Resaka tsy atao be

Hifety sy hihinan-kanina indray ny mpanao politika rahampitso, eny Iavoloha mandritra ny hetsika fiarahabana ny Filohan’ny tetezamita mivady. Hiedinedina hiseho televiziona indray ny ankamaroan’ireo nahazo fanasana manokana. Na izany aza hita ho be filaza sy manao fikafika ireo tandapan’ny tetezamita, izay nilaza fa «tsy hisy kabary politika mandritra io lanonana io». «Tomban’ezaky ny zava-bita sy ny vinavina amin’ny ho avy, hono, no hatao». Fa tsy kabary politika ve izany e? Sa kabary ambony latabatra sy resaka ambony vavahady no azo ilazana azy? Tsy misy iraharahan’ny vavalalabemandry izany rehetra izany anefa akory fa ny tena andrasan’izy ireo izao dia izay hampitombo ny vola miditra any am-paosiny, hahafahany miatrika ny fiainana sy ny fanatsarana ny fandriampahalemana. Raha tsy mbola azo antoka tokoa aloha ny hahatanterahan’ireo, tsy tokony ho be kabary koa ny mpitondra e!

0 Fanehoan-kevitra

Lahatsoratra hafaMiverena @ pejy fandraisana

	Be midina Nampiseho fahavonona ny hamongotra ny kolikoly ary hanatevina ny fifehezana ny lalàna ireo tompon’ andraikitra ambony eo anivon’ny polisim-pirenena. Nanao fisafoana tamina fokontany maro teto an-dreni-vohitra mihitsy ny minisitry ny Filaminana anatiny sy ny tale jeneralin’ny polisim-pirenena, ny alakamisy alina teo. Miova amin’ny mahazatra dia ny fibaikoana avy eny ambony latabatra aloha ilay hetsika. Asa anefa raha hahitana izay isan’ny tena maharary ny vahoaka dia ny ny tsy fandriampahalemana izany fidinana ifotony ao anatin’ny indray alina izany. Enga anie ka tsy ho fisehosehoana fotsiny ihany koa izany. Raha ireo olon-dratsy mantsy tsy mba mila miantso mpampahalala vaovao fa dia mazoto hatrany manao «fisafoana» ny tokantranon’ireo valalabemandry…

	Dodona Lasa nankato sy nanaiky tampoka an’ilay Lalàm-panorenana nolaniana tamin’ny taona 2010 ny filohan’ny Kaongresin’ny tetezamita, Mamy Rakotoarivelo. Ny tenany mihitsy no voalaza fa nidrikina nitaky ny hampiharana ny andininy faha-166 ao anatin’ny Lalàm-panorenana manoloana ny adihevitra mahakasika ny fitantanana ny firenena aorianan’ny fametraham-pialan’ny Filohan’ny tetezamita. Hatreto anefa dia toa tsy nitompo afa-tsy tamin’ilay sori-dalana naroson’ny vondrona Sadc ity mpanao politika akaiky ny Filoha teo aloha, Marc Ravalomanana ity. Impiry impiry moa no tsy nanambaran’izy ireo fa tsy misy Lalàm-panorenana manan-kery izany eto? Izao anefa dia nitsimbadika indray ny rasa. Fikatsahana tombontsoa miharo faniriana fahefana avokoa no ao ambadik’izany. Izany hoe hitantana firenena (na dia tsy nisy nifidy aza) izany kosa ve moa tsy hahadodona? Tanteraka ihany ny faminanian’ny pasitera Mailhol fa olon-kafa fotsiny ireo hapetraka ho Filoha fa tsy ny tenany.

	Kajikajy Samy te hifikitra mafy eo amin’ny sezany ireo tompon’ andraikitry ny tetezamita nirotsaka ho kandidà amin’ny fifidianana filoham-pirenena. Tsy misy mihevitra ny hiala mora foana izany fa dia mitady izay fomba rehetra hanemorana ilay fotoana fametraham-pialana foana aloha. Na koa mitady fomba mba hanamoramorana kokoa ny aorian’ilay fametraham-pialana. Tsy manao ilay dingana lehibe ny hafa dia mitankemotra ihany koa ny sasany. Na miara-mirona na miara-mihenahena no toa tarigetran’izy rehetra. Matoa anefa samy mifampiahiahy ohatr’izay dia samy manan-kevitra ny hanararaotra ny fahefana maha mpitondra mba hahazoana tombony amin’ny maha kandidà. Tsy misy afa-tsy kajy ny tontolon’ ny politika saingy misy ireo efa tena nahay io taranja io hatrany am-pianarana, misy ireo efa teo amin’ny toerany vao tena nanabevoho ny fahaizany.

	Vono olona Olona roa no namoy ny ainy tany Ankirihiry-Mampikony rehefa nalain’ny andian’olona teo am-pelantanan’ny zandary. Teny Ambolokandrina indray dia lehilahy iray voatondro ho nangalatra no nodoran’ ny olona efa « maimbo rà » velona. « Fitsaram-bahoaka », hono no anaran’izany. Olona efa leom-boanana na koa tsy mahatoky ny rafitra mifanaraka amin’ny lalàna velona misy koa angamba. Tsy fanarahan-dalàna tsotra izao ihany koa anefa ary mitory fihemorana mankany amin’ny tany tsy refesi-mandidy. Ahitana taratra fa tsy dia atahoran’ny olona ny fanjakana mijoro na tsy homen’izy ireo lanja . Indro kelin’ny tetezamita io. Asa sao mba leon’ny mitazona mpangalatra nefa mety ho votsotra indray koa avy eo ireo mpitandro ny filaminana?

	Lalan-dririnina Na ny fomba hahatongavana amin’ilay tetezamita vaovao, araka ilay fehin-kevitra nivoaka tamin’ilay fihaonambe notarihin’ny Ffkm, aza dia efa tsy itovizan’ireo mpomba an’izany hevitra. Efa misy ankolafy sahady koa eo anivon’io mpankasitraka ny tetezamita vaovao io. Hahagaga ve moa izany fa mbola ny fitadiavan-tseza hatrany no tena ifotoran’ny resaka. Manoatra noho ireny olona mifarombaka sakafo, araka ny fahita amina fanasana sasany ireny. Misy ireo mbola sondriana manesokesoka, dia ireo nahazo anjara mialoha nanoloana ny latabatra ary misy ireo milendalenda, tsy miandrandra afa-tsy ny hialan’ireo eo anoloana faran’izay haingana. Amin’izay mantsy mba samy voky na farafaharatsiny aloha mba nihinana. Ao dia ao koa anefa ireo izay efa nahazo anjara no mbola mandeha mangarom-bilany mahavita mandrahona amin’ny basy. Tena misy manana satroka maro tokoa ireo mpitondra fanjakana ka!… Hananan’ny sasany amin’izy ireo hatramin’ny diplaoman’ny fandrobana. Mbola hotohizana firy taona indray izany rehetra izany?

Hijery hafa