Hanao bemidina ao amin’ny ozinin’Ambatovy ao Tanandava Toamasina ireo mpikambana ao anatin’ny komity teknika ivondronan’ny minisiteran’ny Harena an-kibon’ny tany, ny Fahasalamana, ny Tontolo iainana, ny Asa sy ny Lalàna sosialy, ny Indostria ary ny Ofisim-pirenena misahana ny Tontolo iainana, ny alarobia ho avy izao.

Tafiditra ao anatin’ny asa fitsirihana ilaina mialoha ny fampihodinana ny ozinina fitrandrahana harena an-kibon’ny tany iray, araka ny efa voafaritra ao anatin’ny lalàna mifehy ny Harena an-kibon’ny tany io hatao io. Raha tsy voamarina mantsy fa afaka mihodina amin’ny famokarana ny ozinina, tsy afaka avoaka ny alàlana amin’ny fampihodinana izany na ny «autorisation de mise en service».

Amin’ny faran’ny volana ho avy izao rahateo no mihevitra ny hamokatra nikela sy kôbalta voalohany ny ozinin’Ambatovy. «Tsy maintsy vita mialoha ny faran’ny volana araka izany io fitsirihana io», hoy i Daniella Randriafeno, minisitry ny Harena an-kibon’ny tany.

Niteraka resabe ihany koa ny mahakasika ny habetsahan’ny tahana asidra solfirika hita tao amin’ny reniranon’i Ranomainty, izay nanondroana ny ozinin’i Tanandava ho tompon’antoka. «Hampiarahana amin’io bemidina hatao amin’ny herinandro ho avy io ny fijerena ifotony ny mahakasika izany», hoy ihany ny minisitra.

HNA