Fanombohan’ny fanafihana – Dahalo 11 lavon’ny tafika manokana any Atsimo

Tanàna roa : Ankarampotsy sy Andranovory, samy ao amin’ny kaominina Ambanivohitr’i Eloty, any amin’ny distrikan’Amboasary Atsimo no nanombohan’ireo vondron-tafika manokana, nalefa hihaza ireo dahalo, ny fanafihan’izy ireo, omaly alatsinainy.

Raha ny fampitam-baovao avy amin’ny minisiteran’ny Fifandraisana dia “dahalo 11 no maty tamin’izany”. Andian-dahalo manodidina ny 70 voalaza fa anisan’ny mpiara-dia amin-dRemenabila no nambaran’ny loharanom-baovao fa tao amin’ireo tanàna ireo, izay voalaza ihany koa fa efa avy nonenan-dRemenabila.

Ny fampitam-baovao avy amin’ny minisiteran’ny Fifandraisana ihany no nitatitra fa “nizara roa ireo andian-tafika ka ny iray notarihan’ny kolonely Lylison de René no nanafika tao Andranovory raha ny andian-tafika avy amin’ny CFS (Commandement des Formations Spécialisées), notarihin’ny lietnà- kolonely Marolia kosa no nitarika ny fanafihana tao Ankarampotsy».

Nampiasaina hatramin’ny helikoptera tamin’ity fanafihana ity izay naharitra ora iray mahery. “Dahalo iray no maty tao Ankarampotsy ary 10 kosa no voatifitry ny mpitandro filaminana tao Andranovory”, hoy ihany ny fampitam-baovao ofisialy.

Manamboninahitra iray any Betroka no nanamafy fa “tsy nitsitsy tamin’ny fitifirana ireo mpitandro ny filaminana noho ireo dahalo namaly tifitra ihany koa”. “Nampiasaina hatramin’ny fitaovam-piadiana mahery vaika toy ny lance-roquette”, hoy ihany ity farany.

Bokin’omby marobe efa misy fitombokase nefa tsy mbola misy anaran’omby miampy kara-panondro tsy mbola misy anarana ihany koa no anisan’ny hita tao amin’ilay tanàna niaraka tamin’ny basim-borona sy »kalacknikov » 1, raha ny voalazan’ny tatitra ofisialy hatrany.

Faralala

Fisamborana isan’andro

Isan’andro dia misy olona voasambotra hatrany any Betroka, raha ny voalazan’ny loharanom-baovao any an-toerana. Olona am-polony no efa voasambotra ary voarohirohy ho miray tendro amin-dRemenabila. Ny roa tamin’ireo no nosamborina omaly tao Betroka.

Mikasika an’Itokanono sy Ednat Georgial, ilay lehilahy 38 taona nosamborina tany Midongy Atsimo ny zoma teo, izay voalaza fa tanan-kavanan-dRemenabila dia fantatra fa anio izy ireo no kasaina hatolotra ny Fitsarana ao Betroka.

«Nitantara ny fanafihana maro niarahany tamin-dRemenabila izy tamin’ny famotorana natao taminy. Maro tamin’ireo zavatra notantarainy no nifandray tamin’ny fakana am-bavany an’ireo olona hafa efa natao famotorana teto aminay», hoy ny filazan’ireo mpanao famotorana any Betroka.

1 Fanehoan-kevitra

Lahatsoratra hafaMiverena @ pejy fandraisana

	Antalaha – Efa fantapantatra ny tompon’ ireo andramena tratra Mihamazava ny lalana mizotra mankany amin’ny tompon’ireo andramena miisa 2 294, tratra tao Ranotsara, tany amin’ny moron-dranomasina, tao Antalaha, ny zoma lasa teo. Voalaza fa mpandraharaha ao an-toerana ihany izy io. “Isan’ireo mpandraharaha nanao fanambarana tamin’ireny fotoana nangatahana ny fanaovana fanambaràna ny tahirina andramena eo an-tanany ireny ireo mpandraharaha ireo. Herinandro vitsivitsy izay, raha ny vaovao azonay, no nanao fangatahana ny hamindrana toerana ireo hazo ireo izy ireo. Fangatahana izay nokasain’izy ireo halefa eny anivon’ ny fiadidiana ny Praiminisitra, eny

	Fanafihan-jiolahy tao Betroka – Fifampitifirana adiny telo nahafatesana dahalo dimy sy olon-tsotra telo Naharitra adiny telo ny fifampitifirana tamin’ny dahalo sy ny zandary tany Befotaka ny alarobia 8 mey teo. Nanomboka tamin’ny 2 ora tolakandro ka hatramin’ny 5 ora hariva dia tsy nahenoana afa-tsy feom-basy tao amin’ny tanàna iray antsoina hoe Ambiatoka. Dahalo dimy sy olona telo avy amin’ny fokonolona no maty tamin’izany. Raha ny fantatra dia dahalo avy nanafika tokantrano telo tao Betaingisy ao amin’ny fokontany Anakoty, kaominina ambanivohitr’i Beharena ireo dahalo ireo, ka omby an-jatony no lasan’ izy ireo tamin’izany. « Dahalo an-jatony nirongo basim-borona 60 mahery teo ho eo sy fitaovam-piadiana hafa no nanafika », hoy ny tatitra azo avy eo anivon’ ny zandary any an-toerana. « Raha vao nahazo fampandrenesana mikasika io fanafihana io ny zandary tao Befotaka dia nandefa zandary nanampy ny fokonolona hiambina ny kizo tao Ambiatoka, toerana nitrangan’ny fifampitifirana. Tokony ho tamin’ny 2 ora hariva ireo dahalo no nandalo teo amin’io kizo io, ka raha vao nahita ireo mpiambina izy ireo dia nanao tifitra variraraka. Tamin’izany no nahafaty ny telo tamin’ireo fokonolona. Namaly koa tetsy ankilan’izay ny zandary ka lavo ny dimy tamin’ireo dahalo », hoy ihany ny tatitra avy tany an-toerana.

	Asan-dahalo – Polisy iray sy olon-tsotra voatifitra, omby 30 najifa Polisy iray sy olon-tsotra iray mpanara-dia no naratra mafy voatifitry ny dahalo, tao Ambongabe any amin’ny Kaominina Tsiroanomandidy, ny 8 mey teo tokony ho tamin’ny 10 ora alina. Dahalo maromaro izy ireo no niaraka nangalatra omby 30 izay fananana kaomisera misotro ronono. « Nirongo basim-borona izy ireo sady nitondra fitaovam-piadiana hafa », hoy ny tatitra avy amin’ny zandarimaria. « Raha vao nahita ireo mpanara-dia ireo dahalo dia nitifitra avy hatrany ka nahavoa ny iray tamin’ireo fokonolona. Ilay polisy kosa indray dia nanao sakana teo amin’ny arabe ary sendra ireo dahalo nandalo teo ka notifirin’izy ireo ihany koa », hoy ihany ny zandary avy ao Tsiroanomandidy. « Nisy jiro nirehitra teo amin’ny toerana nisy ireo polisy ireo ka avy hatrany dia hitan’ireo dahalo. Miala 20 metatra amin’ny toerana itobiany no nitrangan’io voina io », araka ny voalaza hatrany. Rehefa nahazo antso ny zandary tany Tsiroanomandidy dia nandefa zandary roa hanampy ireo fokonolona. Mbola mitohy ny fanarahan-dia an’ ireo olon-dratsy amin’ izao fotoana izao. H.R

	Antanifotsy – Olona iray ahiana ho mpanakan-dalana voasambotra Nivadika ny rasa! Ireo olona saika hanakana taksiborosy avy any Toliara ho aty an-drenivohitra teo Antanifotsy indray no nitsoaka rehefa nivoaka tao anaty fiara ireo mpandeha omaly vao maraimbe tokony ho tamin’ny 4 ora. « Nitondra fiara tsy mataho-dalana marika Nissan Hardbody ireo jiolahy tamin’izany. Nentin’ireo namany nitsoaka ilay fiara raha vao nivoaka ireo tao anaty fiara mpitatitra, ka ny mpamily indray no tavela teo ary noraisim-potsiny », hoy ny tatitra voaray avy eo anivon’ny zandary any an-toerana. « Noraisina avy hatrany ny fepetra ka niantso ny teo anivon’ny « centre immatriculateur » taty Antananarivo ireo mpitandro ny filaminana tany an-toerana mba hahafantarana ny tompon’io fiara io », hoy ihany ny tatitra. Ny zandary sy ny polisy avy ao amin’ny borigadin’Antanifotsy no mandray an-tanana ity raharaha ity. H.R

	Korontana any Mananara – Olona dimy voasambotra, nahantona ny kaomisarian’ny polisy Milamindamin-dratsy ny faritr’i Mananara Avaratra, omaly taorian’ilay fitokonana nahafaty olona tany an-toerana ny sabotsy hariva teo. Olona dimy no voasambotry ny polisy omaly raha nanakorontana tao amin’ny seranam-piaramanidina. Nisy fiaramanidina tonga tany an-toerana nitondra ireo mpiasan’ny Jirama voatondro hanamboatra ireo fitaovana nisy nandoro. « Raha vao saika hipetraka teo amin’ny seranana anefa ilay fiaramanidina dia nisy andian’olona nanakana tamin’ny alalan’ny fandoroana kodiarana ka voatery nitodi-doha niverina. Niroso tamin’ny fisamborana ny polisy ka olona dimy no tra-tehaka tamin’izany », hoy ny tale jeneralin’ny polisim-pirenena, ny Contrôleur général de police Rakotondratsima Désiré Johnson. . Etsy andanin’izay dia nahantona aloha ny asan’ny kaomisarian’ny polisy any an-toerana. « Mbola ho hita eo na hosoloina na tsia ireo polisy miasa ao amin’io kaomisaria io », hoy ihany ny tale jeneralin’ny polisy. Efa tonga any an-toerana aloha ireo polisy avy ao Fenoarivo atsinanana, Toamasina ary Maroantsetra. Miisa eo amin’ny 25 eo izy ireo, raha ny fanazavan’ny tompon’andraikitra. Nandray fepetra manokana tsy fahazoana mivezivezy amin’ny alina ihany koa ny lehiben’ny distrika any an-toerana omaly ary nihatra omaly hariva ihany izany. H.R

Hijery hafa