AO RAHA Gazety Malagasy Online

Raharaham-pifidianana – Mananontanona ny fanilihana ireo kandidà niara-nihosona tamin-dRajoelina

Rijakely — Tue, 21 May 2013 06:19:38 +0000

Mbola asa mafy no miandry ny Filohan’ny Cenit, Beatrice Atallah

Mizotra mankany amin’ny fanesorana ireo kandidà tafiditra tao anatin’ny lisitr’ireo olon’ny Fahefana avon’ny tetezamita miisa 109 nosazian’ny Vondrona Afrikanina tsy handray anjara amin’ny fifidianana filoham-pirenena ny tolo-kevitra vaovao ho famahana ny olana manodidina ireo kandidà amin’ny fifidinana Filoham-pirenena.

Tsilian-tsofina no nahafantarana fa isan’ny nametraka ho tambin’ny fisintonan’ny firotsahan-kofidiany ny hanilihana ihany koa ireo rehetra « voasazy » ireo ny Filohan’ny tetezamita, Andry Rajoelina. Ity farany izay voalaza fa nanaovan’ny minisitry ny Raharaham-bahiny frantsay, Laurent Fabius, tsindry manokana ny amin’izay tokony hialany an-daharana amin’ ny fifidianana Filoham-pirenena izay. Etsy andaniny, dia voalaza fa tsy mankasitraka ny firotsahan’i Lalao Ravalomanana ihany koa ny filoha mpanorina ny antoko Tgv.

Hatramin’ny omaly aloha dia mbola tsy nahazoam-baovao mazava mihitsy ny momba ny fanapahan-kevitra horaisin’ny Cenit, taorian’ny fiafaran’ilay fe-potoana 48 ora nomen’ny filohany ireo kandidà ho filoham-pirenena mba hifanaraka sy hampitovy tadin-dokanga. Mbola baraingo ihany koa na nalefa natonta any Copenhague ihany ny biletà tokana na tsia. Ny filoha lefitry ny Cenit, Mamy Ralaiariliva, omaly no nanamafy fa «efa misy tokoa ny lamina vaovao mandeha ankehitriny saingy mbola ho hita eo izay ho tohin’ny raharaha».

Fihaonana maro

Araka ny fampitam-baovao avy amin’ny Cenit ihany dia hipaka hatrany Frantsa ny dian’ny Filohan’ ny Cenit, Béatrice Atallah, izay hifototra amin’ny fandresen-dahatra ny iraisam-pirenena tsy hanapaka ny famatsiam-bolan’ny fifidianana indrindra fa ny mahakasika ny fanontana ny biletà tokana.

Ny alahady teo no niala teto Madagasikara nihazo an’i Etazonia i Béatrice Atallah. Hihaona aminy voalohany i Donald Yamamoto, tompon’ andraikitra ambony eo anivon’ny departemantan’ny fitondram-panjakana amerikanina ao Washington. Aorian’izany dia hisy ihany ny fanaovany tatitra mahakasika ny firosoan’ny raharaham-pifidianana amin’ireo tompon’andraikitry ny sampan-draharaha misahana ny raharaha politika eo anivon’ny Firenena Mikambana, ao New-York.
Aorian’ity diany ao Etazonia ity dia hihazo an’i Bruxelles, hihaona amin’ ireo tompon’andraikitra eo anivon’ny Vondrona Eoropeana indray ny filohan’ny Cenit. Avy eo dia ho any Frantsa hihaona amin’ny talen’ny sampan-draharaha misahana ny fifandraisana amin’ny vaomieran’ny Ranomasimbe Indianina eo anivon’ny minisiteran’ny Raharaham-bahiny frantsay.

«Hifototra amin’ny fanapahan-kevitra noraisin’ny Fitsarana manokana misahana ny raharaham-pifidianana (Ces) tamin’ny famoahana ny lisitry ofisialin’ireo kandidà hirotsaka amin’ny fifidianana Filoham-pirenena, ny 3 mey teo, ny resaka amin’io fihaonana io».

Mialohan’ny hiverenany eto Madagasikara ny 1 jona izao dia hisy ihany koa ny fihaonany amin’ny sekretera jeneralin’ny fianakaviam-ben’ny Frankofonia, Abdou Diouf.

Tapatapany

Rijakely — Tue, 21 May 2013 06:19:07 +0000

HODINIHINA FANINDROANY> Raha tsy misy ny fiovana dia hitohy ao anatin’ny Filankevitry ny governemanta anio ny
fandinihana ilay volavolan-dalàna mamariparitra ny fomba hitantanana ny tetezamita aorian’ny fametraham-pialan’ny Filohan’ny tetezamita, Andry Rajoelina. Volavolan-dalàna izay mbola miteraka adihevitra lalina eo anivon’ny rafitra mpanatanteraka.

Firotsan-kofidiana – Tsy hiverin-dalana intsony Ravalomanana mivady

Rijakely — Tue, 21 May 2013 06:18:16 +0000

Mbola nanamafy ny fanohanany ny firo-tsahan-kofidian’ny vadiny, Lalao Ravalomanana, amin’ny fifidianana filoham-pirenena indray ny Filoha teo aloha, Marc Ravalomanana. «Mijoro amin’ny fahamarinana isika, ary tsy misy mihitsy ny tsy maha ara-dalàna ny filatsahan’i Neny. Aza ny tatitra entin’ny sasany any no henoina ary aza atao safobemantsina toa ny filatsahan’ireo olona izay ao anatin’ireo 109 voasazy ireo izy», hoy ny filoha mpanorina ny orinasa Tiko, raha niditra mivantana, tetsy amin’ny kianjan’ i Magro, ny sabotsy teo. Tetsy an-kilan’izay dia nambaran’i Lalao Ravalomanana, ny sabotsy teo ihany koa fa «izy no hampody ny vadiny».

Nanomboka ny zoma lasa teo no nitety faritra maro teto an-drenivohitra ity vadin’ny Filoha teo aloha ity. Ny sabotsy teo dia nihazo an’Analamahitsy sy Ambohidratrimo ary nandalo teny Itaosy i Lalao Ravalomanana, taorian’ny niatrehany ny fotoam-pivavahana nataon’ireo mpitandrina mpitariky ny «Hetsiky ny mpitondra fivavahana», tetsy Antsahamanitra.

Hafatry ny Pentekosta – Niaiky ny fahasarotan’ny ampihavanana ny Ffkm

Rijakely — Tue, 21 May 2013 06:17:35 +0000

«Sarotra ary mbola dingana lavitr’ezaka ny fanatanterahana ny fampihavanana». Io no nisongadina tamin’ny hafatra nataon’ireo filoham-piangonana eo anivon’ny Fiombonan’ny Fiangonana Kristianina eto Madagasikara (Ffkm) ho an’ireo mpino
kristianina noho ny fankalazana ny fetin’ny Pentekosta.

Nanamafy izay fahasarotan’ny asan’izy ireo izay rahateo ny fiantsoan’ireo raiamandreny am-panahy mpitarika ny Ffkm ny mpino kristianina rehetra mba hitondra am-bavaka ny asan’izy ireo amin’ny fandaminana ny toe-draharaha politika eto amintsika.

Isan’ny notsindrian’izy ireo manokana tao anatin’ity fanambaràna ity hatrany ny fahavononan’ny Ffkm hanatanteraka ilay fihaonana an-tampony eo amin’ireo Filoham-pirenena teo aloha telo mirahalahy sy ny Filohan’ny tetezamita, Andry Rajoelina.
«Mila miaky heloka sy mifamela izy efatra mirahalahy mianaka mba tena hisian’ny fampihavanana», araka ny voalaza ao anatin’ ity fanambaràna nataon’izy ireo ny alahadin’ny Pentekosta teo ity. Hatreto aloha dia mbola tsy fantatra ny fandaharam-potoana raikitra hanatanterahan’ny Ffkm izay voarakitry ny fehin-kevitra nivoitra tamin’ny fihaonam-be teny amin’ny ivon-toem-pivoriana iraisam-pirenena eny Ivato.

Dia tany Nosy Be – Mbola manantena ny hijanona ela eo amin’ny toerany Rajoelina

Rijakely — Tue, 21 May 2013 06:15:45 +0000

Nirara-kompana ny fampanantenan’ny Filohan’ny tetezamita, Andry Rajoelina, izay isan’ireo kandidà amin’ny fifidianana Filoham-pirenena, nandritra ny fitsidihana nataony tany Nosy-Be, ny sabotsy teo.

Na dia ninia tsy niresaka politika mivantana aza ny tenany tamin’ny lahateny nataony dia midika ho fahavonona hanohy ny dia ny fampanantenany. Isan’izany ny hanomezana lanja manokana ilay hetsika ara-kolotsaina »Donia » fanao any an-toerana.
«Hatao makotrokotroka sy re laza maneran-tany mihitsy ny andiany faha-21 amin’ny taona ho avy», araka ny nambaran’i Andry Rajoelina.

«Amin’ny taona ho avy dia hataontsika avo folo heny ny fikarakarana ny Donia eto Nosy-Be. Hasiana filaharam-be toy ireny fahita any Brésil ireny. Homena akanjo, homena fitaovana ireo mpikarakara dia hasiana mpanakanto maro hatao tonga eto Nosy be. Hatao ren-tany ren-danitra fa malaza be izany Donia izany», hoy izy nilokaloka tamin’ireo mponin’i Nosy-Be.
Tetsy an-daniny dia namaly ny fangatahana renim-pianakaviana iray ny tokony hanaovana tobin’ny mpamonjy voina ihany koa ny Filohan’ny tetezamita. Tsy nametra fotoana anefa izy na dia dodona aza ireo mponina nangataka izany taminy. Nametraka karazana fepetra mihitsy aza izy raha nilaza fa raha “miara-miasa aminy ny filohan’ny delegasiona manokan’ny kaominin’i Nosy-Be dia hatao izany”. Nanao fanamby ihany koa izy fa “hatao voalohany aty amin’ny Ranomasimbe Indianina i Nosy-Be eo amin’ny lafiny fizahantany”.

Raha ny vinan’i Andry Rajoelina, araka ireo fanomezan-toky nataony ireo, dia mbola ho eo amin’ ny fitondrana ny tenany, farafaharatsin’ny hatramin’ny taona ho avy. Ny tsy voafaritra dia ny hoe: amin’ny maha Filohan’ny tetezamita azy ve ny hijanonany eo amin’izay fotoana izay sa kosa efa hisalotra ny anaram-boninahitra Filoham-pirenena?

Ranaivoson Faniry

Seranana afaka handray Air bus A380

Isan’ny anton-dian’ny Filohan’ny Tetezamita tany Nosy-Be, ankoatra ny fanatrehana ny Donia, ny fitokanana ny asa fanitarana ny seranam-piaramanidina any an-toerana,. Manomboka izao dia afaka handray irony fiaramanidina lehibe Airbus A340 na Boeing 777 irony i Nosy Be. Mitenti-bidy 5,3 miliara ariary ny fandaniana tamin’ity asa fanamboarana ity. Tsy mijanona eo anefa ny fanitarana fa dingana voalohany ihany izay vita izay. “Mitohy ny asa ka atsy aoriana kely dia afaka handray Airbus A380 ity seranam-piaramanidina ity. Raha sokajy C no nisy azy dia efa lasa D izany ankehitriny, izany hoe izy no faharoa aorian’ Antananarivo amin’ny seranana iraisam-pirenena”, hoy kosa Andrianiaina Jean Germain, tale teknikan’ny Adema.

Faran’ny herinandron’ny Pentekosta – Olona telo maty, 264 naiditra hôpitaly, enina toran’ny toaka

Rijakely — Tue, 21 May 2013 06:10:53 +0000

Tsy ilaozan-tsampona eny anivon’ny fiarahamonina eny rehefa andro fety toy izao

Ankizilahikely iray no maty an-drano, tetsy Ankadikely Ilafy, ny alahadin’ny Pentekosta teo. Tonga teny an-toerana mpamonjy voina saingy efa tafavoakan’ ny fokonolona ilay vatana mangatsiaka.

Ramatoa iray ihany koa no fantatra fa maty no-faohin’ny kamiao, tany Ambohidratrimo, ny sabotsy teo tokony ho tamin’ny 4 ora sy sasany maraina.

Ankoatra ireo dia razana tovolahy iray 23 taona ihany koa no nisy nanatitra teny amin’ny hôpitaly Joseph Ravoahangy Andrianavalona. Tsy mbola voafa-ritra izay antony nitarika ny fahafatesany.

Raha ny tarehimarika avy eo anivon’ity hôpitaly ity ihany dia nisy olona telo nodimandry tao, ny sabotsy teo.
Amin’ny ankapobeny aloha, raha ny tarehimarika mahakasika ireo loza niseho nandritra ny fetin’ny Pentekosta dia hita ho nihena raha nitaha tamin’ny fetin’ny Paska.

Raha nahatratra 380 ireo voatery nomena fitsaboana teo anivon’ity hôpitaly lehibe indrindra eto Madagasikara ity tamin’ny fetin’ny Paska dia 264 kosa izy ireo tamin’ity fetin’ny Pentekosta ity.

Tarehimarika voaangona nanomboka ny sabotsy 18 mey teo io. Nandritra ny tontolo andron’ny fetin’ny Pentekosta kosa dia 56 no isan’ireo marary naiditra tao amin’ity hôpitaly ity ihany.

« Ratra vokatry ny adiady no tena maro tamin’ ireo olona niditra tato aminay. Manaraka azy eo kosa ny lozam-pifamoivoizana izay azo lazaina ho nihena tamin’ity fety ity », hoy ny nambaran’ny mpitsabo iray eo anivon’ity hôpitaly ity.
Raha ny teo anivon’ny Hjra hatrany dia enina ireo tsy nahatsiaro tena noho ny toaka notsaboina tao, ka lehilahy ny 5 tamin’ireo ary vehivavy kosa ny iray.

Haja Randrianantoandro

«Alain-drony»

Rijakely — Tue, 21 May 2013 06:10:51 +0000

Sao dia mba ny fianakaviam-be iraisam-pirenena aza no tena «foza orana» ara-bakiteny, manoloana ity toe-draharaham-pirenena tsy mety milamina eto Madagasikara ity? Tokony hotadidiana sy halentika an-tsaina tsara mantsy fa ny iraisam-pirenena (indrindra ny Sadc) no tena tompo-marika tamin’ny fitadiavana ny vahaolana hamahana ny krizy malagasy, nanomboka tamin’ny Maputo I, ny taona 2009.

Mila ampatsiahivina eto ve ny fampihaonana imbetsaka ireo mpikatroka politika, indrindra ireo tena mpifanditra tamin’ ity raharaha malagasy ity, nanomboka tamin’io fifanarahana Maputo I io? Santatry ny fanantenana nitsilopilopy saingy tsy nety niredareda ny tatsy an-drenivohitr’i Mozambika. Asa na fifandrifian-javatra na ahoana fa mbola teratany Mozambikana ihany koa no nitarika hatrany ny iraka fanelanelanana ireo andaniny tsy nety nifanaraka tamin’ny famoahana an’i Madagasikara amin’izao savorovoro politika izao.

Mody nifanaraka tokoa ny rehetra tamin’ireny fotoana ireny, na Maputo II, na Addis Abeba, na Pretoria, na Nosy Desroches… Nanosika sy nampirisika hatrany ny samy Malagasy hitady ka hahita ny marimaritra iraisana ry zareo vahiny. Na Frantsay, na Amerikana, na Eoropeana, na Afrikanina, dia fandre sy famaky matetika avy amin’izy ireo ilay hoe: «midera ny ezaka efa vita (isaky ny mba misy dingana kely vita tamin’ny fampiharana ireo voalaza tao anatin’ilay tondrozotra nifaneken’ny rehetra fa hirosoana mankany amin’ny fifidianana) fa saingy ampirisihana hatrany ireo mpisehatra malagasy rehetra mba hahay hifanaraka».

Talanjona anefa ny rehetra rehefa tsy nanisy olana (na tokony hametraka ahiahy tamin’ny fomba tsy dia nadio loatra teo amin’ny resaka fotoana nametrahana antontan-taratasy filatsahan-kofidiana aza) ireo tena mpifanandrina politika teto amin’ny firenena raha samy ho kandidà na Rajoelina, na Ratsiraka na ramatoa Ravalomanana, satria ny fianakaviambe iraisam-pirenena indray no toa sarotiny alohan’ny tompony! Tsy hanampy ara-bola amin’ny fifidianana indray, hono, ry zareo raha ireo no mbola misisika milatsaka hofidiana eo. Moa va tsy mampahatsiaro ilay fomba ratsin’ny ankizy fahiny, fa mampifilafila ny tompom-baolina, ka rehefa tsy mifanaraka aminy ny mpilalao dia hoentiny mody ny baolina. Aleo halainy rony any ny azy, isika angaha moa tsy efa zatra nikaro-bahaolana tamin’ ny fomba malagasy, avoahy ny baolina «sachet» e!

Arira

Fisolokiana Banky foibe – 13 lahy saika haka vola 20 miliara Ar saron’ny polisy

Rijakely — Tue, 21 May 2013 06:10:40 +0000

Olona 13 voarohirohy ho nikasa haka vola 20 miliara Ar tao amin’ny Banky Foibe, etsy Antaninarenina, no saron’ny polisy ny zoma tolakandro teo, tokony ho tamin’ny 2 ora sy sasany.

« Nitondra fiara 4×4 dimy izy ireo ka niditra tsiroaroa sy tsitelotelo tao amin’ny Banky foibe. Rehefa haka volabe sahala amin’izany mantsy ao amin’ ny banky dia tsy maintsy miaraka tsiroaroa na tsitelotelo satria tsy maintsy misy mibata ireo vola rehefa avoaka », hoy ny loharanom-baovao iray avy eo anivon’ity banky ity.

« Rehefa tafiditra tao amin’ny banky izy ireo dia nizara dimy ary samy nitondra taratasim-bola 4 miliara ariary avy. Taratasim-bola sandoka avy ao amin’ny Tahirim-bolam-panjakana no saika nampiasain’ireo olona ireo tamin’ity fikasan-dratsiny ity. Vao tonga teo amin’ny toerana fakam-bola dia fantatra fa sandoka ireo taratasy nokasaina hakana izany ka nampanenoana ny fanairana. Ny tena nahavariana tamin’ireo taratasim-bola sandoka ireo dia sonia ara-dalàna avy eo anivon’ny Tahirim-bolam-panjakana no nangalarin’izy ireo », hoy hatrany ilay loharanom-baovao.

Tonga teny an-toerana nisambotra ireo olona ireo ny avy amin’ny polisy ara-toekarena ka tratra avokoa izy ireo niaraka tamin’ireo dimy lahy mpamilin’ireo fiara 4×4.

Mbola tazomina etsy amin’ny biraon’ny polisy mi-sahana ny ady heloka bevava ireo voarohirohy rehetra amin’izao fotoana izao.

H.R

Fifanintsanana

Rijakely — Tue, 21 May 2013 06:09:31 +0000

Tsy manaiky ny hanaisotra mora foana ny filatsahan-kofidiany ny Filohan’ny tetezamita, Andry Rajoelina. Voalaza fa mametraka fepetra ny amin’ny tokony hanilihana ihany koa an’i Lalao Ravalomanana sy i Didier Ratsiraka miaraka amin’ireo rehetra tafiditra ao anatin’ilay lisitr’ireo olon’ny Fahefana avon’ny tetezamita voasazin’ny Vondrona Afrikanina. Raha izay no tontosa dia mba hihena izay tsy izy ny isan’ireo kandidà. Raha mbola hojerena akaiky ihany koa ny momba ireo kandidà hafa avy any ivelany dia ho vitsy ihany sisa no tavela. Mba hanamora ny asan’ireo mpifidy ihany aloha izay amin’ny lafiny iray. Tsy ho vita am-bava fotsiny ihany anefa izany rehetra izany fa tsy maintsy mbola ho ady varotra lavareny indray. Toa tazanina akaiky ilay datim-pifidianana nefa manalavitra hatrany. Tsy maintsy mbola hisy ihany ny fanalavam-potoana raha ny fizotry ny toe-draharaha, raha tsy hoe angaha ny lalao mihitsy indray no haverina tanteraka.

Sombiny

Rijakely — Tue, 21 May 2013 06:09:04 +0000

SAVOROVORO> Mpivavaka dimy no naratra tany Soanierana Ivongo, vokatry ny savorovoro nateraky ny fanakatonana fiangonana, nataon’ny vaditany sy ny mpitandro ny filaminana ny alahady teo. Ny zoma no nakatona teo imason’ireo tompon’andraikitry ny fiangonana ity toeram-pivavahana ity, ny alahady anefa dia tonga teny indray ireo mpivavaka sasany niaraka tamin’ny tompon’ andraiki-panjakana iray nanokatra ilay fiangonana. Raikitra ny savorovoro ka nitarika tamin’ny faharatran’ireo olona dimy ireo.

LOZAM-PIFAMOIVOIZANA> Lehilahy telo nandeha an-tongotra no naratra mafy nofaohin’ny fiara R5 iray, tetsy Ankorondrano omaly hariva tokony ho tamin’ny 7 ora sy sasany. Avy nandona fiara Mazda kely iray ity fiara ity vao nandona ireo mpandeha an-tongotra ireo. Nentina avy hatrany teny amin’ny hôpitaly Joseph Ravoahangy Andrianavalona ireo naratra ireo nomena fitsaboana.

Ambatomanoina – Rangahy 43 taona kilan’ny afo irery tao an-tranony

Rijakely — Tue, 21 May 2013 06:07:05 +0000

Namoizana ain’ olona ny hain-trano nitranga tao amin’ny fokontany Ambatomanoina, kaominina Ambatomanoina, distrikan’Avaradrano, ny alakamisy lasa teo. Rangahy iray 43 taona no maty kilan’ny afo tanteraka.

Voalazan’ny tatitry ny zandarimaria fa nihidy aman-trano irery ity niharam-boina ity. Ny fanadihadiana nataon’ny mpitandro ny filaminana ihany koa no nahafantarana fa avy nisotrosotro ilay rangahy. Tsy voafaritra mazava hatreto ny antony nahatonga ny loza fa anisan’ny tombatombana ny hoe afon-tsigara niitatra.

Efa nananika ny tafo ny afo vao hitan’ny teo amin’ ny manodidina. Levona tsy nisy noraisina ireo entana rehetra tao an-trano. Ny fokonolona tao an-toerana no nanampy tamin’ny famonoana ny afo.

Maminiaina Andri

Fiarahamonina – Vary notsimponina no niatrehan’ireo sahirana ny Pantekosta

Rijakely — Tue, 21 May 2013 06:04:12 +0000

Ankizy mbola tokony hianatra no efa zatra mitady sy mamelona ny ray aman-dreny sahady

Mifamahofaho ny fiainana. Samy manana ny anjarany tokoa ny olona. Maro amin’ny olona manan-katao no efa niandrandra sy niomana tamin’ny fetin’ ny Pantekosta. Isan’ireny ny fiatrehana ny sakafo miavaka amin’ny andavanandro, ny fanomanana ny hoenti-manana amin’ny fitsangan- tsanganana.

Tsy mba toa izany kosa anefa ny fiainan’ ireo olona sahirana. Vary notsimponina manerana ny tsena no mba niandrandran’ izy ireo niatrehana izany fety izany, araka ny hita tetsy Anosibe. Vao maraina tamin’ny sabotsy teo dia efa tazana manerana ny tsenan’Anosibe ireo ankizy kely miandahy miambavy miaraka amin’ny kitapo babena sy fandraofam-pako ary kifafa kely
entina mitsimpona vary manta. Tetezin’izy ireo avokoa ny toeram-pivarotana rehetra mivarotra vary manta.

Nahaontsa olona maro ny mahita ireto zaza ireto mamafa ny vary miparitaka, raofina amin’ny fandraofam-pako dia ampidirina anatin’ny kitapo. Fahafinaretana sady mahafinaritra ireo ankizy kosa anefa izany ary toy ny kilalao ny fanaovany azy.

“Efa tamin’ny alarobia izahay no nanomboka nitsimpona mba hahafahana mahazo betsaka hiatrehana ny fety”, hoy ny sasany tamin’ireo ankizy. Nambaran’izy ireo hatrany fa nahangona hatramin’ny vary 15 kapoaka isan’andro ny iray amin’izy ireo.

“Rehefa tonga any an-trano dia diovin’ny mamanay ny vary hialan’ny vovoka. Rehefa betsaka no azo dia amidy hividianana laoka”, hoy ireo ankizy nanontaniana. Hafaliana ny azy ireo satria dia mba nanao fety toy ny olona rehetra ihany koa.

Nangonin’i Lilia Rajaonah

Karaman’ny tsy miankina – Mbola tsy nisy didim-panjakana ilay fampiakarana 8%

Rijakely — Tue, 21 May 2013 06:03:00 +0000

Mbola tsy nivoaka ny didim-panjakana manamafy ny fampiharana ilay fampiakarana ny karaman’ireo mpiasan’ny sehatra tsy miankina. Araka ny fanazavan’ny teo anivon’ny minisiteran’ny Asam-panjakana sy ny lalàna sosialy dia nisy antontan-taratasy nangatahan’ny teo anivon’ny Filankevitry ny governementa, tamin’iny herinandro lasa iny, ka izay no tsy mbola nivoahan’ny didim-panjakana manamafy ny fampiharana iny taha fampiakarana 8% iny.

“Efa noentina teo anivon’ny Filankevitry ny governemanta tamin’ny herinandro mantsy izy iny. Efa nomena ny minisitra ireo taratasy nangatahana ireo ka heverina fa anio ihany dia hoentina eo amin’ ny Filankevitra indray izany”, hoy Ramanitriniony Samuelson, tale jeneralin’ny Asa sy ny Lalàna sosialy eo anivon’ity minisitera ity.

Na izany aza anefa dia efa nisy ireo orinasa nampiakatra ny karaman’ny mpiasany. Ao ihany koa ireo hiandry mihitsy ny fivoahan’io didim-panjakana io. Nanamafy ny sendikan’ireo mpiasa fa afaka mametraka fitarainana eny anivon’ny sampana
mpanara-maso ny asa izay tsy mampihatra ny fampiakarana.

Minisiteran’ny fahasalamana – Nampitandrina momba ireo dokam-barotra amin’ ny fitaovana manasitrana

Rijakely — Tue, 21 May 2013 06:02:06 +0000

Dr Ndahimananjara Johanita, minisitry ny Fahasalamana

Tsy ara-dalàna. Nampitandrina ny mpanjifa ny minisitry ny Fahasalamana, Dr Ndahimananjara Johanita, manoloana ny dokam-barotra sasany momba ireo fitaovana ambara ho manasitrana aretina, miverimberina amin’ny haino aman-jery. «Voararan’ ny lalàna iray nivoaka tamin’ny taona 2001 ny fanaovana dokam-barotra momba ny fitaovana samihafa, ambara fa azo hitsaboana ny olombelona, toy izay hita tao ho ao, lazaina ho mitsabo tosi-dra na homamiadana, na mampihena ny habetsahan’ny menaka anaty ny tenan’ny olona na koa mitsabo diabeta sy ny maso ary ny «sinusite», ohatra», hoy ny minisitry ny Fahasalamana.

«Tsy nanome fahazoan-dalana hivarotana ireny fitaovana ireny ny minisiteran’ny Fahasalamana satria tsy ananany porofo ara-tsiantifika. Tandremo tsy ho sodokan’ireny dokam-barotra ireny fa lahitokana ny aina», hoy ihany izy.

Fiahiana sosialy – Mba hahazo fisotroan-dronono ihany koa ireo tantsaha

Rijakely — Tue, 21 May 2013 06:01:16 +0000

Ela ny ela ka ho isan’ireo hahazo tombontsoa amin’ny fiahiana sosialy omen’ny CnaPS na ny Tahirim-pirenena momba ny fiahiana sosialy ihany koa ny tantsaha. Nanao sonia fifanarahana ny CnaPS sy ny Tranoben’ny Tantsaha, tamin’ny faran’ny herinandro teo, fa manomboka izao, dia ho afaka mirotsaka ho mpikambana amin’ity rafitra ity koa ny Tantsaha (mpamboly, mpiompy sy mpanjono).

Tsy ny mpiasa na mpikarama amin’ny orinasa irery intsony no ho afaka miditra ho mpikambana sy mpahazo tombontsoa toy ny fisotroan-dronono na tambiny raha sanatria ka marary am-perin’asa, na mahazo tambiny raha tera-bao.

« Hahazo tombontsoa avy amin’ny CnaPS koa manomboka izao ny tantsaha, izay 85% ny Malagasy. Hahazo fisotroan- dronono avokoa ny tantsaha sy ny manao asa miahy tena», hoy Arizaka Rabekoto Raoul, tale jeneralin’ity orinasa misahana ny fiahiana sosialy ity. RSI (régime social des indépendants) na rafi-piahiana sosialy ho an’ny tsy miankina no anarana nomena azy. Niara-nanao sonia taminy ny fifanarahana Andrianjafimahatratra Solofo, filohan’ny filankevi-pitondran’ny Tranoben’ny Tantsaha.

Efa voarakitra ao amin’ny lalàna 94 026, tamin’ny 17 novambra 1994, ny tokony hanome- zana ny mpiasa sy mpikarama rehetra fiahiana sosialy eto amin’ny firenena fa izao vao niroso ho an’ny Tantsaha. Maharitra telo taona ny fifanarahana natao ary mbola azo tohizina.

Barphil Andriantsiferanarivo

Fanabeazana – Nahazo tambajotra “internet” ny tanoran’ i Soavinandriana Itasy

Rijakely — Tue, 21 May 2013 05:59:04 +0000

Afaka manovo fahalalana amin’ny alalan’ny teknolojia vaovao indray ireo mpianatra ao Soavinandriana. Nahazo solosaina efatra, miaraka amin’ny “connexion internet” haingam-pandeha izy ireo.

Fiaraha-miasa teo amin’ny fikambanana Fitia sy ny orinasa Orange no nahafahana nanao izany. Ity farany ihany koa izay nametraka “coach multimedia” any an-toerana mba hanoro sy hampianatra ny ankizy amin’ny fampiasana ny “internet”.

“Ianareo tanora no ho avin’ny firenena ka rariny raha ampiana. Iray minitra monja dia afaka mifanerasera eran’izao tontolo izao ianareo. Mampivelatra ny mpianatra io “internet” io. Raiso an-tanana ny ho avinareo satria isika miaraka no fampandrosoana”, araka ny fampaherezana nampitondrain’i Mialy Rajoelina, filohan’ny fikambanana Fitia, ireo mpiara-miasa aminy. Faritra faha-19 nahazo ny “internet” i Soavinandriana.

Alatsinain’ny Pentekosta – Malaina maka fahazoan-dalana manokana ireo fiara mpitatitra

Rijakely — Tue, 21 May 2013 05:58:28 +0000

Tsy nahasakana ny olona tamin’ny fandehanana nitsangantsangana ny fahasahiranana sy ny toetr’andro. Vao maraina mantsy dia efa zara raha nisy ny taksibe niasa tamin’ny zotra nisy azy. Lasa nanao fitaterana manokana avokoa ny ankamaroan’izy ireo.

Vao maraina ihany koa omaly dia efa tazana sy tomefy olona mandeha an-tongotra ny arabe rehetra ho an’ireo tsy naka fiara manokana. Fotoana nampandeha ny tsenan’ ireo fiara fitaterana ny omaly. Ny teo anivon’ny minisiteran’ny Fitaterana anefa nilaza fa vitsy dia vitsy no naka taratasy fahazoan-dalana raha mitaha ny tamin’ny isan-taona. “Nihena hatramin’ny 25 % izany raha miohatra amin’ ny hatramin’izay”, raha ny antontanisa avy amin’ io minisitera io.

“Ar 10 000 no maka ny fahazoan-dalana nefa toerana akaiky no alehanay. Mbola somary mandany fotoana koa anefa ny maka azy io fa tsy vita eo no ho eo. Izahay ihany koa tsy mijanona any amin’ilay toerana fa manatitra sy maka fotsiny dia miverina manao ny asa andavanandro ihany”, hoy ireo mpitatitra.

Tenisy « Coupe Davis » – Nijanona ho Vondrona III i Madagasikara

Rijakely — Tue, 21 May 2013 05:54:08 +0000

Tsy tafavoaka teo anatrehan’i Maraoka, teo amin’ ny dingan’ny manasa-dalana, ho an’ny Coupe Davis, faritra Afrika, ny ekipam-pirenena malagasy, ny sabotsy lasa teo, tany Ejypta. Niondrika tamin’ny alalan’ny isa 2 no ho 1 isika teo anatrehan’ity lohalaharan’ny vondrona A ity, izay nitazona antsika tsy hiala ao amin’ny vondrona III, amin’ny taona ho avy.

Tamin’ny alalan’ny seta 2 no ho 0 (6/2, 7/5) no nampiondrika an’i Jean Jacques Rakotohasy, izay nisedra ny faharesena voalohany ho azy, teo amin’ity lalao ity, teo amin’ny lalao voalohany ho an’io dingan’ny manasa-dalana io.

Resy tahaka izany ihany koa isika teo amin’ny olon-droa miaraka, izay niarahan’i Tony Rajaobelina sy Antso Rakotondramanga. Ity farany no mba nahita fandresena ho antsika teo amin’ny lalaon’olon-tokana faharoa. “Tena efa niady isika saingy angamba mbola misy ny tsy ampy kely ka heveriko fa tsy maintsy harenina amin’ny taona ho avy”, hoy i Ando Rasolomalala, mpilalao malagasy avy teto Madagasikara niatrika fanindroany ny Coupe Davis.

Azo heverina fa fisafidianana mpilalao no isan’ny tena nahatonga ny faharesena ho an’ireo solontena malagasy tamin’ity fifaninanana ity. Teo ihany koa anefa ny mety harerahana noho ny lalao intelo nifanesy notontosain’izy ireo, araka ny tombatomban’ ny avy eo anivon’ny federasiona malagasin’ny tenisy.

R.A

Kitran’ny mpamily – Tsy mbola resy mihitsy ny Taxi Tsimbazaza

Rijakely — Tue, 21 May 2013 05:53:24 +0000

Ny ekipan'ny Taxi Tsimbazaza izay tsy mitsaha-mandresy amin'ity fifaninanana eny Fort Duchesne ity

Tamin’ireo lalao efatra nataony, tsy mbola nisy naharesy ny ekipan’ny Taxi Tsimbazaza, mandray anjara amin’ilay “Grand tournoi taxi-foot”, atao isaky ny sabotsy, eny amin’ny kianjam-pasika, eny Fort Duchesne, izay kitra lalaovin’olona fito. Omby no loka amin’ity fifaninanana ity.

Isa 5 no ho 4 no nisarahan’i Taxi Tsimbazaza tamin’ny Taxi Anosibe ka anisan’ny lalao tena niady tamin’iny indray mitoraka iny. Azo antoka hiakatra ambonimbony hatrany amin’ity lalao ity ny avy eny Tsimbazaza. “Mbola misy ihany ny mampiasa mpikarama an’ady, na dia efa voararan’ny fitsipika nifanarahana aza. Rehefa azonay ny sarin’ireo mpilalao ka handalo sivana ny ekipa tsirairay, hisy ny fisavana ny karatra fahazoan-dalana mitondra fiarakaretsaka. Ho sahirana izay mbola mitady hanao hitsin-dalana ririnina”, hoy Randrianindrina John, mpandrindra ny fifaninanana.

Barphil Andriantsiferanarivo

Voka-dalao abotsy 18 mey

Taxi Ambohipo (4) # Taxi Total Analamahitsy (2)
Taxi Pochard (5) # Taxi Ravinala (1)
Taxi Cora Fc 3A # Taxi Poteau double (1)
Taxi Andranonahoatra (3) # Taxi Anosy (0)
Taxi Anosibe (4) # Taxi Tsimbazaza (5)
Taxi Antaninarenina (0) # Taxi Astazon (3)
Taxi Glacier (3) # Taxi Ouest Ambohijanahary (0)
Taxi Homi (1) # Taxi Cité Analamahitsy (5)
Taxi Ambohitsoa (3) # Fitaxi Gara (2)

Baolina kitra Analamanga – Voatanan’ny Cosfa ady sahala ny Masindahy Misely

Rijakely — Tue, 21 May 2013 05:52:45 +0000

Nitarika ny fidinan’ny AS Saint Michel Elgeco ho eo amin’ny laharana faharoa ny ady sahala samy tsy nitoko nisarahan’izy ireo tamin’ny Cosfa, ny sabotsy lasa teo, teny amin’ny kianjan’i Carion. Tsy afa-nanohitra ny sakana napetraky ny miaramila tamin’io fihaonana nanamarika ny andro faha-13 ho an’ny fiadiana ny ho tompondakan’Analamanga io ny ekipan’ny Masindahy Misely avy eny Amparibe.

Na izany aza anefa dia efa isan’ireo ekipa efatra hiatrika ny “Poule des AS”, izay hamaritana izay hisalotra ny anaram- boninahitra izy ireo aorian’ny andro faha-18. Ny AS Adema, izay nandresy ny Vesta Team, tamin’ny alalan’ny isa 4 no ho 2 izany no mitarika vonjimaika amin’izao.

Tsy nahatana ny fandresena efa azon’izy ireo, tao anatin’ny 88 minitra, ihany koa ny ekipan’ny Iarivo Football Club, tetsy Mahamasina raha nihaona tamin’ny Tana Formation, ny andron’ io sabotsy io. Efa nitarika tamin’ny alalan’ny isa 2 no ho 1 ireto avy ao amin’ny kaominina Antananarivo renivohitra ireto tamin’izany fe-potoana izany. Votsotra anefa izany fandresena izany noho ny tandrevaka nataon’i Jaoronono Bruno, izay vodilaharana, tamin’ ny fandraisan-tanana nataony tao anaty faritra tsy azo ivalozana. Baolina tokony nodakana no notsenainy tamin’ny loha, teny amin’ny tany ka tsy azony ary nahatonga azy handray tanana no nahatonga ny fanasahalana nataon’ny Tana Formation.

“Tena niloka angamba i Jaoronono tamin’io satria tsy tamin’ity alao ity ihany no nanaovany tandrevaka tahaka izao fa efa niseho ihany koa izany teo amin’ny lalaonay sy Saint Michel”, hoy ny mpitantana avy eo anivon’ ny Iarivo Football Club. Mikasa ny hampihantona azy izy ireo ato ho ato.

Roméo Andriamihaja

Ireo vokatra hafa

Ajesaia # Cospn (0 – 0)
Hezami # United FC (2 – 0)

Handball – Nanjakan’ny avy any Atsimo ny “Open Junior 2013”

Rijakely — Tue, 21 May 2013 05:52:38 +0000

Tsy namelan’ireo avy any amin’ny faritra atsimo raha tsy azony ny amboara niadiana teo amin’ny “open junior”, ho an’ny handball notontosaina, tamin’iny herinandro iny. Ny HBCI avy any Ihorombe no voahosotra ho tompondaka teo amin’ ny vehivavy raha nandresy ny ekipan’Atsinanana, izay isan’ireo taninketsan’ ny handball eto Mada- gasikara, tamin’ny alalan’ ny isa 48 no ho 46. Efa tany amin’ny fanalavam-potoana anefa vao nahita an’io fandresena io ireto avy any Ihosy ireto rehefa nisaraka tamin’ny isa nitovy samy 40 teo amin’ny fe-potoana ara-dalana. Nitarika tamin’ ny alalan’ny isa 18 no ho 17 anefa ny solontenan’
i Toamasina teo am-pialan-tsasatra.

Tsy nahatsiaro ho sahirana kosa ny ekipan’ Atsimo Andrefana nanoloana ny ASSM avy etsy Amparibe, teo amin’ ny lalao famaranana ho an’ny sokajy lehilahy. Nomontsanin’izy ireo tamin’ny alalan’ny isa 32 no ho 20 ity ekipan’ny Masindahy Misely ity, teo amin’ny fe-potoana farany ho an’io lalao io. Nitarika hatrany am-piandohana ny avy any Toliara tamin’izany lalao izany ary lavitra, 16 no ho 9, ny elanelana teo amin’ny fe-potoana nialana sasatra. Natao indrindra hifantenana ireo mpilalao handrafitra ny ekipam-pirenena hiatrika ny fiadiana ny amboaran’i Afrika eo amin’ny sokajy vehivavy, izay atao any RD Congo, tsy ho ela iny fifaninanana iny. Noentina ihany koa anefa nanaitra ny hafanam-pon’ireo mpilalao lehilahy tanora, araka ny nambaran’ny federasiona.

R.A

Moto cross – Tompondakan’i Madagasikara vonjimaika I Ted Boyaval

Rijakely — Tue, 21 May 2013 05:51:46 +0000

Nisongadina teo amin’ ny andiany fahatelo, amin’ ny fiadiana izay ho tompon- dakan’i Madagasikara eo amin’ny fanamoriana moto cross i Tod Boyaval, natao tany Nosy-Be Hell-ville. Isan’ny mpifaninana akaiky aminy i Claudio Tida, izay niala an-daharana teo amin’ny dingana faharoa, raha vaky kodiarana.

Tamin’ny fifaninanana andiany voalohany, izay natao tany Toamasina no nitarika i Tida Claudio. Norombahin’ny Ted kosa ny andiany faharoa teny Iavoloha, ary dia mbola nohamafisiny izany tamin’ity andiany fahatelo tany Nosy-Be ity. Izy izany aloha hatreto no tompondaka vonjimaika eo amin’ny fifaninanana fanamoriana moto cross.

Basket ball N1B – Voahosotra ho tompondaka ny Fitsarana any Toliara

Rijakely — Tue, 21 May 2013 05:50:05 +0000

Norombahin’ny JBC, ekipan’ny Fitsarana ao amin’ ny renivohitry ny Faritra Atsimo Andrefana, ny anaram- boninahitra tompondakan’ i Madagasikara, teo amin’ ny basket ball sokajy N1B, izay nampiantranoan’ izy ireo tamin’iny herinandro iny.

Tamin’ny alalan’ny isa tery dia tery 62 no ho 61 no nandresen’izy ireo ny SBC avy any Atsimo Andrefana, teo amin’ny lalao famaranana notonto- saina ny alahady teo, tao amin’ ny kianja mitafon’i Toliara. Ireo ekipa roa niatrika ny famaranana ireo izany no hiatrika ny fifa- ninanam-pirenena ho an’ ny sokajy N1A indray amin’ ity taona ity, araka ny fitsipika mifehy ny fifaninanana. Ny Globe Trotters, izay nandresy ny UHF, tamin’ ny alalan’ny isa 91 no ho 83, kosa no nitana ny laharana fahatelo tamin’ ity fifaninanana nanjaka- zakan’ireo avy any amin’ ny faritany ity. Ankoatra ireo dia mbola voahosotra ho mpilalao mendrika ihany koa i Fania Estace, mpilalaon’ny JBC Atsimo Andrefana.

I Jaona Ravelomanan- tsoa, Globe Trotters, kosa no nampiditra baolina betsaka indrindra izay nahatratra 149. Natolotra ny ASC 44 avy any Alaotra Mangoro kosa ny amboaran’ny “fair Play” .

R.A

Toamasina – Nalai-nisaraka i Nantenaina sy ireo mpankafy azy

Rijakely — Tue, 21 May 2013 05:45:13 +0000

Niarahan’i Nantenaina nikalo tamin’ireo mpijery ny fampisehoany

Efa ela tsy nifankahitana. Nalai-nisaraka i Nantenaina sy ireo mpankafy azy nandritra ny seho voalohany niarahany tamin’ny mponin’i Toamasina, ny alahady lasa teo, tao amin’ny kianja mitafon’i Soavita, tao anatin’ilay hetsika «Pentecôte maresaka à Tamatave». Porofon’izany, dia saika niarahan’ity mpanakanto ity nikalo tamin’ireo mpijery ny ankamaroan’ireo hira nokaloina ka tao anatin’izany ireo hira efa voarakitra tamin’ny rakikira roa efa navoakany toy ny «Tambitamby», «Zanaka ambanivolo», «Fahanginana», «Saribamanga»…

Anisan’ny tena nahoraka kosa ary nangatahin’ny mpijery ny namerenana azy ny «Sentosento», izay niarahany nikalo tamin’i Frances J, izay sambany niaka-tsehatra tamin’ny fampisehoana.

Nialoha an’i Nantenaina, dia nisantatra ity seho ity i Shyn, izay anisan’ireo mpanakanto sangany sy manana ny lazany koa amin’izao fotoana, any amin’iny faritra Atsinanana iny.

Lehilahy handeha hijery baolina maty tany anaty honahona

Rijakely — Tue, 21 May 2013 05:43:32 +0000

MPONINA ENY AMIN’NY FOKONTANY AMBOHIDAHY-ANKADINDRAMAMY RANDRIAMANANJARA HERITSOA ANTSOINA HOE TSOA, RAIM-PIANAKAVIANA 44 TAONA, HITA FATY TAO ANATY HONAHONA, TENY ANKORONDRANO -ANDRANOMAHERY, NY ALAKAMISY 16 MEY LASA TEO. TSY NODY AN-TRANO NANOMBOKA NY ALAHADY TALOHAN’IO ITY RAIM-PIANAKAVIANA ITY. EFA NIALANA NENINA TAMIN’NY FILAZANA AMIN’NY ONJAM-PEO SAO VERY NA NARARY TAMPOKA TANY AN-DALANA KA TSY TAFODY. NOTETEZINA AVOKOA REHEFA HOPITALY NITADIAVANA AZY.

Hatairana ny an’ireo vady aman-janaky Randriamananjara Heritsoa rehefa tsy nody ity farany ny alin’ny Alahady 12 mey lasa teo, raha nilaza ny handeha hijery baolina teny Tsarahonenana no nivoahany ny trano ny antoandro. Notsilovina avokoa ireo tatatra rehetra manodidina an’Ankadindramamy iny sao nianjera tany ho any ka tsy nisy mpahita. «Nivezivezy nitady azy izahay ny alin’iny satria efa tsy dia salama loatra i Tsoa nefa mbola nivoaka ny trano. Fanaony ny mandehandeha saingy tsy lasa lavitra izy fa manodidina ety ihany no tena falehany», hoy Vololomanitrarivo Dina, vady navelan-dRatompokolahy. Nampandrenesina avokoa ireo havana aman-tsakaiza rehetra sao mba nisy nahita azy, saingy niala maina nandritra ny telo andro. Notetezina mila ho isan’andro vaky ny tranom-patin’ireo hopitaly lehibe teto Iarivo hatramin’ny alarobia lasa teo saingy tsy hita mihitsy ny nofo mangatsiakany. Ankona ireto fianakaviana raha nahita ny razana ny alakamisy maraina teo. «Tsy nahalala azy ireo fianakaviana fa izaho no tena nahalala hoe tena i Tsoa io maty io», hoy hatrany ny vady andefimandriny.

Be vazivazy…

Tomefy olona ny tanànan’Ambohidahy tamin’ny fanotronana farany ny nofo mangatsiakan’i Tsoa ny Sabotsy maraina lasa teo. Samy nanamafy izy ireo fa tena olona mamy hoditra teo amin’ny fiarahamonina tokoa ity nodimandry ity. «Rehefa misy fahoriana eto an-tanàna dia tsy mianona fotsiny amin’ny famangiana i Tsoa fa manolo-tena hanatanteraka ny fiaretan-tory mihitsy. Vatrany mihitsy aza ny mamonjy ny fandevenana raha toa ka mbola manodidina an’Antananarivo no anaterana ilay mpiray vodirindrina nodimandry», hoy i Mosesy namana akaiky azy.

Olona be vazivazy ihany koa izy teo anivon’ny fiarahamonina. Tia firaisan-kina ary tsy mahatanty mijery olona manana olana, ka mahavatra manolo-tanana. Mizara izay mba ananany amin’ireo akamany izy ary manao izay hampifalifaliana ireo manodidina azy rehefa faran’ny herinandro.

«Tso-po sady malala-tanana i Tsoa. Tsy mba tia zavatra an-kinafina fa milaza avy hatrany izay tena ao am-pony. Manampy ny olona ao anaty fahasahiranana ihany koa izy. Tsy nahagaga raha vory ny namana sy olom-pantatra nanotrona sy nanao veloma farany azy», hoy Ravoniarisoa Simone , anabavin’i Tsoa.

Tsiaro an’i Dada

Randriamananjara Manohisoa Sedo, zanany lahimatoa

Telo mianadahy ny zanak’i Tsoa, samy manana ny ahatsiarovany an-drainy daholo ireo zaza ireo. «Matetika aho no tenenin’i Dadanay foana fa ny lehilahy dia natao hamelom-bady aman-janaka. Fanaony ihany koa ny manome torohevitra sy anatra ho amin’ny fahendrena. Tena tia anay izy ary mitondra ahy tsara sy mifampiresaka ny fiainako ivelan’ny trano. Ny fitendrena gitara no tena ahatsiarovako azy», hoy Randriamananjara Manohisoa Sedo, zanany lahimatoa.

«Tia manambitamby dadanay ary tena tsara fanahy. Na dia izany aza dia tsy miresaka aminy firy ireo tsiambarateloko aho.», hoy kosa i Vololomananjara Maharitsoa Nadie, zanaka vavitokan’i Tsoa.

Fahabangana ho azy efa-mianaka tanteraka ny fandaozan’i Tsoa azy ireo tao anatin’ny tampoka sady tsy natrehi-maso akory ny fialany aina.

Mampiahiahy

Mbola ankamantatra ho an’ireo fianakaviana kosa hatreto ny nahitana ny vatana mangatsiakany teny Ankorondrano. Tanàna tsy mba falehany mantsy iny toerana iny. Gaga ihany ireo fianakaviana raha nahita tamin’ny gazety fa tany Ankorondrano no hita ny nofo mangatsiakan’i Tsoa. «Tsy mazava aminay hatreto ny antony nahitana azy tany Ankorondrano Andranomahery. Noho izy tsy dia salama dia tsy sahy mandeha tongotra lavitra nefa any no nahitana azy», hoy hatrany Ravoniarisoa Simone, anabavin’i Tsoa. Niezaka nampionona ny tenany ireto fianakaviana ary velom-panantenana tamin’ny fahitana ny nofo mangatsiakany. Mbola eo am-panatanterahana ny fombafomba fanao amin’ny fisaonana rahateo ry zareo, ka miandry am-pitoniana izay fomba rehetra ahafahana mamantatra ny antony nahafaty an’i Tsoa.

Ny fianakavian’i Tsoa dia maneho fisaorana ireo rehetra nikarakara ny razana hatreny Ankorondrano Andranomahery sy ireo izay nanampy tamin’ny fandevenana azy.

Sary sy soratra: Maminiaina Andri.

Batou beach Ambohimanambola – Fitsangantsanganana feno no natolotra tamin’ny «mi’Ritsoka mifety»

Rijakely — Tue, 21 May 2013 05:43:26 +0000

Niavaka tamin’ireo seho faran’ny herinandro ny «mi’Ritsoka mifety», notanterahina, teny amin’ny Batou Beach Ambohimanambola, omaly tontolo andro. Feno ny fitsangantsanganana satria ankoatra ny tontolon’ny mozika, izay niaraka tamin’ ireo lokona gadona ahafantarana ity trano mpamokatra ity, dia niasa avokoa ireo toerana sy faritra samy hafa tao anatin’ny Batou Beach.

Niavaka satria, tamin’ ny alalan’ny fanatanjahantena Zumba, niarahana tamin’ny Tambour Gasy, no nanokafana ny hetsika. Nanaraka azy ny hiragasy nataon’ny tarika Raveloson. Ity farany izay nanohy ny fanentanana tamin’ny fampianarana dihy gasy toy ny latsitanana sy ny maro hafa. Taorian’izay dia nisantatra ny fiakarana an-tsehatra tamin’ny mozika ireo mpanakanto miara-miasa amin’ny mi’Ritsoka ka anisan’ireny ry Iraimbilanja, Samoëla… Nisongadina ihany koa anefa ireo «revy ambony tamboho», niarahana tamin-dry Tsiakoraka, Erick Manana sy ny tariny ka niangalian-dry zareo ny hiran’ny tarika Feo Gasy, Lôlô sy ny tariny ary Tselonina, izay vahiny tsy nampoizina tamin’ny seho toa an-dry tarika ’Zay, Edgard Ravahatra…

Nahafa-po ny maro tamin’ity seho ity ihany koa ny nahitana indray an’i Lalatiana izay narahin’i Fanaiky, Mendrika ary Solofo Bota, tamin’ity indray mitoraka ity, izay niangaly ireo hirany tamin’ny gadona jazz.

Mpanakanto marobe izay miara-miasa sy mbola hiara-hiasa amin’ny mi’Ritsoka no nandray anjara tamin’ny hetsika izay tafiditra amin’ny fankalazana ny faha-5 taonany.

Faly Ran.

Club Nautique Ivato – Tara ny fampisehoana, kitoatoa ny fikarakarana

Rijakely — Tue, 21 May 2013 05:42:07 +0000

Niezaka nanome ny tsara hatrany ry Vaiavy Chila teny Ivato

Nahitana tsy fahamatorana. Noheverina fa hiara-dia amin’ny fitsangantsanganana ny fijerena fampisehoana, izay nandiso fanantenana ny maro nandritra ny seho «tafaray samy kaka», izay natolotry ny Madasoleil, teny amin’ny Club Nautique Ivato, omaly.

Tara ny fampisehoana ary hita fa be ny kitoatoa tamin’ny fikarakarana. Tamin’ny 12 ora antoandro tany ho any mantsy vao nisantatra ny fampisehoana i Tinah- Ti, raha nihevitra ny maro fa any amin’ny 10 ora any, raha tara indrindra, dia hanomboka. Ora iray mialoha izany rahateo vao nanomboka nanao ny fandrindrana ny fanamafisam-peo samihafa ireo tarika hiaka-tsehatra. Vokany, tsy nandeha tamin’ny laoniny ny fandraisana anjaran’ireo nanokatra ny sehatra. «Mba te hahita ny seho ataon’ireo mpanakanto rehetra izahay nefa voatery tsy maintsy hody aloha satria miaraka amin’ny ankizy, fantatra fa hanahirana rahateo ny fiara fitaterana», hoy ny fitarainan-dRasoarinoro, anisan’ireo mpijery ity seho ity.

Taorian’i Tinah-Ti dia nanohy ny fampisehoana Ramora Favori, izay hita fa tao anatin’ny heriny na dia teo aza ny voina nahazo azy, ny herinandro lasa teo. Nanohy ny seho taorian’izay ry Jarifa, Vaiavy Chila ary namarana azy ry Wawa.

Fianarana sady kilalao – Vita ny fizaràna loka tamin’ny »Rallye mathématiques »

Rijakely — Tue, 21 May 2013 05:41:58 +0000

Nifarana ilay fifaninanana faha-12 nomena anarana «Rallye Mathematiques», izay karakarain’ny fikambanan’ny mpampianatra ity taranja ity, GEMMA, isan-taona. Natao teny amin’ny Lycée français, eny Ambatobe, tamin’ny farany herinandro teo, ny fizarana ny loka tamin’ireo nandresy tamin’izany.

«Mpianatra 14 000 mahery avy amin’ny liseam-panjakana sy tsy miankina manerana ny Nosy no nandray anjara tamin’izany. Natao indrindra mba tsy hatahoran’ny ankizy ity taranja ity intsony sy ny hilalaovana azy ka hahaizany mampiasa azy amin’ny fiainany an-davanandro no anton’ny fifaninanana», hoy Ramahazosoa Prosper, mpikambana ao amin’ny GEMMA.

Mpianatra avy ao amin’ny Lycée français, Ambatobe sy ny Lycée Jules Ferry, eny Faravohitra ary ny Kolejy Jules Vernes, ao Antsirabe no nitana ny laharana voalohany, araka ny fanazavana azo tamin’ i Dubois Sandrine, mpandrindra ny fifaninanana.

B.A

Hipoka indray – Vita sedran’ny fiarahan’ny mpanakanto maro ny Coliseum Antsonjombe

Rijakely — Tue, 21 May 2013 05:40:57 +0000

Nisarika ireo mpankafy tamin’ny feo, indrindra fa ny fihetsika i Black Nadia teny Antsonjombe

Toy ny tamin’ny alatsinainin’ny Paska teo, dia hipoka tanteraka indray ny Coliseum Antsonjombe, omaly, tao anatin’ilay hetsika «Lundi de Pentecôte goavam-be». Araka izany, hatreto dia vita sedran’ny fiarahan’ny mpanakanto maro ny Coliseum Antsonjombe.

Hatramin’ny nisokafany mantsy dia io fiarahana mpanakanto maromaro io hatrany no mbola vokatra natolotr’ ireo mpikarakara ho an’ny mpijery ary saika tamin’ny andro fety sy andro natokana hialan’ ny olona voly. Andrasana izany izay ho tohin’ny fampiasana io fotodrafitrasa anisan’ny raitra eo amin’ny sehatry ny fampisehoana io. Toy izany koa ny mpanakanto sahy hisedra irery ity kianja mahazaka mpijery hatramin’ny 50 000 ity.

Raha ny seho omaly dia samy nampitsinjaka ireo vahoaka marobe tonga teny an-toerana ireo mpanakanto natsoin’ny Madapro hanafana ny fampisehoana, nahitana ireo andrarezin’ny mozika mafana ka nahitana an-dry Black Nadia, Jean-Aimé, Tsiliva. Vahiny nasain’ny mpikarakara manokana kosa i D’Alvis, izay anisan’ireo manomboka manana ny toerany amin’ny fitrandrahana ny gadona «r’n'b tropikaly».

Fifaninanana – Hiaro ny fanondrahana mandeha amin’ny herin’ny masoandro Ny Aina

Rijakely — Tue, 21 May 2013 05:38:23 +0000

Nanainga ny zoma 17 mey, hiaro ny fikarohany, izay fitaovana fanondrahana mandeha ho azy ary mandeha amin’ny herin’ny masoandro Razanelison Ny Aina, tovolahy 17 taona ary kilasy famaranana ao amin’ny Collège La Lumière International. Any Indonezia no hanaovana ny fifaninanana momba ny siansa antsoina hoe ISPRO (International Science Project Olympiade). Mpianatra avy amin’ny sekoly maro maneran-tany miainga avy amin’ny vokatry ny fikarohana na famoronana nataon’izy ireo no handray anjara amin’ny fifaninanana.

Automatic Irrigation System by Solar Energy na fomba fanondrahana tany mandeha ho azy ary mandeha amin’ny herin’ ny masoandro no lohatenin’ny tetikasa entiny amin’izany fifaninanana izany. Tetikasa izay miezaka ny mampiasa ny angovo miaro ny tontolo iainana ary manampy amin’ny fanondrahana velaran-tany samihafa.

“Miainga amin’ny fitrohan’ny milina ny rano ity fitaovana ity ary mitatitra izany mivantana manondraka ny velaran-tany raha mifanakaiky ny rano sy ny tany hotondrahana, miampy fantsona kosa izany raha mifanalavitra” hoy ny fanazana fohy nentiny talohan’ny nandehanany.

Faly Ran.

JK groupe – «Tsy mbola nisy ny fitarainana momba ny Power Balance»

Rijakely — Sat, 18 May 2013 07:07:02 +0000

Ho hita mandritra ny hetsika ara-barotra La Grande Braderie etsy Mahamasina ny vokatra ny fehin-tanana «ES», amidin’ny Jk Groupe ary hanoloan’izy ireo ny «power balance». Ity farany izay voarara tamin’ny firenen-dehibe maromaro toa an’i Etazonia sy Aôstralia ny famarotana azy, kanefa nambaran-dry zareo avy ao amin’ny Jk Groupe ho tsy naharaisana fitarainana mihitsy avy amin’ny mpanjifa azy teto Madagasikara hatramin’ izao. Voalaza fa manampy ny mpitondra azy eo amin’ny fahasalamana itony karazana fehin-tanana itony.

Hiavaka ny fandraisana anjaran’ny Jk Groupe sy ny Air Madagascar amin’ io hetsika ara-barotra io, noho ny fisian’ny tolotra fanomezana fihenam-bidy 20% amin’ireo zotra lavitra (Eoropa sy Azia) ho an’ireo mpanjifan’ny famandrihan-toerana mandritra ny La Grande Braderie. Mbola miampy «Tablette » na « imprimante » ho an’ny sary, araka ny safidin’ny mpanjifa ireo fanka-
sitrahana ireo, araka ny fanazavan’ny Tale ara-barotry ny Air Madagascar, Hery Rambeloson.

Ny orinasa roa tonta izay nifanaraka fa ny Air Madagascar no hiantsoroka ny fitaterana ireo solosaina ho an’ny mpianatra, tafiditra amin’ilay tetikasa «solosaina ho an’ny daholobe» ka « mandritra ny hetsika no hanaovana ny famandrihana farany ho an’ireo efa nisoratra anarana», hoy ny tale ara- barotry ny Jk Groupe, Sahaza Ranarinjatovo.

Faly Ran.

Coliseum Antsonjombe – Hanohy ny seho ry Black Nadia, Jean-Aimé, Tsiliva ary D’Alvis

Rijakely — Sat, 18 May 2013 07:06:58 +0000

Taorian’ny seho tamin’ny alatsinainin’ny paka, hanohy sy seho etsy amin’ny Coliseum de Madagascar etsy Antsonjombe ry Black Nadia, Jean-Aimé, Tsiliva ary D’Alvis. «Alatsinainin’ ny pantekôty goavambe», fampisehoana faharoa handoavam-bola ao amin’ity toerana ity ary tafiditra amin’ny tanjon’ny Madapro, mpikarakara amin’ny fanazarana ny olona hitia hijery fety sy hilanona eny an-toerana.

Adin’ny roa avy ny anjaran’ny mpanakanto tsirairay ka hifandimby hanafana ireo mpijery ireo karazana gadona samihafa toy ny kilalaka, ny zouk love, ny gadona afrikanina… Anisan’ny nafarana manokana avy any Antsiranana ho an’ity seho ity i d’Alvis izay fantatra amin’ilay hira «Iz sa za ».

Hitovy tamin’ny seho natao ny alatsinainin’ny paka teo ihany ny lafiny teknika na ny fanamafisam-peo, ny jiro ary ireo tranoheva samihafa mampiantrano ny fampisehoana.

Tapatapany

Rijakely — Sat, 18 May 2013 07:06:54 +0000

FANADINANA CEPE

Notombanana ho vita omaly ny fandinihana farany ny laza adina amin’ny fanadinam-panjakana Cepe. Voalaza fa hoezahin’ny minisiteran’ny Fanabeazam- pirenena ny hanaparitaka eny amin’ny Cisco ireo laza adina voafidy any amin’ny tapaky ny volana jona. Misy karazany telo raha ny fantatra ny laza adina ho an’ity fanadinana ity mba hisorohana ny mety ho fiparitahany milohan’ny androm-panadinana. Samy hanana ny laza adina ihany koa ny renivohi-paritany enina teo aloha.

FJKM AMBOHIMANGIDY

Fotoam-bavaka lehibe ho an’ny fetin’ny taranaka ao amin’ny Fjkm Ambohimangidy Fiadanana, amin’ ny alahadin’ny Pantekosta ho avy izao, izay hanasana ny taranaka rehetra. Izany dia tafiditra amin’ny fanokafana ny fankalazana ny jobily faha-145 taonan’ ny fiangonana. Tanjona apetraka ny fanitarana ny fiangonana. Hitarika ny fotoana ny Mpitandrina Razanajatovo Andriamaromisa. Hofaranana amin’ ny fandraisana Fanasan’ny Tompo ny fotoana rehetra.

« Batou beach » – Hiray sehatra i Lalatiana sy Eric Manana

Rijakely — Sat, 18 May 2013 07:06:50 +0000

Ao anatin’ny fankalazana ny faha-5 taonany, hanolotra ny «Mi’Ritsoka mifety» eny amin’ny Batou Beach Ambohimanambola ny mi’Ritsoka Production amin’ ny alatsinainin’ny pantekoty 20 mey tontolo andro. Hiray sehatra amin’izany i Lalatiana sy Eric Manana.

Ankoatra azy mianadahy ireo, handray anjara amin’ ity hetsika arahina fitsangantsanganana ao anatin’ny dobo filomanosana sy ny tora-pasika ity koa ireo mpanakanto marobe efa niara-niasa sy mbola hanohy ny fiaraha-miasa amin’ity trano mpamokatra ity. Anisan’ ireo hanafana ny sehatra eny amin’ny Batou Beach ny tarika Feo Gasy, Benny sy Bebey, tarika Iraimbilanja, Tsiakoraka, Samoëla, Randrantelo, Voahirana, Théo Mikea, Rôla Gamana, Jovin, Kiady, Rolf, Tselonina, Fafah Mahaleo, Kolibera, Gothlieb, sns.

Noho ny andro fitsangantsanganana ho an’ny rehetra dia hahazo ny tandrifiny amin’ireo kalo sy fihetsika samihafa ihany koa ireo kilonga madinika miaraka amin’i Gothlieb.

Faly Ran.

Fiaraha-mitantana telo loha – Tsy mbola nankatoavin’ ny governemanta ilay volavolan-dalàna

Rijakely — Sat, 18 May 2013 06:36:39 +0000

Manjavozavo tanteraka ny ho fipetraky ny fitantanana ny tetezamita aorian’ny mety ho fametraham-pialan’ny Filohan’ny tetezamita, Andry Rajoelina, eo amin’ny toerany. Nirava maina ny Filankevitry ny minisitra, omaly, teny Iavoloha, izay tokony nankatoavana ilay volavolan-dalàna naroson’ny minisiteran’ny Atitany mamariparitra ny fitsipi-dalao mahakasika ny fiaraha-mitantana ny tetezamita hiarahan’ny Praiminisitra, Omer Beriziky sy ny filohan’ny Kaongresin’ny tetezamita, Mamy Rakotoarivelo ary izay ho solon’ny filohan’ny Filankevitra ambonin’ny tetezamita, ny jeneraly Dolin Rasolosoa.

«Tsy nisy ny fanapahan-kevitra noraisina ny maraina satria mbola samy nilaza ny handinika lalina sy hanontany hevitry ny Cenit sy ireo antoko niaviany avy mahakasika io volavolan-dalàna io ireo mpikambana eo anivon’ny governemanta. Tokony notohizana ny hariva ihany anefa io fivoriana io saingy tsy raikitra tampoka tamin’ny ora farany izany», araka ny fanazavan’ny minisitra iray eo anivon’ ny governemanta izay nisafidy ny tsy hitonona anarana. Voalaza fa «tsy nety nitovy hevitra hatramin’ny farany mahakasika ny fampiharana ny volavolan-dalàna momba ity fiaraha-mitantana telo loha ity mihitsy ny ankamaroan’ireo minisitra nivory teny an-toerana».

J.R

Basket ball N1B – Nihintsana avokoa ireo ekipan’Analamanga

Rijakely — Sat, 18 May 2013 06:34:22 +0000

Tsy nahovoka. Ekipan’Analamanga telo no indray nihintsana teo amin’ny dingan’ny ampahefa-dalana ho an’ny fiadiana ny ho tompondakan’i Madagasikara, eo amin’ny basket sokajy N1B, tany Toliara, omaly hariva. 66 no ho 63 no nandavoan’ny SBC (Vakinankaratra) ny ekipan’ny kolejy Masindahy Misely, raha ny TTS avy eny Ambohimanarina no nanaraka ny diany taorian’izay, resin’ny USF Matsiatra Ambony 90 no ho 80 taorian’ny fanalavam-potoana. Teo amin’ny lalao fahatelo dia mbola tsy tafavoaka teo anatrehan’ny Globe Trotters ny Fandrefiala, ka niondrika tamin’ny isa 81 no ho 66.

Mbola tao anatin’ny lalao kosa ny JBC sy ny JCM, izay hamaritra ny ekipa fahefatra hiatrika ny manasa-dalana anio, tamin’ny fotoana nanoratana ny lahatsoratra.

R.A

Ireo ampahefa-dalana anio

ASSM # SBC (63 – 66)
USF # TTS (90 – 80)
Globe Trotters # Fandrefiala (81 – 66)

Baolina kitra Analamanga – Hotsapain’ny IFC ny Tana Formation

Rijakely — Sat, 18 May 2013 06:34:17 +0000

Mbola mitana ny toerana faharoa ny Tana Formation eto Analamanga

Mialoha ny handehanany hiatrika ny lalao famaranana mandroso any Seychelles, eo amin’ny fiadiana ny ho tompondakan’ny Ranomasimbe Indiana ny talata izao, dia hotsapain’ ny Iarivo Football Club etsy Mahamasina anio ny Tana Formation FC. Lalao miverina ho an’ny fiadiana ny ho tompon- dakan’Analamanga eo amin’ny baolina kitra ity lalaon’ny roa tonta ity, tafiditra amin’ireo lalao hanamarika ny andro faha-13.

Lalao azo heverina ho fanalana vela ihany ho an’ny ekipan’i Frank Rajaonarisamba, satria tamin’ny lalao mandroso dia niondrika tamin’ny isa 2 no ho 1 ny Tana Formation. Mila mitana ny toerany faharoa eto Analamanga anefa ity farany satria taorian’ny andro faha-12 dia izy ireo no milahatra eo aorian’ ny AS Saint Michel. “Ny harerahan’ny vatana teo amin’ireo mpilalao avy tany Kaomoro no isan’ny nahatonga iny faharesena iny saingy hiezaka ny hanarina izahay amin’ity”, hoy
i Frank Rajaonarisamba. Hialoha io lalao io dia hifandona ny Cospn sy ny Ajesaia.

Roméo Andriamihaja

Fandaharan-dalao

Sabotsy 18 mey 2013
Mahamasina
12 ora 30: Ajesaia # Cospn
3 ora 30: Tana Formation # Iarivo FC
Carion
9 ora: Hezami # United
12 ora: As adema # Vesta Team
3 ora: ASSM # Cosfa

Tenisy « Coupe Davis » – Hifandona amin’ ny 1/2-dalana i Maraoka sy Madagasikara

Rijakely — Sat, 18 May 2013 06:34:14 +0000

Azon-dry Jean Jacques Rakotohasy sy ny namany, izay misolo tena antsika any Egypta amin’ny fifaninanana tenisy na ny “Coupe Davis” Vondrona III, ny laharana voalohany niarahana tamin’i Namibia ary Rwanda tao amin’ny Vondrona C. I Maraoka no hifandona amin’ny ekipa Malagasy amin’ny manasa-dalana, taorian’ ny nandresen’i Mada- gasikara isa 3 no ho 0 ny Namibiana, omaly.

Teo amin’ny lalao voalohany, resin’i Jean Jacques Rakotohasy na i Zakakely tamin’ny seta 2 no ho 0 (6/3, 6/0) i Jacobus Serdyn. Seta 2 no ho 0 (7/6, 6/3) ihany koa no nandavoan’i Antso Rakotondramanga an’i Tiku Jacob. Mbola seta 2 no ho 0 (6/1; 6/1) ihany koa no nandresen’i Ando Rasolomalala sy Tony Rajaobelina azy mirahalahy ireo teo amin’ ny olon-droa miaraka.

Raha tafavoaka eo anatrehan’i Maraoka isika dia tafaverina indray ao anatin’ny vondrona II amin’ny taona 2014, ka hiarahantsika amin’ireo firenena eoropeana.

R.A

Tapatapany

Rijakely — Sat, 18 May 2013 06:32:51 +0000

TSY LANY> Naroso nodinihina teo anivon’ ny Filankevitry ny minisitra, omaly, teny Iavoloha ihany koa ny volavolan-dalàna mahakasika ny fomba ahafahan’ireo kandidà misintona ny firotsahan-kofidiany amin’ny fifidianana filoham-pirenena. Tsy mbola nitovy hevitra ny hankato izany ihany koa ireo minisitra eo anivon’ny governemanta.

NALEVINA TEO AN-TOKOTANY> Ny alarobia teo no voalevina soa aman-tsara ny Evekan’Antsirabe misotro ronono, Ramananarivo Felix, rehefa namoy ny ainy noho ny fahanterana, ny alahady 12 mey. Teo an-tokotanim- piangonana katedraly «Notre Dame de la Salette» ao Antsirabe ihany no nandevenana azy. Feno hipoka ny arabe manodidina nandritra ny fotoam-pivavahana farany nanaovam-beloma azy.

Lalatina Ravololomanana – « Mety hiteraka ra mandriaka ny fifidianana amin’ny 24 jolay»

Rijakely — Sat, 18 May 2013 06:32:39 +0000

Nanakiana mafy ny Fitsarana manokana misahana ny fifidianana (Ces) i Lalatiana Ravololomanana, omaly. Tonga hatrany amin’ny filazana fa mety hisy ra mandriaka, toy ny zava-piseho any Afrika mihitsy, ny fanehoan-kevitr’ity farany manoloana ny fikirizana hanao fifidianana amin’ny 24 jolay.

Manahy mafy ity mpitarika ny antoko Manda ho an’ny firaisam-pirenena ity ny amin’izay zavatra hiseho « indrindra fa raha ny firafitry ny Ces ankehitriny ihany no tazomina », araka ny fanehoan-keviny.

«Ravàna ny Ces ankehitriny. Atao ny fampihavanana ka tsy misy manana alahelo na amin’iza na amin’iza eto, toy ny fampihavanana ataon’ireo raiamandreny am-panahy ao amin’ny Ffkm. Hatsangana ny Ces vaovao tsy ao anatin’ny Fitsarana avo momba ny lalàm-panorenana fa mahaleo tena mihitsy. Havela hisafidy izay Lalàm-panorenana tiany hitondrana ny firenena ny vahoaka Malagasy aorian’izay», hoy i Lalatiana Ravololomanana.

Ranaivoson Faniry

Parlemanta – Manakiana ny voalaza fa fitsabahan’ ny vahiny

Rijakely — Sat, 18 May 2013 06:32:27 +0000

Tohina. Niray feo ireo Parlemantera avy amin’ny vondrona tsy miankina eny Tsimbazaza nanohitra izay voalazan’izy ireo fa fitsabatsabahan’ny sehatra iraisam-pirenena. « Miangavy anareo izahay, aoka re tsy hosenareo ny fiandrianam-pirenenay Malagasy ka ianareo indray no hanery anay ary handeha hisafidy eo amin’ny toeranay izay olona hitondra anay rahampitso », hoy Rabary Thierry, filohan’ny vondron’ny parlemantera tsy miankina eny anivon’ny Kaongresin’ny tetezamita, nitondra tenin’ireo mpikambana, omaly.

Ralalanirina Eleonore, mpikambana eo anivon’ity rafitra mpanao lalàna ity ihany dia nanizingizina ny tsy tokony hiitaran’ny tetezamita intsony. « Latsaka an-katerena ny Firenena ary efa lalina loatra ny fahantran’ny vahoaka ankehitriny ka ilaina ny hanaovana fifidianana amin’ny 24 jolay », hoy izy.

Mpisolovava, profesora, fikambanana zana-bahoaka, vondron’ny mpivavaka ary olon-tsotra tsy manana antoko no mikambana ao anatin’ ity vondrona parlemantera ity.

R.F

Rugby « Grand defi Berthin » – Ekipa valo hifampihantsy eny Antanikatsaka

Rijakely — Sat, 18 May 2013 06:29:29 +0000

Mandritra ny alatsinainin’ny Pantekosta dia hifampihantsy eny amin’ny kianjan’Antanikatsaka ireo ekipa valo avy eny amin’ny seksiona Atsimondrano, eo amin’ny taranja rugby, izay efa niatrika ny “tournoi Berthin Atsimondrano”. “Fangatahan’ireo ekipa ireo ny hifanala vela ka antony nahasarika anay hanohana azy ireo. Fanao rahateo izany lalao fihantsiana izany ho an’ny rugby. Tsy ady omby fa fitaovana hoentina manao fanatanjahantena no hatolotra ho an’izay mandresy”, hoy i Berthin Randriamihaingo, filohan’ny “Team Berthin”.

R.A

Fandaharam-potoana

XV Trefle Ambohijafy # FTFAI Ambaniala
3FB Fenoarivo # Zam Antanivory
XV Frères Ampasika # XV Fa Ampasika
FTFAI Ambaniala # XV energie Anjezika

Kitra amin’ny tora-pasika – Mpilalaon’ny morontsiraka avokoa no mandrafitra ny Barea

Rijakely — Sat, 18 May 2013 06:29:24 +0000

Saika mpilalao avy any amin’ny morontsiraka avokoa no mandrafitra ireo Barea 12 hiatrika ny fifanintsanana hiatrehana ny Mondial eo amin’ny baolina kitra lalaovina amina tora-pasika hatao any El Jadida Maraoka amin’ny 21 – 26 mey ho avy izao. Hifantenana izay hisolo tena an’i Afrika amin’ny fiadiana ny amboara eran-tany hatao any Tahiti amin’ny septambra 2013 izy ity. Olona 15, ka 12 no mpilalao, no handrafitra ity delegasiona malagasy, izay hanainga amin’ny alatsinainy izao.

“Manaiky ny tsy nahatafidirana mpilalao ao amin’ny Barea Beach Soccer izahay satria tsy misy ny fifaninanana eto Analamanga saingy kosa hanao fanamby izahay ato ho ato fa manana mpilalao afaka manao izany. Tokony hahay hitsara tena tahaka izany ihany koa ireo ligy rehetra misy raha toa ka tsy mahatafiditra mpilalao izy ireo”, hoy i Henintsoa Rakotoarimanana na i Tôta, filohan’ny ligin’ Analamanga ho an’ny baolina kitra.

Nanomboka ny 25 avrily teo tany Mahajanga ny fampivondronana ho an’ireo mpilalao mandrafitra ny ekipam-pirenena malagasy. Ankoatra ny fandraisana anjarantsika eo amin’ny ekipa dia voafidy hitsara lalao any an-toerana ihany koa i Said Hachim Nassur, mpitsara iraisam-pirenena.

R.A

Ireo Barea amin’ny Beach soccer

Mpiandry tsatokazo: Dominique (Atsinanana), Jhorialy (Boeny)
Vodilaharana: Mamy Fabrice (Alaotra Mangoro), Dominique (Menabe), Oscar (Vatovavy Fitovinany), Bernardin (Atsinanana), Pierralit (Menabe)
Mpanafika: Anderson (Vatovavy Fitovinany), Tinasoa (Menabe), Flavien (Alaotra Mangoro), Aimé (Boeny), Melita (Vatomandry)

Moto cross – Hanomboka any Nosy Be ny tena adin’i Ted sy Claudio

Rijakely — Sat, 18 May 2013 06:29:20 +0000

Vonona tanteraka i Ted Boyaval hiatrika ny fifaninanana

Taorian’ny hazakazaka natao tany Toamasina, izay nanjakazakan’i Claudio Tida, sy ny tetsy Iavoloha izay norombahin’i Ted Boyaval dia hiatrika fifa- ninanana vaovao indray izy mirahalahy ireto any Nosy Be. Andiany faha- telo ho an’ny fiadiana ny ho tompondakan’i Mada- gasikara eo amin’ny moto Cross ity hotontosaina rahampitso ity ary mifanindran-dalana amin’ ny fankalazana ny Donia fanao isan-taona any an-toerana.

Hitsapa sahady ny fiofanana natrehany tany Etazonia tamin’ny volana avrily teo i Ted amin’izao dingana fahatelo amin’ ny fifaninanam-pirenena izao. “Efa vita ny fano- manana.Vonona tanteraka aho hanaporofo fa tsy kisendrasendra ny fandresena azoko teny Iavoloha”, hoy i Ted Boyaval. Mila miezaka mafy kosa anefa i Claudio raha te hanarina iny faharesena tsy
nampoiziny iny raha mbola te hitana ny anaram-boninahitra tompondakan’i Madagasikara, izay azony tamin’ny taona 2012.

R.A

Kitran’ny mpamily – Hanatevin-daharana ny Taxi Andranonahoatra sy Anosy

Rijakely — Sat, 18 May 2013 06:29:17 +0000

Niampy ekipa roa ireo mpamily fiara-karetsaka, tonga mandray anjara amin’ilay kitra lalaovin’olona fito karakarain’ny Fiteramana, eny amin’ny Kianjam-pasika Fort Duchesne isaky ny sabotsy. Nanatevin-daharana ireo efa nisantatra ny fifaninanana ny ekipa Taxi avy eny Andranonahoatra sy ny Taxi Anosy. Hanenjika ny lalao tsy mbola natrehiny izy ireo, ka tafakatra sivy ny lalao hotanterahina anio.

B.A

Fandaharan-dalao

Taxi Ambohipo # Taxi Total Analamahitsy
Taxi Pochard # Taxi Ravinala
Taxi FC3A # Taxi Poteaux doubles
Taxi Andranonahoatra # Taxi Anosy
Taxi Anosibe # Taxi Tsimbazaza
Taxi Antaninarenina # Taxi Astazone
Taxi Glacier # Taxi Andrefan’ambohi-janahary
Taxi Cite Analamahitsy # Taxi Homi
FiTaxi Gara # Taxi Ambohitsoa

Aleo ho adin’ny olom-baovao

Rijakely — Sat, 18 May 2013 06:21:15 +0000

Misafotofoto tanteraka ny raharaham-pifidianana! Manao antsojay ary sesilany mihitsy aza ny antso avo ataon’ireo vondrona iraisam-pirenena ny amin’ny hoe: «hanapaka ny fanampiana ara-bola hanatanterahana ny fifidianana filoham-pirenena raha toa ka mbola misisika hirotsaka hofidiana ireo kandidà telo, Ratsiraka Didier, Ravalomanana Lalao ary Rajoelina Andry». Mazava izany ny lalan-kombana eto fa ny fialàn’izy telo mianadahy mianaka ireo ao anatin’ny hazakazaka amin’ny fifidianana filoham-pirenena no hampilamina ny raharaha.

Na misy mahamarina azy ihany aza io hevitry ny vondrona iraisam-pirenena io, dia olana goavana ny fitsabahan’izy ireo lalina loatra amin’ny raharaha anatiny eto Madagasikara. Ny mahamarina azy dia izao: raha tiana hipetraka tokoa ny fanovàna nimatimatesana eto Madagasikara, dia tokony ho olom-baovao tanteraka, tsy mbola fantatra teo amin’ny sehatra politika mihitsy ary tanora, no tokony hitantana firenena amin’ny Repoblika fahefatra. Mampihomehy mantsy ny zava-misy ankehitriny satria raha ny filazan-dry Deba, tamin’ny fotoan’ androny ny amin’ny hoe: «ny tanora ankehitrio no
tompon’ny taona 2000», izao anefa isika efa taona 2013 nefa mbola misisika te ho tompony ihany Ingahirainy io. Raha ny fahavitana paompy 50 isan’andro tokoa ve moa ry Dadabe Ratsiraka no mbola hahafahanao mitondra firenena, tsy aleo miala moramora fa ny tanora anie mbola betsaka no mahavita lavitra noho izany fa dia aza be resaka e! Tsetsatsetsa tsy aritra ihany iny fa aleo hiverenena ny tena resaka.

Izao fibaikoan’ny vahiny ny familiana eto firenentsika izao dia midika fa tsy manana hazondamosina ary tsy mahaleo tena isika, ka azon-dry zareo lalaovina araka izay itiavany azy sy mifanaraka amin’ny tombontsoany, i Madagasikara. Rehefa tena tapi-dalan-kaleha ihany koa anefa, ka tsy mahita vahaolana intsony dia tokony ho tonga saina izy telo mianadahy mianaka miala moramora. Tsy maninona esory avokoa izay kandidà tsy manara-dalàna sy mampiahiahy dia aleo ho adin’ny samy olom-baovao. Tsy ilaina koa anefa ny Ces ankehitriny fa ny tsy fanarahan-dalàna nataon’ireo mihitsy no vao mainka nampidi-kizo lalina toy izao indray.

Tojo Rakotomalala

Tapatapany

Rijakely — Sat, 18 May 2013 06:20:44 +0000

Antsokosoko. Sokatra 40 sy tanalahy 31 no saron’ny polisy teny amin’ny seranam-piaramanidina Ivato, omaly tolak’andro, tokony ho tamin’ny 3 ora sy sasany. Raha ny fantatra dia any Bangkok no saika nanondranana ireto biby ireto. Tsy fantatra kosa izay nitondra azy.

Lozam-pifamoivoizana. Fiara tsy mataho-dalana iray no potika rehefa nidona tamin’ny tranon’olona tetsy Ambodivona, omaly vao mangiran-dratsy. Tsy fantatra mazava izay tena antony nahatonga ny loza.

Sambo mpijirika. Misy sambo vahiny iray hitan’ny mpanjono madinika mihaodihaody, omaly any amin’ny morontsiraka atsinanana. Manjono amin’ny fari-drano-masin’i Madagasikara ity sambo ity ary eo amin’ ny 300 metatra miala ny morontsiraka atsinanan’ ny Nosy no misy azy hatreto. Efa nampandre ny manam-pahefana any an-toerana ny zandary raha vao nahita an’io sambo io.

Be midina

Rijakely — Sat, 18 May 2013 06:20:34 +0000

Nampiseho fahavonona ny hamongotra ny kolikoly ary hanatevina ny fifehezana ny lalàna ireo tompon’ andraikitra ambony eo anivon’ny polisim-pirenena. Nanao fisafoana tamina fokontany maro teto an-dreni-vohitra mihitsy ny minisitry ny Filaminana anatiny sy ny tale jeneralin’ny polisim-pirenena, ny alakamisy alina teo. Miova amin’ny mahazatra dia ny fibaikoana avy eny ambony latabatra aloha ilay hetsika. Asa anefa raha hahitana izay isan’ny tena maharary ny vahoaka dia ny ny tsy fandriampahalemana izany fidinana ifotony ao anatin’ny indray alina izany. Enga anie ka tsy ho fisehosehoana fotsiny ihany koa izany. Raha ireo olon-dratsy mantsy tsy mba mila miantso mpampahalala vaovao fa dia mazoto hatrany manao «fisafoana» ny tokantranon’ireo valalabemandry…

Ankorondrano – Vehivavy iray nandeha nitady asa, nianjera dia maty

Rijakely — Sat, 18 May 2013 06:20:28 +0000

Vehivavy iray nijoro teo anoloana orinasa iray, niandry asa, no maty tampoka, tetsy Ankorondrano, omaly maraina tokony ho
tamin’ny 7 ora sy sasany. Raha ny tombatomban’ ireo olona teo amin’ny manodidina dia 30 taona eo ho eo ity ramatoa ity.

«Samy nijoro teto izahay ka tsy fantatra izay nahazo azy fa nianjera tampoka izy ary tsy nahatsiaro tena intsony. Niezaka namonjy azy teo ny olona rehetra nijoro teto saingy tsy nifoha mihitsy izy. Nentina avy hatrany tany amin’ny toeram-pitsaboana akaiky indrindra teto izy saingy tsy tana intsony ny ainy», hoy ny nambaran’ny vehivavy iray nahita maso ny fitrangan’ny voina.
«Tsy nisy nahafantatra ny fianakaviany izahay teto fa ny namonjy azy fotsiny no natao. Ny kara-panondro tany aminy fotsiny no nahalalana ny tranony ka nisy olona nandeha nampilaza tany», hoy ihany io vehivavy io.

H.R

Asan-dahalo – Adzidà iray maty voatifitra teo amin’ny lohany

Rijakely — Sat, 18 May 2013 06:06:46 +0000

Zandary mitondra ny laharam-boninahitra adzidà iray no maty tsy tra-drano voatifitry ny dahalo, teo amin’ny lohany, tany Ankavandra, ny alin’ny alakamisy teo. Nanara-dia ireo dahalo avy nangalatr’omby no nahafaty azy.

«Rehefa tonga teo Ankavandra dia nizara roa ny lalan’ireo omby. Nizara roa ihany koa ireo mpanara-dia vokatr’izany. Nifanehatra tamin’ireo dahalo ny andiana mpanara-dia nisy ilay zandary voatifitra», hoy ny loharanom-baovao iray avy amin’ny zandarimaria any an-toerana.

«Mbola any an-toerana amin’izao fotoana izao ny razan’io zandary io. Mbola sarotsarotra ihany anefa ny hitondrana azy io avy any Ankavandra ho aty amin’ny vondron-tobim-paritry ny zandary aty Menabe ka nolazaiko ireo zandary any an-toerana hitondra ny razana ho any Belobaka», hoy ny nambaran’ny kolonely Manassé, lehiben’ny vondron-tobim-paritry ny zandarimaria, any Menabe.

«Raha ny vinavina dia mety ho amin’ny sabotsy no ho tonga aty Belobaka ny vatana mangatsiakan’io zandary io», hoy kosa ny nambaran’ny kolonely Rakotobe Christian, lehiben’ ny vondron-tobim-pileovan’ny zandary ao amin’ny faritra Bongolava.

H.R

Fanafihan-jiolahy – Jeneraly iray maty voatifitra, tsena roa voatafika

Rijakely — Fri, 17 May 2013 21:10:24 +0000

Nandriaka ny ra tetsy Ankaroabato, ny alin’ny alakamisy teo tokony ho tamin’ny 8 ora sy fahefany. jeneraly iray efa misotro ronono no maty notifirin’ny jiolahy nanafika tsena telo nifanesy. Niisa 9 izy ireo tamin’izany ary nanao fanamiana miaramila ny iray tamin’ireo jiolahy ireo sady nitondra basy. Poa-basy in’enina no heno teny amin’ny tanànan’Ankaraobato tamin’io fotoana io.

«Nanesy nanafika tsena roa ireo jiolahy ireo izay nitondra fiara tsy mataho-dalana iray. Nisy ramatoa nivoaka ny trano, satria mbola be olona nifamezivezy tamin’io fotoana io, kinanjo nambanan’ireo jiolahy tamin’ ny basy. Nikoropaka tamin’izany ilay ramatoa ka nitabataba sy niantsoantso. Izay no nitarika ireo jiolahy hitifitra», hoy ny nambaran’ny lehilahy iray mponina eo amin’ny manodidina ilay toerana nitrangan’ny fanafihana.

Tsena roa voatafika

« Nivoaka ilay jene-raly ka raha ny fahenoana azy dia nifamaly tamin’ ireo jiolahy izy. Tsy nifanara-kevitra izy ireo ka izay no nitifiran’ireo jiolahy azy. Lasan’ireo jiolahy tamin’izany ny basim-borona an’ity jeneraly ity », hoy ihany ny fitantaran’io lehilahy io.

Nikasa handeha hamaky tsena fanintelony ireo jiolahy no voalaza fa nifanehatra tamin’ilay jeneraly. « Vola Ar 1 tapitrisa mahery no azon’izy ireo tao amin’ilay tsena voalohany. Nifindra tao amina tsena iray hafa indray izy ireo avy eo ka 400 000Ar indray no azon’izy ireo tao », hoy ny vaovao voaray avy amin’ny polisim-pirenena.

Raha vao avy namono ilay jeneraly ireo olon-drasy dia nitsoaka nandositra. Natao ny fanarahan-dia saingy tsy mbola nisy tratra ireo jiolahy.

Haja Randrianantoandro

Fanatanterahana ny fifidianana – Notapahan’ny iraisam-pirenena ny famatsiam-bola ny Cenit

Rijakely — Fri, 17 May 2013 21:10:17 +0000

Niitatra hatramin’ny fanapahana tanteraka ny famatsiam-bola ny fifidianana ny fanapaha-kevitra noraisin’ny vondrona iraisam-pirenena manoloana ny mbola fizirizirian’ny Filohan’ny tetezamita, Andry Rajoelina sy ny amiraly Didier Ratsiraka ary i Lalao Ravalomanana ny hirotsaka ho kandidà amin’ny fifidianana filoham-pirenena.

Nambaran’ny filohan’ny vaomieram-pirenena misahana ny fifidianana ao anatin’ny tetezamita (Cenit), Béatrice Atallah fa «nampiato ny famatsiam-bolany ho an’ny Cenit i Frantsa sy ny Vondrona Eoropeana». «Misamboaravoara toy ny rano ny fiainam- pirenena. Tsy natory mihitsy ny tenako hatramin’ny omaly alina raha nandray ireo antso avy any Frantsa sy avy amin’ny Vondrona Eoropeana, nilaza fa tsy hisy intsony hatramin’ny famatsiam-bola ny fanontana ny biletà tokana», hoy izy nanoloana ny sasany amin’ireo kandidà tonga tetsy alarobia, omaly taorian’ny fotoana nampahafantarana azy ireo ny endrik’ilay biletà tokana hampiasaina amin’ny fifidianana filoham-pirenena.

Handresy lahatra

Tetsy ankilan’izay dia nilaza ny «tsy afa-manoatra fa tsy maintsy manaraka moramora io fanapaha-kevitra io» ihany koa ny mpandrindra ankapobeny ny fandaharan’asan’ny Firenena Mikambana, Fatma Samoura, omaly. «Ny asanay rehetra dia miankina amin’io famatsiam-bola avy amin’ny Vondrona Eoropeana io, ka raha misintona izany izy ireo dia tsy misy azonay hatao intsony afa tsy ny misintaka amin’ ny fanampiana ny cenit ihany koa», hoy izy, tetsy Alarobia.

Hatreto aloha dia mbola tsy tena nahazoam-baovao marim-pototra ny momba ny toe-bolan’ ny Cenit ahafahany manohy ireo asa fanomanana sy ny fikarakarana ny fifidianana. Ny tarehimarika farany azo hatreto dia ny nampiasana ilay vola mitentina Ar 4 620 tapitrisa, izay hoentina hanatontosana ny fifidianana filoham-pirenena.

Araka ny fantatra dia ny mety tsy hisian’ny fankatoavana iraisam-pirenena amin’io fifidianana io no tena itoeran’ny ahiahin’ny Cenit, indrindra raha ny iray amin’ ireto kandidà telo noraràn’ny iraisam-pirenena tsy hirotsaka amin’io fifidianana io no lany hitantana ny Repoblika faha-IV. Nambaran’ny Masoivohon’i Afrika atsimo, Gert Grobler, omaly tetsy Alarobia rahateo fa «mbola hisy ny ezaka hataon’ny iraisam-pirenena handresy lahatra ireo kandidà telo ireo tsy hirotsaka amin’io fifidianana io». «Raha tsy mahomby izany fandresen-dahatra izany dia ho hita eo ny tohin’ny raharaha», araka ny nomarihin’ity masoivohon’i Afrika Atsimo ity ihany.

Rahampitso rahateo dia hanainga ho any Etazonia hihaona amin’ireo tompon’ andraikitra ambony eo anivon’ny Firenena Mikambana ny filohan’ny Cenit, Béatrice Atallah. Aorian’izay dia mbola hisy ihany koa ny fihaonany amin’ireo
tompon’andraikitra eo anivon’ny Vondrona Eoropeana hanazava ny maha mety na tsia ny hirosoana amin’io fifidianana filoham-pirenena io.

Nanome roa andro

Nanome hatramin’ny anio ny mba «hitadiavan’ireo kandidà 41 ny marima-ritra iraisana amin’ny hirosoana na tsia amin’ny fifidianana filoham-pirenena», ny filohan’ny Cenit, Béatrice Atallah, omaly. «Manainga ny mpanao politika malagasy izahay mba hitady vahaolana haingana satria misamboaravoara toy ny rano ny fiainam-pirenena. Raha tsy tratra io fotoana io dia tsy maintsy halefa hatonta any Copenhague ny biletà tokana amin’ny endriny ankehitriny», hoy izy. Na dia eo aza izay fepetra napetraky ny filohan’ny Cenit, izay dia hita araka ny nambaran’ny Maître Hanitra Razafimanantsoa fa «tsy tokony hampitoviana amin’ireo kandidà hafa i Lalao Ravalomanana satria izy dia olona madio». «Tsy mbola niova tamin’ny fanapahan-kevitra noraisinay ny hanohana azy amin’io fifidianana io izahay», hoy ihany izy.
Ny eo anivon’ny ankolafy Ratsiraka aloha hatreto dia mbola nisafidy ny tsy haneho hevitra mihitsy mahakasika ity fahatapahan’ny famatsiam-bola ity. Handrasana anio izay tena ho fanapahan-kevitra horaisin’ny Filohan’ny tetezamita, Andry Rajoelina, izay hanatanteraka fisidihana any Nosy-Be Hell-ville anio.

Fiainana mpanakanto – «Tsy nisakaiza velively tamin’i Jerry Marcoss aho», hoy i Farah John’s

Rijakely — Fri, 17 May 2013 21:10:11 +0000

MPANDIHY SY MPIHIRA TAO ANATIN’NY TARIKA JERRY MARCOSS NO NAHAFANTARANA AN-DRASOLOFONJATOVO FARAH SAMÜELINE, NA FARAH JOHN’S, TALOHAN’NY NIKOPAHANY ELATRA IRERY TEO AMIN’NY SEHATRY NY MOZIKA. HEHY TSOTRA NO NAMALIANY NY FILAZANA FA NISAKAIZA TAMIN’I JERRY MARCOS IZY. NABORAK’I FARAH JOHN’S FA OLON-TIANY DIA TSY AO ANATIN’NY TONTOLON’NY MOZIKA MIHITSY.

Toy ny ankamaroan’ireo mpanakanto, dia fitiavana mozika hatramin’ny fahakely no nitarika an’i Farah John’s hiditra amin’ny sehatry ny mozika. Efa tao anaty rany ka notohizany tamin’ny fidirana ho mpikambana tao amin’ny antoko mpihira tany Vohemar, nanomboka teo amin’ny faha-8 taonany.

Rehefa feno 18 taona izy no niakatra teto an-drenivohitra. Tao anatin’ny faniriany ho mpihira, dia ny zaobaviny, vadin’ny zokiny lahy, no nifankahalala tamin’i Jerry Marcoss ka nampifanatona azy ireo. «Taorian’ny lozam-pifamoivoizana nitranga tamin’ ny tarika Jerry Marcoss, ny taona 2004 no tafiditra tao amin’ny tarika aho», araka ny fitadidian’i Farah John’s.
Nialoha izay anefa, efa nanana ny lazany teo amin’ny sehatry ny dihy tany Vohemar ary nivoy karazan-dihy maro tao anatin’ny tarika «Hells Angel’s», izay efa nahafantaran’ny maro azy ihany koa, na tamin’ny andron’ny sekoly na tamin’ireo fety ho an’ny fialan-tsasatra izy. «Tsy maintsy nandihy foana izahay isan’andro tamin’izany fotoana izany», araka ny fitantarany. Izay rahateo no nahatonga azy ho sady mpihira no mpandihy tao amin’ny tarika Jerry Marcoss. Ity farany no nahatsapa ny talentany ka nampirisika an’i Farah John’s hiroso lalindalina amin’ny sehatry ny mozika.

Nandeha ny resa-be

Nanomboka teo ny resa-be momba ny fiarahan’izy roa ireo. Tsy nahatohina an’i Farah John’s, raha napetraka taminy ny fanontaniana momba io resaka io. Sady nihomehy izy no namaly am-pahatsorana fa “tsy nisy mihitsy ny fisakaizana teo aminy sy i Jerry Marcoss”. “Mpiara-miasa izahay tany am-boalohany. Noho izy nanoro lalana ahy dia mandray azy ho toy ny raiko aho amin’izao fotoana izao”, hoy ihany izy.

Na dia nanomboka nahaleo tena aza i Farah John’s ny 2009, ka namoaka ilay hira “za tsy kivy”, dia mbola mitohy ny fifandraisany tamin’i Jerry Marcoss. “Hatramin’izao rehefa misy zavatra atao, dia tsy mitsahatra ny manontany sy maka hevitra aminy aho. Izy rahateo manoro sy manome hevitra amin’ny mozika ataoko”, araka ny fanampim-panazavan’ity andriambavilanitry ny gadona mihetsiketsika ity.

Na izany aza, niezaka ny nanana ny naha izy azy hatrany i Farah John’s teo am-panohizana nitrandraka ny gadona Antôsy, raha ny salegy sy ny kawitry no tena niarahany tamin’i Jerry Marcoss.

Ny olon-tiany

Na mbola tsy manambady aza i Farah John’s, dia manana ny olon-tiany izy. Nomarihiny fa tsy ao anatin’ny tontolon’ny mozika mihitsy ny asa ataon’io lehilahy nambabo ny fony io, eny fa na dia efa nahare ny resaka miely tamin’ny hoe fiarahan’i Jerry Marcoss sy Farah John’s aza ralehilahy. “Tezitra kely ihany izy tany am-boalohany fa rehefa nohazavaina taminy dia azony ihany ny zava-misy”, hoy indray i Farah John’s, raha namaly momba izay mety ho fahasarotam-piaron’io olon-tiany io.
Nomarihiny anefa fa saro-piaro kely aminy ihany ity andrianin’ny fony ity ary misy aza ny fihetsika mitranga mahasorena an’i Farah John’s indraindray. Momba izay dia naborany fa “anisan’ny mahasorena azy ny fandefasany hafatra amin’ny finday tsy misy farany any aminy, indrindra rehefa manao seho takariva na mampandihy izahay”. Notsindriany fa “asa anie ny atao any fa tsy misy zavatra hafa atao akory”.

Vehivavy mihanta i Fara John’s amin’ny fiainana andavanandro. Noho ny olona miara-mipetraka aminy mampihanta azy tamin’ny lafiny maro, dia tsy manao na inona na inona izy rehefa ao an-trano. Izy rahateo dia tsy tia mivoaka matetika ny trano fa rehefa tsy misy atao dia anisan’ny fialamboliny ny mijery fahitalavitra. “Ireny horonantsary fanadihadiana ireny no tena ankafiziko”, hoy i Farah John’s.

Tia lamaody

Toy ireo andriambavilanitra mpanakanto, dia manaraka ary manana ny lamaodiny ihany koa i Farah John’s. Ho an’ny fitafiana fitondra eny an-tsehatra, ohatra, dia anisan’ny ankifiziny ary tena ahafantarana azy ny fanaovana “short” fohy. “Mahazo aina kokoa aho amin’ireny fitafiana ireny, hoy izy, ary malalaka kokoa ny vatana amin’ny fihetsika sy ny dihy atao”.
Amin’ny andavanandro kosa anefa, rehefa tsy eny an-tsehatra izy dia ny pataloa “jean” no tena fitondrany. Noho izy tsy dia tia mivoaka loatra, satria dia anisan’ny manelingelina azy ny mason’ireo mpitazana, dia saika amin’ny fandehanany any ivelany no ividianany ireo fitafiana. “Tena efa marobe ny ankajoko ao ary efa tsy omby ny lalimoara intsony”, hoy i Farah John’s.

Ny tsy itovizany amin’ireo andriambavilanitra hafa anefa dia ny tsy fisoloana akanjo matetika mandritra ny fampisehoana. Nanazava izany ity mpanakanto ity ary nanamarika fa “tsy foiko ireo mpijery rehefa miakatra ny aingam-panahy, ka tsy te handao azy ireo matetika aho”.

Nanamarika ny fiainan’i Farah John’s ny sehatry ny mozika ary anisan’ireo tsy afaka ao an-tsainy ny fampisehoana voalohany nataony tany Vohemar, tanàna nihaviany tamin’ny 2011 ka niarahany nitsinjaka tamin’ireo mpijery nahatratra 10 500 nanoloana azy. Toy izany koa ny tany Farafangana, izay nambarany fa zara raha nihira izy nandritra ny fampisehoana fa saika ireo mpijery avokoa no niventy ny vazo rehetra.

Nandevin-joky

Tany Vohemar ihany koa anefa ny fahatsiarovana ratsy indrindra ho azy satria ny 9 janoary 2011, daty tokony hanaovany ny fampisehoana voalohany tany an-toerana no daty nandevenana ihany koa ny zokiny vavimatoa. Nofoanana ny fampisehoana na dia efa nandeha iray volana sy tapany aza ny dokam-barotra fampahafantarana izany seho izany. “Ny tena nampihetsi-po dia marobe ireo mpankafy no nanotrona anay tao anatin’ ny fahoriana”.

26 taona i Farah John’s ankehitriny ary efa ao anatin’ny eritreriny ny hiroso amin’ny fanambadiana. Anisan’ny tena tiany rehefa ao anatin’ ny tokantrano ny ho maro anaka ka niresahany fa 10 mianadahy izy ireo ary izy no faravavy. “Hitako ary tsapako ny fahamaroan’ny ao an-trano ka tiako raha enina mianadahy no isan’ny zanako, telo lahy sy telo vavy”, hoy izy.
Eo am-piandrasana izay anefa, dia raisin’ity mpanakanto ity ho toy ny fianakaviany ireo mpikambana ao amin’ny tarika. “Tsy maintsy mahita ireo mpitendry sy mpihira ary mpandihy miaraka amiko aho, intelo na inefatra isan-kerinandro farafaharatsiny”, hoy izy. Misy nefa ny fitsipi-pitondran-tena ifanarahany amin’ireo iray tarika aminy, ka anisan’ny tena mahasarotiny ary mahatezitra azy ny tsy fahamatorana sy ny fandisoana fotoana. “Ny fombako rehefa tezitra aho dia tsy miteny mihitsy. Rehefa izay no mitranga dia mahalala daholo ireo ankizy ireo fa nisy zavatra nahatezitra ahy tao”.

Anisan’ny ahafantarana an’i Farah John’s ny fahaizany manentana ireo mpijery ary matetika no mahavita kilaometatra vitsivitsy amin’ny hazakazaka madinika sy fivezivezena eny an-tsehatra izy. “Rehefa reraka aho dia malaina mihinan-kanina. Na izany aza anisan’ny tena ankafiziko ny sakafo miaraka ain’ny voasary makirana”, araka ny filazany.

Nangonin’i Faly Randriamiarantsoa

CONFIANCE

Isan’andro anao magnotany e!

Est-ce que zaho tia?

Tsy aiko izay mbola hitranga!

Fagniriako mba ho doria

Zaho koa tara mody

Anao efa tsy matoky

Aiko fitapitaka, fa zaho sy mankasitraka

Réf:

Eh eh, Confiance tiako

Ouh ouh confiance Cheri

Confiance tiako, confiance cheri

Matokisa zaho ô amin’ny zaka jiaby

Confiance tiako, confiance cheri

Matokisa zaho ô, zaho tsy ampirafy

Mahazo magnantena

Fa zaho tsy tia tegna

Anao koa falifaly

Zaho mba tsy mijaly

Tsy aiko na fantatrao

Zaho tsy tia hiala anao

Tsy volagna zaka maro

Sao atao be kabaro

Réf

Herinandron’ny ati-vava – Mety hahafaty ireo ankizy madinika ny areti-nify

Rijakely — Fri, 17 May 2013 21:10:06 +0000

Tsy tokony hatao tsinontsinona. Matetika no sokajian’ny olona ho toy ny aretina madinika ny aretin’ny ati-vava sy ny areti-nify. Isan’ny aretina mety hahafaty haingana, indrindra ho an’ireo ankizy madinika anefa ity aretina ity. Nivoitra izany omaly nandritra ny fankalazana ny herinandrom-pirenena momba ny fahasalaman’ny ati-vava sy ny nify, natao tany Imerin’Imady, distrikan’Ambositra.

“Betsaka sady maro karazana ny areti-nify ary misy mahafaty mihitsy. Ilay karazana areti-nify atao hoe “noma”, izay aretin’ny ati-vava tena mpahazo ny ankizy no mety mahafaty”, araka ny nambaran’ny Dr Ranivoharilanto Eva, lehiben’ ny sampan-draharahan’ ny fahasalaman’ny nify sy ny ati-vava, eo anivon’ ny minisiteran’ny Faha- salamam-bahoaka. Antony maro no fantatra fa ahazoana io aretina io saingy mampivoatra azy kosa ny aretin’ny ankajo- nify sy ny tsy fanjarian-tsakafo ary indrindra ny aretina mandoaka nify (carie).

Ity aretina farany ity no tokony hosorohina satria nahitana fiakarany ny olona voany. “80%-n’ ny ankizy no efa manana nify loaka. Miakatra 90% izany eo amin’ny faha-5 taonany ary tafakatra hatramin’ny 98% izany any amin’ireo olon-dehibe 35 taona ka hatramin’ny 44 taona”, araka ny tatitra avy amin’ny minisiteran’ ny Fahasalamana.

Nivoitra tamin’ny fanentanana omaly ny tokony hiborosiana ny nifin’ny ankizy raha vao mihinana karazan-tsakafo. Tsara ihany koa ny mitsabo nify indray mandeha isam-bolana.

Lilia Rajaonah

Afa-doza – Lehilahy iray tavela adiny valo tao anatina kamiao nivadika

Rijakely — Fri, 17 May 2013 06:49:25 +0000

Adiny valo vao afaka tao anatin’ilay kamiao nitondra azy ka nivadika teny Iavoloha, omaly vao maraina be, tokony ho tamin’ny 3 ora ny lehilahy iray. Kamiao lehibe nitondra ovy hoentina hamidy any avaratra io tra-doza io.

«Olona efatra izy ireo no tao anaty fiara fa afaka nivoaka ireo olona telo dia ny mpamily sy ny mpanampy azy ary olona iray hafa. Ity olona fahefatra ity kosa no tavela tao», hoy ny fanazavana azo avy amin’ny zandarimaria, etsy Andoharanofotsy.
«Tratry ny torimaso fotsy ilay mpamily kinanjo nisy fiara nandalo tampoka. Niezaka niala ilay fiara izy ka izay no nampivadika ny fiara noentiny, fiolahana rahateo teo amin’ilay toerana», hoy ihany ny fanazavan’ny mpitandro ny filaminana.

«Nifanome tanana nisikotra io lehilahy io tao anatin’ilay fiarabe ireo olona teo amin’ny manodidina sy ny mpamonjy voina ka tokony ho tamin’ ny 11 ora vao afaka tao ity farany», raha ny nambaran’ ny tatitry ny zandarimaria hatrany.

Tonga teny an-toe-rana ny zandary avy eo ka ny nanala ilay fiara niteraka fitohanana no nataony sady nanadihady ny mpamily mikasika izay nahatonga ny loza.

H.R

Namontana – Fisaka ny lohan’ilay lehilahy tra-doza tamin’ny môtô

Rijakely — Fri, 17 May 2013 06:40:15 +0000

Ranomaso no nameno ny tranom-patin’ny hôpitaly Joseph Ravoahangy Andrianavalona. Lehilahy iray, 30 taona, nitondra môtô no maty tsy tra-drano nifatratra tany amina fiara kamiao iray omaly antoandro tokony ho tamin’ny 12 ora teny Namontana. Nahatsiravina ny nijery ny loza satria dia fisaka tao anatin’ilay aroloha nanaovany ny lohan’ity mpitondra môtô ity. Ny zandrin’ilay namoy ny ainy irery no nanaraka azy teny amin’ny tranom-paty tao aorian’ny voina ka saika tsy nahazo nampanginina ity farany nijery an-jokiny.

«Môto lehibe natao ho an’olon-droa no nentin’ity lehilahy ity, izany hoe tsy maintsy olona manana fahazoan-dalana hitondra fiara no afaka mitondra azy», hoy ny fanazavana azo avy amin’ ny biraon’ny polisy misahana ny lozam-pifamoivoizana.
«Kamiao iray no nanaraka ilay môtô ary azo antoka fa nikasoka tamin’ilay fiara izy ka nianjera ary nidona tamina sarety iray nitondra entana nijanona teo amin’ny sisin-dalana», hoy ny fitantaran’ i Honoré, lehilahy iray mpivarotra ao amin’ny tsenan’
i Namontana, akaikin’ilay toerana nisehoan’ny loza.

«Raha vao niseho io loza io dia najanon’ilay mpitondra kamiao ny fiara noentiny ka avy hatrany izy dia nanatona biraonay ary nitondra polisy nijery ilay loza. Natahotra fitsaram-bahoaka rahateo ihany koa izy», hoy ihany ny fanazavan’ny polisy avy ao amin’ny birao misahana ny lozam-pifamoivoizana. Teny an-dalana hamonjy hôpitaly no namoy ny ainy ilay lehilahy nitondra môtô.

Haja Randrianantoandro sy Rindra Rabeharimahazo

Tapatapany

Rijakely — Fri, 17 May 2013 06:29:14 +0000

Fifaninanana.
Ny sabotsy 25 sy ny alahady 26 mey ho avy izao no fantatra fa hanatanterahana ny fifaninanana hidirana ho zandary. Isaky ny vondron-tobim-paritry ny zandary rehetra manerana ny Nosy no hanaovana ity fifaninanana ity.

An-tsokosoko.
Sambo efatra no voalaza fa saika hanondrana andramena sy hazo sarobidy hafa an-tsokosoko tany Ambodirafia Antalaha, raha ny tatitra azo avy amin’ny «Alliance Voary Gasy». Rehefa nanontaniana mikasika ity tranga ity ny zandary any an-toerana dia nilaza fa mbola tsy naharay vaovao mahakasika izany.

Hain-trano – Ar 128 tapitrisa no nafoy tao amin’ny tsenan’Ambohijatovo

Rijakely — Fri, 17 May 2013 06:29:12 +0000

Omaly no fantatra ny tombam-bidin’ireo entana may tao amin’ny tsenan’Ambohijatovo, ny alin’ny talata. Mahatratra hatramin’ny 128 tapitrisa ariary izany, araka ny fantatra. Tranoheva manodidina ny 32 no may, araka ny tatitra voarain’ ny filohan’ny fokontany Ambohijatovo-Mandrosoa. Fipoahana tao amin’ny iray tamin’ireo tranoheva no anton’ny loza, araka ny voalaza tamin’ilay tatitra ihany.

«Araka ny tatitra voaraiko tamin’ny delegen’ny tsena dia nisy fipoahana tamin’ny iray tamin’ireo tranoheva may ireo tokony tamin’ny 10 ora alina. Nitarika firehetana izany avy eo ary niezaka ireo mponina teo amin’ny manodidina nanondraka rano tamin’ny siny saingy vao mainka toa nahazo hery ilay afo», hoy Rahariarisoa Michel, filohan’ny fokontany Ambohijatovo-Mandrosoa.

Tsy manantena na inona na inona

«Aleonay hamboarina tsikelikely ny tranoheva nisy ireo tsena satria io no mba fitadiavam-bolanay. Raha hiandry ny fanjakana izahay dia mety ho very fanentanana eo ihany fa fifidianana izao no mahamaika azy ireo. Mikasika ny anton’ny afo indray dia tokony hisy ny porofo mazava ilazana izay trano heva niantombohan’ny afo marina. Na izaho koa aza dia mitady izay fahamarinana izay», hoy kosa Rasonitarika Berthe, isan’ny tompon’ny 80%-n’ireo entana may tao amin’ny tranoheva fivarotana enta-madinika sy hani-masaka teny Ambohijatovo. Izy no tena voa mafy indrindra.

Ranaivoson Faniry

Tsenan’Anosibe – Mpanendaka roa lahy tratra ambodiomby

Rijakely — Fri, 17 May 2013 06:29:07 +0000

Lehilahy roa efa nampitaraina ny mponina sy ny mpivarotra eny Anosibe amin’ny harom-paosy sy ny fanendahana no nosamborin’ny polisy avy amin’ny Boriborintany fahadimy avy etsy Mahamasina, afak’omaly. 21 taona ny iray raha vao 17 taona kosa ilay faharoa.

Efa nandrasam-potsiny izy ireo araka ny fampitam-baovao avy amin’ny polisim-pirenena noho ny fitarainana maro voarain’ ny mpitandro ny filaminana.

« Nisy olona nanome vaovao ny polisy ka rehefa tonga teny an-toerana dia tratra teo am-panaovana ny asa ratsiny izy ireo teo amin’ny toe-rana fiantsonan’ny fiara, manakaiky ny tsena », hoy ihany ny fampitam-baovao avy amin’ny polisim-pirenena.

R.F

Fisintahana tsy ho kandida – Nanaovan’ny Vondrona Afrikanina tsindry manokana Rajoelina

Rijakely — Fri, 17 May 2013 06:28:36 +0000

Vao mainka nasiaka kokoa noho ny fanambaran’ny Vondrona Eoropeana sy ny «Troïka», rafitra mpanatanteraky ny Vondrona Sadc, ny fitakiana nataon’ny Filankevi-pilaminan’ny Vondrona Afrikanina (Cps) ny amin’ny tokony hisintahan’ny Filohan’ny tetezamita, Andry Rajoelina sy ny Filoha teo aloha, ny amiraly Didier Ratsiraka ary i Lalao Ravalomanana amin’ny fifidianana filoham-pirenena.

Araka ny fahitan’ny Cps azy dia «tena manasarotra tanteraka ny ezaka efa vita mahakasika ny famoahana an’i Madagasikara ao anatin’ny krizy politika, indrindra fa ny momba ny fifidianana ny zava-misy». «Toe-javatra izay hampitarazoka ny krizy sy mety hitera-doza ho an’ny filaminana eto Madagasikara», araka ny voafaritra ao anatin’ny fanambaràna navoakan’izy ireo omaly taorian’ny fivoriana tany Addis-Abeba, renivohitr’i Éthiopie.

Noavahan’ny Cps sy tena voatsindrom-paingotra manokana tao anatin’ity fanambaràna ity ny Filohan’ ny tetezamita, izay nambaran’izy ireo fa «tsy nanaja ny teny nomeny, taorian’ny tsy firotsahan’ny Filoha teo aloha, Marc Ravalomanana».

Notsindrian’ny Cps fa «ny foto-kevi-dehibe ijoroan’ ny Vondrona Afrikanina dia mandrara ny firotsahan-kofidian’olona iray tafakatra teo amin’ny fitondrana tamin’ ny fomba tsy mifanaraka amin’ izay voafaritry ny Lalàm-panorenana». Tsy nijanona hatreo anefa fa efa karazana fampitandremana mihitsy no nataon’ity Filankevi-pilaminan’ny Vondrona Afrikanina an’ireto kandidà telo ireto raha toa ka mbola misisika ny hirotsaka amin’io fifidianana io ihany izy ireo .

« Mety hanohintohina ireo ezaka efa vita hatramin’ izay ny tsy fanarahana ny fepetra notakian’ny Vondrona Sadc raha tsy misy ny fitandre- mana», hoy izy ireo.

J.R

Lasa «mpioko» ny mpandraharaha

Rijakely — Fri, 17 May 2013 06:28:32 +0000

I Marc Ravalomanana no isan’ny nanokatra ny lalana ho an’ireo mpandraharaha ara-toekarena nangetaheta fahefana teto Madagasikara, raha nandrombaka ny sezan’ny Ben’ny tanànan’Antananarivo renivohitra tamin’ny fifidianana ny volana desambra 1999. Na tsy dia be mpahafantatra aza izy, dia nanomboka nahalala ity Filoha mpanorina ny orinasa Tiko ity ny Malagasy. Ireny raketin’ny tantara ireny ny diany teo amin’ny sehatra politika, ny firoboroboan’ny fandraharahany, indrindra taorian’ny nahalany azy ho Filoham-pirenena nandritra ny fifidianana niteraka krizy, tamin’ny taona 2001, nitohy hatramin’ny taona 2002. Niitatra ho lasa vondrona nivelatra tamin’ny sehatra maro ny orinasa Tiko. Mampahomby ny fandraharahana izany ny fanaovana politika, indrindra fa raha tonga amin’ny fahefana faran-tampony! Saingy niaraha-nahita ihany koa ny niafarany sy ny fanaovana sesin-tany ny tenany hatrany Afrika Atsimo…

Toa lasa fitaratra sy soa fianatra ihany anefa rangahy io. Maro no nanaraka ny diany, fa ankoatra ny naha-mpikosoka kapila manjelatra (DJ) tena nahalalana azy, dia tsy tokony hohadinoina fa tena mpandraharaha i Andry Rajoelina. Na teritery, na paika hanangoronan-karena no nanosika an-dRavalomanana hanao politika, dia isan’ny antony (ankoatra izay voalaza fa hery teto an-toerana na tany ivelany) nanosika an-dRajoelina hananika ny avo ny antsojay nanaovan’ny fitondran-dRavalomanana azy. Lasa mpioko ny mpandraharaha.

Mitombo ny filaharana ankehitriny, ho an’ireo mpandraharaha mirotsaka eo amin’ny sehatra politika. Ao ny te ho Filoham-pirenena, ny te ho Depiote, ny te ho Ben’ny tanàna, sy ny sisa. Iza anefa no mpandraharaha ara-toekarena, tafiditra lalina amin’ny tontolo politika, ka tsy hampiasa ny fahefana ananany mba hitadiavany tombontsoa ho an’ny orinasany? Mora lazaina eo imolotra, saingy sarotra inoana ny fahadiovan-tanan’ireo «mpandraharaha politika» na koa hoe «mpanao politika ara-toekarena», rehefa azony ny fahefana.

Tsy misy foronina ireo tranga ireo fa samy niaiky niara-nahita isika. Fa ankoatra ireo te hangoron-karena, dia misy ny voatery noho ny fahalotoan’ny fandraharahana sy ny fitsipi-dalao. Raha tsy nisy izany, mety mba samy haka ny tena toerany sy hanohy ny tena asany ny tsirairay, fa tsy hilingilingy hikendry avo kanefa raha voa eo dia mianjera fanina mitsirepirepy mihitsy. Anontanio anie rangahy iny na dia mbola tsy fay aza e!

Rina Rasoava

Misaona ny tontolo politika – Nodimandry tany Paris ny pasitera Andriamanjato Richard

Rijakely — Fri, 17 May 2013 06:15:46 +0000

Nodimandry teo amin’ny faha-83 taonany, omaly tany Paris, ny mpitandrina Andriamanjato Richard Mahitsison. Noho ny fihombon’ny aretina nahazo azy dia voatery niala teto an-tanindrazana noentina notsaboina haingana tany Frantsa ity mpanao politika fanta-daza ity.

Teraka tany Mahitsy tamin’ny 31 jolay 1930 Andriamanjato Richard ary io toerana nahalatsahan’ny tavoniny io no nahatonga an’ilay fanampin’anarany: Mahitsison.

Saika nanana andraikitra hatrany tamin’ireo Repoblika nifandimby ny pasitera Andriamanjato Richard. Tamin’ny taona 1958 izy no voafidy ho Ben’ny tanànan’ Antananarivo ary nisahana io andraikitra io hatramin’ny taona 1977. Filohan’ny antoko Akfm ihany koa izy tamin’ny 1958, ary nanangana ny Akfm Fanavaozana ny taona 1989. Lohandohan’ny mpisorona teo anivon’ny «Herivelona Rasalama» ny tenany tamin’ny 1991, izay nisiana he-tsika ho fanonganana ny fitondran’ny amiraly Ratsiraka. Voatendry hitarika ny komity ho amin’ny fanarenana ara-toekarena sy sosialy izay rafitra tetezamita natsangana tamin’ny 1991 ka nifarana tamin’ny 1993 ny tenany. Voafidy ho depiote teto Antananarivo renivohitra izy ny volana jona 1993 ary lasa filohan’ny Antenimierampirenena hatramin’ny taona 1998. Nialoha izay dia efa mpikambana tao amin’ilay Filankevitra farantampon’ny tolom-piavotana teo anelanelan’ ny taona 1977 ka hatramin’ny 1989 ny pasitera Andriamanjato Richard. Teo amin’ny sehatry ny finoana dia nitandrina tao amin’ny fiangonana Fjkm Ambohitantely ny tenany nanomboka tamin’ny volana desambra 1957. Ny taona 1959 ihany koa izy no voatendry ho talen’ny Kolejy protestanta Rasalama ary nitana io andraikitra io an-taonany maro nialohan’ny nandehanany nisotro ronono.

J.R

Sombiny

Rijakely — Fri, 17 May 2013 06:15:07 +0000

FILOHA VAOVAO> Amin’ny 22 mey izao no hiroso amin’ny fifidianana izay hisolo toerana ny filohan’ny Filankevitra ambonin’ ny tetezamita, ny jeneraly Dolin Rasolosoa ireo mpikambana eo anivon’ity Andrimpanjakana mpanao lalàna ity. Mpikambana Cst 54 no nandatsa-bato teny Anosy omaly, ka ny 28 amin’ ireo no nisafidy ny datin’ny alarobia 22 mey, ny 24 kosa nisafidy ny datin’ ny 29 mey.

TSY MATOTRA> Tsy dia nankasitraka loatra ny fanapahan-kevitry ny governemanta tamin’ny fanemorana ny fe-potoana ahafahana mametraka ireo antontan-taratasy firotsahan-kofidiana ho solombavambahoaka i Harijaona Randriarimalala. Mampiseho tsy fahamatorana eo amin’ireo tompon’ andraikitra izay nampisahanina ny raharaham-pifidianana io fanapahan-kevitra io raha ny hevitr’ity kandidà amin’ny fifidianana solombavambahoaka eny Atsimondrano ity. Omaly no nanatitra ireo antontan-taratasy ilaina amin’izany, tetsy amin’ny CED Tsaralalàna ity mpandraharaha ity.

Dodona

Rijakely — Fri, 17 May 2013 06:14:24 +0000

Lasa nankato sy nanaiky tampoka an’ilay Lalàm-panorenana nolaniana tamin’ny taona 2010 ny filohan’ny Kaongresin’ny tetezamita, Mamy Rakotoarivelo. Ny tenany mihitsy no voalaza fa nidrikina nitaky ny hampiharana ny andininy faha-166 ao anatin’ny Lalàm-panorenana manoloana ny adihevitra mahakasika ny fitantanana ny firenena aorianan’ny fametraham-pialan’ny Filohan’ny tetezamita. Hatreto anefa dia toa tsy nitompo afa-tsy tamin’ilay sori-dalana naroson’ny vondrona Sadc ity mpanao politika akaiky ny Filoha teo aloha, Marc Ravalomanana ity. Impiry impiry moa no tsy nanambaran’izy ireo fa tsy misy Lalàm-panorenana manan-kery izany eto? Izao anefa dia nitsimbadika indray ny rasa. Fikatsahana tombontsoa miharo faniriana fahefana avokoa no ao ambadik’izany. Izany hoe hitantana firenena (na dia tsy nisy nifidy aza) izany kosa ve moa tsy hahadodona? Tanteraka ihany ny faminanian’ny pasitera Mailhol fa olon-kafa fotsiny ireo hapetraka ho Filoha fa tsy ny tenany.

Fitantanana telo loha – Harafitra ho lalàna mihitsy ny fitsipi-dalao

Rijakely — Fri, 17 May 2013 06:13:17 +0000

Tsy amin’ny alalan’ny hitsivolana indray fa hamolavolana lalàna manokana mihitsy ny ho fipetrapetraky ny fitantanana ny tetezamita hiarahan’ ny Praiminisitra Omer Beriziky sy ny filohan’ny Kaongresy, Mamy Rakotoarivelo ary izay ho filohan’ny Filankevitra ambonin’ny tetezamita, aorian’ny fialan’ny Filohan’ny tetezamita, Andry Rajoelina eo amin’ny toerany.

Io no nifanekena tao anatin’ny fivorian’ny efa-tonta teny amin’ny lapan’ Iavoloha, omaly hariva. Hatreto aloha dia mbola tsy nahazoam-baovao marim-pototra ny fomba firafitr’ity volavolan-dalàna ity. Anio maraina no hatolotra hodinihina sy handalo fankatoavana eo anivon’ny Filankevitry ny minisitra izany, ka aorian’ izay no hanolorana azy ny Parlemantan’ny tetezamita.

Nizotra tao anatin’ny filaminana tanteraka ity fivoriana omaly ity na dia voalaza aza fa «nikiry mafy ny amin’ny tokony hampiharana fotsiny ny andininy faha-166 ao anatin’ny Lalàm-panorenana izay manome fahefana tanteraka azy telo mirahalahy ireto hitantana an-kalalahana ny raharaham-pirenena ny filohan’ny Kaongresin’ny tetezamita».

Fanadinana BEPC – Hanomboka amin’ny 27 mey ny adina ara-panatanjahantena

Rijakely — Fri, 17 May 2013 06:07:18 +0000

Eto Mahamasina sy Alarobia ary Nanisana no handray ny fanadinana fanatanjahantena amin’ny Bepc

Tokony efa hiomana amin’ny fiatrehana ny fanadinana ara-panatanjahantena ireo mpiadina Bepc. Hanomboka amin’ny alatsinainy 27 mey ka hatramin’ny 30 mey ny anjaran’izy ireo. Hitohy ny alatsinainy 3 jona izany ka hatramin’ny 7 jona. Hitsinjara amina kianja telo ireo mpiadina manodidina ny 27 000 araka ny vaovao avy amin’ny fari-piadidiam-pampianarana Antananarivo reni- vohitra, dia ny kianjan’i Mahamasina sy Nanisana ary Alarobia.

“Iangaviana mba hijery tsara izay voasoratra amin’ ny taratasy fiantsoana, milaza ny daty sy ny toerana hanaovana ny fanadinana, ireo mpianatra mba tsy ho diso fotoana. Tokony ho tonga 30 minitra mialohan’ny fanombohan’ny adina ireo mpianatra. Ny taranja lomano no hamaranana ny fanadinana ny 22 jona etsy Ampefiloha”, hoy i Voahanginirainy Jeanne, avy amin’ny Cisco Antananarivo.

Efa samy naka ny taratasy fiantsoany avokoa ny anka- maroan’ny tompon’andraikitry ny sekoly. Azon’ny mpianatra atao tsara araka izany ny manantona avy hatrany ny ivon-toeram-pianarana mba ahafahany miomana.

Fifamoivoizana an-drenivohitra – Taratasina fiara miisa 500 nogiazana tao anatin’ny 45 andro

Rijakely — Fri, 17 May 2013 06:07:01 +0000

Tsy manara-dalàna daholo. Ahitana tsy fanarahan-dalàna hatrany eo amin’ireo fiara mifamezivezy eto an-drenivohitra. Tsy ny taksibe sy ny fiarakaretsaka ihany no manao izany fa eo ihany koa ny fiaran’olon-tsotra.

« Nahatratra 500 ny taratasina fiara notanana nanomboka tamin’ny volana avrily ka hatramin’izao. Tsy fijanonan’ny taksibe amin’ny toeram-piantsonana no tena betsaka amin’ireo. Eo ihany koa ny hadisoan’ny fiaran’olon-tsotra, mijanona amin’ny toerana tsy natokana ho amin’izany », araka ny tatitra avy amin-dRandrianavalona Harivelo, lehiben’ny polisy monisipaly.

Hita tamin’ireo fiara 500 ireo avokoa ny karazana tsy fanarahan-dalàna rehetra. Taksibe 40 no tsy nanana «carte grise», ary enina no tsy nanana taratasy fahazoan- dalana hamily fiara ny mpamily. Nisy tamin’ ireo fiarakaretsaka ihany koa no mbola niasa, izay miisa 40, nefa efa lany daty ny taratasy fizahana. Fiaran’olon-tsotra 45 indray no tratran’ilay fiketohana vy amin’ny kodiarana. Nahitana ireny kamiao madinika ireny miisa 10 indray nogiazana, tetsy Mahamasina, ka tao ireo tratra nitatitra vovo-tany sy potika biriky tsy nisy fahazoan-dalana. «Tafiditra ao anatin’ireo taratasy nogiazana ireo ihany koa ny an’ny môtô nanao hadisoana, ka 15 tsy nanao aro loha sady mandeha amin’ny lalan-tokana tsy azo ifanenana», raha ny tatitra hatrany.

Lilia Rajaonah

Fetin’ny Pantekosta – Ho tsara sady hafana ny faran’ny herinandro

Rijakely — Fri, 17 May 2013 06:04:48 +0000

Tsara andro. Hilamina indray ireo manana fikasana hitsangantsangana mandritra ny fetin’ny Pantekosta. Hanomboka hafana indray mantsy ny andro ary hisinda ihany koa ny erika, raha ny fampitam-baovao avy amin’ny sampan-draharaha mpamantatra ny toetr’andro.

“Hiova hiakatra kely indray ny mari-pana manomboka rahampitso. Mety haharitra eo amin’ny efatra andro eo izany hafanana izany ka hiverina amin’ny volon’ andro mangatsiaka kely avy eo. Tsy hisy ihany koa ny erika noho ny fisindan’ny rivotra
mangatsiaka avy amin’ ny tsioka atsimo. Mbola ao anatin’ny vaninandro manasara-taona ihany anefa isika”, araka ny tombana avy amin’io sampan-draharaha io.

Amin’ny maha tombana sy vinavina azy anefa dia nampitandrina hatrany ny teknisiana fa tokony hivonona hatrany ny rehetra satria mety hisy fiovaovana ny toetr’andro.

Kitra lalaovin’olona fito – Sambany nibata omby ny FC Papa Antaniavo

Rijakely — Fri, 17 May 2013 06:00:20 +0000

Ilay ekipan'ny FC Papa, avy eny Antaniavo sy ireo mpikarakara ilay tournoi

Tamin’ny taona 2010 no niforona ny ekipa mpanao baolina kitra FC Papa, avy ao amin’ny fokontanin’ Antaniavo Antanimena. Voalohany tamin’ireo fifaninanana telo efa nandraisany anjara no nivoahany ho mpandresy, tamin’ilay “Tournoi Firaisankina”, nifarana ny 5 mey teo ka nandreseny ny FC Garage, tamin’ny lalao famaranana tao amin’ny kianja Ylang Ylang, ao Vassacos.
“Ny antsasaky ny omby azonay dia nozaraina tamin’ny mpilalao, ny ambiny kosa nozaraina tamin’ny mpanohana. Samy nitondra kely hena iray kilao sy sasany nody ny tsirairay”, hoy Andriamanalinarisoa Hery, filohan’ny FC Papa sady mitana ny toeran’ny lohalaharana.

Saika mpiara-monina, samy efa miasa ary samy efa raim-pianakaviana 35 hatramin’ny 43 taona, mpitia kitra lalaovin’olona fito izy 28 lahy mandrafitra ny ekipa.

B.A

Tenisy « Coupe Davis » – Hiady voalohany amin’ i Namibia i Madagasikara

Rijakely — Fri, 17 May 2013 05:59:52 +0000

Jean Jacques Rakotohasy kalazalahy amin’ny tenisy malagasy

Nataon-dry Jean Jacques Rakotohasy na Zakakely tsy nisotro rano mihitsy ny ekipan’i Rwanda, omaly, teo amin’ny lalao voalohany natrehantsika tamin’ny Coupe Davis, ho an’ny vondrona III, atao any Egypta. Nomontsanin’ny ekipa malagasy 3 no ho 0 i Rwanda, tao amin’ny kianjan’i Le Caire, ho an’ ny vondrona C ary hifanandrina amin’ny lohany eo amin’ny vondrona A kosa i Maraoka, Alzeria ary Cameroun.

Marihina fa i Rwanda dia efa resin’i Namibia 3 no ho 0 ihany koa, ka ity farany no hiady ny laharana voalohany amintsika. Ho an’ny lalao natrehan’ny Malagasy tamin’ny Rwanda omaly, dia lavon’i Jean Jacques Rakotohasy tamin’ ny seta 2 no ho 0 (6/4, 6/0) i Dieu-Donné Habiyambere. Seta 2 no ho 0 (6/1, 6/3) ihany koa nanilihan’i Antso Rakotondramanga an’i Jean Claude Gasigwa, izay laharana faha-1 780 eran-tany. Mbola seta 2 no ho (6/2, 6/2) ihany koa no nandavoan-dry Ando Rasolomalala sy Tony Rajaobelina an’i Hamissi Gatete sy Mubaraka Harerimana, teo amin’ny olon-droa miaraka.

Roméo Andriamihaja

Handball – Hiatrika ny famaranana ny HBC Ihorombe sy Atsinanana

Rijakely — Fri, 17 May 2013 05:57:12 +0000

Nivoaka omaly, tetsy amin’ny kianja mitafon’i Mahamasina, ireo ekipa roa hiatrika ny lalao fama- ranana eo amin’ny “Open junior” ho an’ny Handball, ka hifanatrehan’ny HBCI avy any Ihorombe sy ny ekipan’Atsinanana eo amin’ny sokajy vehivavy.
Ny HBCI nandresy ny 27 no ho 15 ny Njatovo, teo amin’ny manasa-dalana omaly. Tamin’ny isa mavesatra 33 no ho 18 kosa no niakaran’ Atsinanana teo anatrehan’ ny Ascaf, talohan’izao.

Ho an’ny lehilahy kosa dia tsy nanova ny fandaharan-dalao amin’ ny famaranana ny ady sahala 15 sy 15 teo amin’ ny Atsimo Andrefana sy ny ASSM avy eto Analamanga. Izy ireo no hiatrika ny lalao famaranana amin’ny sabotsy izao, taorian’ny fandresena efatra sy ady sahala tokana samy azon’ny roa tonta nandritra ny lalaom-bondrona.

R.A

Afrobasket tour 16 gasy – Hitohy eny amin’ny Kianjan’ Ambohipo ny fifanintsanana

Rijakely — Fri, 17 May 2013 05:56:39 +0000

Lalao dimy no nalahatra hotanterahina eny amin’ ny Kianjan’Ambohipo, amin’ilay « Afrobasket tour 16 gasy », amin’ny sabotsy 18 mey izao. Andiana ekipa goavana 10 hafa indray no hihaona ao anatin’ireo lalao dimy nalahatra amin’io andro io.
Na eny Ambohipo aza ny kianja hilalaovana dia nasaina daholo ny ekipa malaza eto an-tanàna. Mbola hitety ny kianja eny Ambohimanarina, Tanjombato, Andraisoro, Itaosy, Ankadikely Ilafy sy Mandroseza ity Afrobasket tour 16 gasy ity.

B.A

Fandaharan-dalao sabotsy 18 mey:

08H30: Challenger # Cosfa
10H00: F F I # South Side Hope
11H30: ASA # SOE
13H00: Lucadro# BBCM
14H30: Ambohipo# B C R

Basket ball N1B – Ny Dream Team irery no tsy tafita amin’ny ampahefa-dalana

Rijakely — Fri, 17 May 2013 05:55:55 +0000

Hiditra amin’ny ampahefa-dalana ny fiadiana ny ho tompondakan’i Madagasikara sokajy N1B lehilahy anio, ao amin’ny kianja mitafon’i Toliara. Ny Dream Team, ekipan’i Bayard Razafindralambo irery no solontenan’ Analamanga tamin’ireo efatra nandray anjara, no tsy tafita amin’izany dingana izany rehefa nisedra faharesena indroa tamin’ny lalao efatra nataony.

Isan’ireo andrasan’ny rehetra amin’ny ampahefa-dalana anio ny fihaonan’ny JCB, mpampiantrano sy ny JCM avy any Morombe. Tsy hisy ny fifandonana eo amin’ireo ekipan’Analamanga, dia TTS sy Fandrefiala ary ASSM.

R.A

Fandaharan-dalao

ASSM # SBC
USF # TTS
Globe Trotters # Fandrefiala
JBC # JCM

Fambolena sy fiompiana – «Tokony ho sompitry ny Ranomasimbe Indianina isika», hoy ny Fivmpama

Rijakely — Fri, 17 May 2013 05:55:03 +0000

Ny Praiminisitra lefitra Botozaza Pierrot (faharoa avy any an-kavanana) nanokatra ilay zaikabe ho an’ny fambolena sy ny fiompiana teny Ankorondrano

Iankinan’ny ho avin’ny firenena. Notanterahina omaly ary hitohy anio, etsy amin’ ny tokotany malalaky ny Tour Zital, Ankorondrano ny «zaikabe ho an’ny fandraharahana eo amin’ ny sehatry ny fambolena sy fiompiana», karakarain’ ny Fivondronan’ny Mpan- draharaha Malagasy na ny Fivmpama. « Ny fahatsapana ny tsy fisian’ny firindrana sy ny fitrandrahana, araka ny tokony ho izy, ny harena avy amin’ny fambolena sy ny fiompiana misy eto amintsika no anton’io hetsika io. Tokony ho sompitry ny Ranomasimbe Indianina isika raha ny velaran-tany, ny hatsaran’ny tany, ny karazam-bokatra misy eto amintsika no jerena», hoy Ramanantsoa Randria- mifidimanana, filohan’ ny Fivmpama.

Nampiany anefa fa «raha tsy mitandrina isika dia sady tsy ho sompitra no ho tompony mangatak’atiny, ary mosarena am-body sompitra anatin’ny fanatontoloana».

Nasongadin’ny solontenan’ny sampan-draha- rahan’ny Firenena Mikambana ho an’ny fampiroboroboana ny Indostria eto Madagasikara, Lorence Ansermet, ny fijerena akaiky ny tontolo ambani- vohitra amin’ny alalan’ny fanatsarana ny fitrandrahana ny vokatry ny fambolena sy ny fiompiana ary ny jono mba hampihena ny fifindra- monina aty an-drenivohitra, izay manodidina ny 200 000 isam-bolana.

Andrasana amin’ity zaikabe ity ny fampivondronana ireo hevitra sy paik’ady rehetra hampi- dirana ny tontolo ambani- vohitra ao anatin’ny fandraharahana fa tsy hamboly na hipompy na hanjono tsy hisy tanjona. Anisan’ny voaresaka rahateo ny fampidirana ny tantsaha amin’ny sehatry ny ara-dalàna, izay zara raha misy 3% raha ny tarehimarika avy amin’ny sampan-draharaha momba ny fitsinjovana ny mpiasa sosialy na ny Cnaps. Toy izany koa anefa ny fampitaovana sy ny famatsiana ara-bola ireo tantsaha.

Nanokatra ity zaikabe ity ny Praiminisitra lefitra misahana ny toekarena sy ny Indostria, Botozaza Pierrot.

Faly Ran.

Very saina hatramin’ izao ny renin’ilay zazalahy matin’ny taksibe tetsy Masay

Rijakely — Fri, 17 May 2013 05:54:16 +0000

NILAOZAN’I ANDRY, ZAZALAHY 14 TAONA, NY FIANAKAVIANY VOKATRY NY LOZAM-PIFAMOIVOIZANA NAMONOAN’NY TAKSIBE AZY, TETSY AMIN’NY LALAN’NY FARIHY MASAY, NY SABOTSY TEO. VOA MAFY VOKATR’ITY FAHAFATESAN-JANANY ITY NY RENIN’I ANDRY. NAHAGAGA FA TSY FANAON’ITY ZAZALAHIKELY ITY NY MAKA TRONDRO ETSY MASAY, KANEFA DIA NOHO NY FIHAZAKAZAHANY HAKA ILAY TRONDRO MBA AZONY NO NAMOIZANY NY AINY.

Maty voadonan’ny taksibe 163, tamin’ ny sabotsy 11mey teo, tetsy amin’ny arabe Marais-Masay, Rabariherilala Andry Jean Bertaoud. Zazalahy faharoa amin’izy telo mianadahy zanak’i Bariherilala sy Rasoarivelo Noéline. Mpianatra taona fahenina tao amin’ny CEG Nanisana izy ary monina etsy Amboditsiry kosa ireo ray aman-dreniny. Nilalao baolina toy ny fanaony hatrany i Andry, tamin’io sabotsy io. Tampotampoka teo anefa dia nandeha naka trondro teny amin’ny Marais-Masay niaraka tamin’ny zokiny lahimatoa izy.

«Tsy fanaon’i Andry mihitsy ny maka trondro eny Masay. Isaky ny alahady aza matetika no entiko mitaingina lakana eny izy sy ny zokiny lahy ary i Andry hatrany no mitaona anay hody fa tsy zakan’ny sainy ny mahita ireo fiara mirimorimo amin’iny arabe iny. Tsy nampoiziko mihitsy hoe ny zanako no ho fatin’ny lozam-piarakodia eo amin’io lalan’i Masay io», hoy i Bariherilala, rain’i Andry, nitantara ny nanjo an-janany.

«Niara-naka trondro teny amin’i Masay izahay. Efa tafita tety an-kavanan-dalana izahay roa lahy nefa hadinony teo amoron-drano ny trondrony. Ndeha hiverina haka ilay trondro i Andry ary efa eo amin’ilay sisin-dalana (trottoir) afovoany no nisy taksibe 163 anankiroa nifanenjika avy any andrefana hifampisongona ka nifaoka azy. Nipitika sahabo ho 100 metatra izy izay vao nitontona tamin’ny tany ary mbola nodiavin’ilay kodiarana roa tamin’ny ilany havian’ilay fiara», hoy indray ilay zokiny lahy, latsa-dranomaso sy mbola nangovingovitra raha nampahatsiahy ny fitrangan’ny loza tamin’io andro io.

Tsy niverina ny sain-dreniny

Tsy nahatsiaro saina ny reniny nandritra ny naha teo am-bohitra ny razana. «Tsy nahatsiaro saina ny vadiko ary tsy navela hijery ny nofo mangatsiakan-janakay izy nandritra ny fotoana niaretan-tory», hoy i Bariherilala vadiny. Tsy fantany na dia ny rahavaviny aza nefa efa olona mifanerasera aminy isan’andro.

Mihendratrendratra hatrany ity renim-pianakaviana ity taorian’ io loza io, na dia efa ho herinandro latsaka kely aza no namoizany ilay lahiaivony. Rehefa tsy verivery saina toy izany izy, dia mba mitony rehefa matory, raha ny fahitana azy tao an-tokantranony, omaly.

Mbola ady sy tolona ho an’i Bariherilala koa hatreto ny fitsaboana io vadiny io sy ny fanambatambazana azy hiezaka handamina ny fiainany. Miezaka manampy sy manohana ara-tsaina azy ireo fianakaviana hatramin’izao.

Ar 7 000 monja

Bariherilala, rain'i Andry sy ny zanany lahimatoa mitantara ny nanjo an'i Andry

«Nantsoin’ny rahavavin’ny vadiko aho io sabotsy io ho any amin’ny kaomisaria ao Tsaralalàna ary nasainy nitondra bokim-pianakaviana sy kara-panondro. Tsy nanana afa-tsy vola Ar 7 000 aho tamin’izay nefa nasain-dry zareo nandeha fiarakaretsaka. Tonga tao amin’ny birao aho ka ny vaovao momba ny fahafatesan’i Andry tamin’ny fahitalavitra tao amin’ny polisy ao Tsaralalàna no nitsena ahy. Ankona tsy nahateny aho fa avy dia ny ranomasoko no nirotsaka», hoy hatrany ny rainy mitantara ny olana nosedrainy tamin’io andro io.

Tsy nanam-bola ny fianakavian’i Bariherilala tamin’io fotoana io nefa ny adidy tsy maintsy hatrehina. Isan’ny nanampy azy ireo betsaka ny Kaomisera Ranaivoson Alexandre, talen’ny sampana seraseran’ny Polisim-pirenena, tamin’ny fikarakarana sy famoahana ny razana avy ao amin’ny tranom-paty.

Mpanaja olona

Mampiavaka ny toetran’i Andry ny fifaneraserany tamin’ny mpiara-monina rehetra, eny fa na ireo olon-dehibe tsy fantany aza. «Zazalahikely tsotra sy tia manaja olona izy. Vatrany ny miarahaba ireo olon-dehibe eto an-tanàna isaky ny handeha hianatra» , hoy i Soanandrasana Elisabeth, rahavavin-dreniny.

Tsy mba tia adiady i Andry na dia misy aza ireo ankizy lahy mihetraketraka aminy. Mpikambana amin’ny fikambanana skoto rahateo ny tenany ary io no namolavola azy hanana fandeferana sy tia mandray andraikitra. Tena ankafiziny ny lalao baolina kitra sy ny fanenjika.

«Niteny tamiko izy fa tsy hianatra intsony tamin’ity taona ity raha tsy afaka taona fahenina tao amin’ny Ceg Nanisana», hoy hatrany ny rahavavin-dreniny. Hafaliana anefa ny azy tamin’ny nahitana ny valim-panadinana hidirana taona fahenina satria afaka soa aman-tsara. Zaza mpankatoa anatra i Andry saingy tsy manaiky lembenana kosa izy raha hitany fa marina ny azy na dia horesena lahatra mandra-pahariva ny andro aza.

Nangonin’i Maminiaina Andri.

Faran’ny herinandro

Rijakely — Fri, 17 May 2013 05:50:08 +0000

CLUB NAUTIQUE IVATO

«Tafaray samikaka» hiarahan’i Wawa, Vaiavy Chila, Jarifa, Ramora Favori ary Tinah-Ti»

Na teo aza ny fahavoazana nahazo azy, dia vonona hiatrika ny fampisehoana izay hiarahany amin’ny mpanakanto maro eny amin’ny Club Nautique Ivato, Ramora Favori. Hotanterahina ny alatsinain’ny Pantekôty izao ny «tafaray samikaka», izay hiarahana amin’i Wawa, Vaiavy Chila, Jarifa ary Tinah-Ti. Araka izany, karazana gadon-kira samihafa no hatolotra ireo mpijery sy mpitsangatsangana mandritra ny tontolo andro manomboka ka ankoatra ny vazo mitenin-dRamora Favori, dia hanana ny anjara toerany ihany koa ny salegy ho entin’i Wawa, ny kawitrin’i Vaiavy Chila, ary ireo karazana gadona mifangaro entin’i Jarifa miaraka amin’i Rojo andrimbavilanitra mpiara-mihira aminy. Hanana ny safidiny, araka izany, ireo mpijery amin’ity andro ity.

CCI IVATO

«Deux 104» ahitana ny tohin’ny tantaran’i Lenaivo sy Faniry

Masaka ny nahandro. Hotanterahina ny alatsinain’ny Pantekôty ho avy izao, eny amin’ny CCI Ivato ny fampisehoana ilay tantara «Deux 104», novokarin’ny Scoop Digital. Ao anatin’ity andiany faharoa ity dia mbola hisafotofoto ihany ny tantara ary hisy amin’izany ny fisehoan’ny marina sasany momba ny tantaran’i Lenaivo sy Faniry. Tamin’ny andiany voalohany dia tratra tamin’ny teti-dratsin-dRalisy ka nigadra ary nanondro an-dRainimanga avy eo, izay nahafantatra zavatra maro momba ny tantaran’i Voara sy Lenaivo an-daniny ary ny momba an-dRalisy sy Rainimanga an-kilany. Hifamahofaho ao anatin’ny tantara ny tontolon’ny fitiavana sy ny zava-misy eo amin’ny fiaraha-monina.

RITZ ANALAKELY

«Hatraiza Andriamanitra 2»

Dimy volana taorian’ny andiany voalohany, dia haseho voalohany, etsy amin’ny sinema Rex sy Ritz etsy Analakely ny alatsinain’ny Pantekôty izao, amin’ny 2 ora sy amin’ny 4 ora tolakandro, ilay horonantsary novokarin’ny Mah-Ki Prod «Hatraiza Andriamanitra 2». Ankoatra ireo mpilalao teo aloha, toa an-dry Tsarafara (Rajao) , Gégé Rasamoely, ary Rova (Tahiry), dia hitondra ny talentany amin’ity horonantsary ity ihany koa Rakotondrafara Jocelyn na i Pasitera, ao amin’ny Malok’ila. Handray anjara koa anefa ny mompera Pedro ka hisy ny dinika hifanaovany amin’i Tahiry (zandrin’i Tahiana) mikasika ny fiainany.

Raha fintinina, taorian’ny fahafatesan’ny reniny dia niakatra ny renivohitra i Tahina sy Tahiry mba hitady asa. Tsy noraisin’ny mpampiasa izay efa tokony handray azy anefa izy roa ka lasa nirenireny. Tao anatin’izany no nihaonan’izy ireo tamin’ireo tsy manan-kialofana ka nanoro hevitra azy ho any amin’ny akanin’ny mompera Pedro. Voaray tany i Tahiry raha nanohy nirenireny kosa i Tahiana. Ity farany izay sendra mpitarika posy iray ka nitaiza azy ka nahita asa ho azy tamin’ny trano fisakafoanana iray. Tao anatin’izany anefa dia niova indray i Tahiana ary nahita ireo rendrarendra samihafa teto an-drenivohitra.

PIMENT CAFE BEHORIRIKA

«Rock sy Folk» hiarahana amin’i Mahery, Nini Kiaka ary Nini Kolibera

Samy manana ny hanitra ho azy nefa afaka hiaraka amin’ny sehatra iray. Mpanakanto telo samy manana ny talentany no antsoin’ny Piment Café hanafana ny sehatra anio alina manomboka amin’ny 9 ora alina ao anatin’ny «Rock sy Folk». Hiara-dia ao anatin’ity seho ity, araka izany, i Mahery, Nini ao amin’ny tarika Kiaka ary Nini Kolibera. Araka ny lohatenin’ny seho dia hifandimby ao anatin’ny sehatra ny hira rock, izay hiangalian’ny feomangan’i Nini sy ny Folk hiarahana amin’i Nini sy Mahery. Azo eritreretina ihany koa anefa ny mifamadika amin’izany na ny fifamenona sy ny fampiaraham-peo eo amin’ireo mpanakanto ireo. Zava-maneno iraisan’ireo gadona roa samy hafa ireo rahateo ny gitara.

JAO’S PUB – AMBOHIPO

Kilalaka ranoray hiarahana amin’i Barikanja

Mpanakanto vao misondrotra nefa efa manomboka manana ny toerany eo amin’ny tontolon’ny mozika mafana. Taorian’ny fitetezam-paritra samihafa, mandalo eto an-drenivohitra ary hiakatra ny sehatry ny Jao’s Pub, eny Ambohipo i Barinjaka, izay hanolotra kilalaka ranoray anio alina manomboka amin’ny 9 ora. Mpanakanto avy any Ihosy ary anisan’ny nahafantarana azy ny «bevohoka tsy manambady»… Hampiavaka an’i Barijanka amin’ny fiakarana sehatra toy izao ny talentan’ireo efa-dahy izay manana fandihy miavaka miaraka aminy miaraka amin’ireo fitafy mahazatra sy ahafantarana ny tontolon’ny kilalaka.

Hanohy izay mozika mafana etsy amin’ny Jao’s Pub izay ihany ho an’ny rahampitso hariva kosa i Mamaliza sy Eddy Lejao.

LE LOUVRE – ANTANINARENINARado Manantsoa quintet hanolotra ny «Néo Soul & Jazz»

Gadona roa samy hafa nefa tsy mifanalivitra no handravaka ny sehatry ny Hotel du Louvre, etsy Antaninarenina, anio alina manomboka amin’ny 7 ora sy sasany. «Néo soul & Jazz» no lohatenin’ny fampisehoana izay hiarahana amin’i Rado Manantsoa quintet.

Hiara-hitendry aminy amin’ny fiangaliana ireo hira malaaza amin’ny soul sy ny jazz ireo mpitendry kalaza izay ahitana an-dry Hasina Rakotoarimalala (gitara beso), Rado Rakotorahalahy (amponga maroanaka), Thüryn Mitchell ary Philippe Blin (flûte sy saxe).

Ho vahin’ity fampisehoana ity kosa i Manoa Ralisiarimanitra.

IFM ANALAKELY

«Teboka», soradihy ho lalaovin’ny Kaompania Lovatiana sy ireo jamba

Ao anatin’ilay hetsika «Kilokolo» momba ny dihy maoderina, asehon’ny Kaompania Lovatiana sy ireo manana olana ara-pahitana, etsy amin’ny Institut français de Madagascar (IFM) Analakely anio alina ilay soradihy nampitondraina ny lohateny hoe «Teboka».

Mpandihy dimy mianadahy no hiantsehatra io soradihy, izay haharitra 55 minitra io ka ny roa avy amin’ny kaompania Lovatiana ary ny telo kosa dia manana fahasembanana ara-pahitana. Soradihy izay noforonin’i Lovatiana Rakotobe ary hoentin’i Vonjitiana Richard, Anjara Nantenaina Rasamiarison, Aina Ratsirofo, Rinah Andriamalala ary Tafita Patrick Anoharimananjara eny an-tsehatra.

TOAMASINA

«Pantekôty maresaka» hiarahan’i Nantenaina sy Shyn

Sambany hiray sehatra ao Toamasina. «Pantekôty maresaka ao Tamatave», io no lohatenin’ny fampisehoana voalohany hiarahan’i Nantenaina sy Shyn any an-drenivohitr’i Betsimisaraka, ny alahadin’ny Pantekôty, ao amin’ny kianja mitafo Soavita, Toamasina, manomboka amin’ny 3 ora tolakandro. Raha karazana gadona maro no hoentin’i Nantenaina toy ny acapella, Reggae ary indrindra ny fitrandrahana ny basesa, izay gadona nentin-drazana avy any amin’iny faritra Atsinanan’ny Nosy iny dia ny tontolon’ny r’n'b kosa no ahafantarana an’i Shyn, izay anisan’ireo sangany amin’ny fiangaliana io gadona io. Fotoana voalohany hitondran’i Nantenaina an-tsehatra ilay rakikira vaovao “zanaka ambanivolo” ho an’ny mponin’i Tomasina. Hanakoako any an-toerana ihany koa anefa ireo hiran’i Shyn raha tsy hilaza afa-tsy ny “Mahatsara za”, “Ho avy”…

Golf Junior – Nivoaka voalohany tany Afrika ny ekipam-pirenena

Rijakely — Fri, 17 May 2013 05:49:09 +0000

Tsy azo lazaina ho ratsy ny vokatra azon’ny ekipam- pirenena malagasy junior, izay niatrika ny fiadiana ny ho tompondakan’i Afrika, tatsy Nosy Maorisy, ny 27 avrily hatramin’ny 03 mey lasa teo. Laharana faha-24 teo amin’ny fifaninanana “net” no nisy an’i Maverick Faber, isan’ireo sangany eto amintsika na dia vao 17 taona monja aza.

Laharana faha-33 kosa izy teo amin’ny fifaninanana “brut”. Faha-44, 45, 46 teo amin’ny “brut” kosa no nisy an-dry Safidy, Tahiana ary Mihary, raha faha-39 sy 43 ary 44 teo amin’ny “net”.

Firenena 12, Afrika Atsimo, Botsoana, Kenya, Madagasikara, Namibia, Ouganda, La Réunion, Swaziland, Tonizia, Zambia, Zimbaboe ary Maorisy, no nandray anjara, tatsy amin’ny Nosy Maorisy.

I Afrika Atsimo no voa- hosotra ho tompondaka teo amin’ny “net”, raha i Tonizia kosa no teo amin’ny “brut”. “Tsy nahamenatra ny vokatra azontsika na dia sambany aza isika no nandray anjara tamin’ izany teo amin’ny sokajy junior”, hoy Ranaivo Andrianasolo, filohan’ny federasiona malagasin’ ny golf.

R.A

Ankorondrano – Lehilahy 40 taona hita faty nihohoka tao anaty honahona

Rijakely — Fri, 17 May 2013 05:44:43 +0000

Rangahy iray tokony ho 40 taona no hitan’ny fokonolona maty, nihohoka tao anaty honahona teny Ankorondrano-Andranomahery, ny marainan’ny alakamisy, tokony ho tamin’ny 8 ora sy sasany. Mbola nikiraro ary mbola hita teny aminy avokoa ny fitafiany rehetra sy ny satroka baonetra nanaovany.

An-kevitry ny efa tamin’ny alatsinainy io rangahy io no maty tao saingy omaly vao nisy nahita ny razana. Nahitana ratra teo amin’ny fihirifany havia araka ny fanamarinana nataon’ny polisy avy ao amin’ny Boriborintany fahavalo.

«Tamin’ny talata maraina no efa nahitanay io satroka baonetra io tao anatin’ilay honahona saingy tsy nahita dian-tongotra nankao amin’ilay honahona izahay ka tsy dia nieritreritra fa misy razana ao », hoy i Haja, mpaka tsikafona teo amin’ilay toerana nahitana ny razana.

Ankizy nilalao no nahatsikaritra ny lohany sisa nipoitra tao anaty honahona. Tsy nisy nahalala azy ny mponina teny amin’ny manodidina raha nanontanian’ny mpitandro ny filaminana. «Tsy mponina ety amin’ny fokontany iadidianay io, no sady tsy misy taratasy amantarana azy», hoy Ranjamalala Dina Valisoa, sefo fokontany Ankorondrano-Andranomahery.

Potika taratasy efa rotidrotika no hita tany am-paosiny. Taorian’ny fizahana nataony polisy sy ny avy ao amin’ny BMH, dia naterina eny amin’ny tranom-patin’ny hôpitaly Joseph Ravoahangy Andrianavalona ny razana miandry ny hakan’ny havany azy.

Maminiaina Andri.

Fanofanana manamboninahitra – Hangataka Akademia manokana ny zandarimariam-pirenena

Rijakely — Thu, 16 May 2013 06:26:44 +0000

Ny kolonely Rasolofo Lumène

Efa eo an-dalam-panomanana ny antontan-taratasy fangatahana ny hananganana sekoly fanofanana manamboninahitra ho an’ny zandarimariam-pirenena, araka ny nambaran’ny kolonely Rasolofo Lumène Fidèle, izay voatendry ho Kaomandin’ny sekoly sy ny fanofanana eo anivon’ny zandarimariam-pirenena. Ny tenany no miandraikitra ny fibaikoana ny sekolin’ny zandarimaria ao Ambositra sy Moramanga, ny fanofanana ho fampiakarana laharamboninahitra, ary ny fanofanana ho amin’ny fibaikoana alika, eny Ivato.

Ao Moramanga ihany ity sekoly vaovao atsangana ity araka ny fantatra, ka aorian’ ny fitsanganan’izany dia tsy ho any Antsirabe intsony ny mpianatra ho manamboninahitra zandary no hiofana. Vao nalefa any amin’ny minisiteran’ny Foloalindahy ny fangatahana izany, araka ny tsilian-tsofina.

Tontosa, omaly teny Mahamasina, ny lanonana ara-miaramila ho fametrahana azy amin’ireo andraikitra ireo. «Tsy hoe hisintaka tanteraka amin’ny Tafika tsy akory fa hapetraka hatrany ny firahalahiana eo amin’ny samy miaramila», hoy izy raha nanohy ny fanazavany manodidina ilay hevitra fananganana Akademia manokana ho an’ny zandarimaria.

Etsy an-danin’izay dia nanamafy ny hiadiana amin’ny kolikoly, izay efa drafitra napetraky ny Kaomandin’ny zandarimariam-pirenena ity Kaomandin’ny sekoly sy ny fanofanana eo anivon’ny zandarimariam-pirenena ity.

Hirosoana ihany koa, araka ny voalaza ny atrikasam-piofanana ho an’ny zandary efa am-perinasa mba ho fanatsarana ny kalitaon’ny asan’izy ireo.

Maminiaina Andri/R.F

Ambohibao Antehiroka – Adiny telo no nampihorohoroan’ny jiolahy ny Ben’ny tanàna mivady

Rijakely — Thu, 16 May 2013 06:25:52 +0000

Sahalan’ny efa mahay tsianjery ny tao an-tranon’ ilay Ben’ny tanàna voatafika tety amin’ny faritra Ambohibao mihitsy ireo jiolahy, raha ny filazan’ ireo zandary

Dimy lahy, nitondra basy poleta roa sy sabatra, no nanafika ny tranon’ny Ben’ny tanànan’ Ambohibao, ny alin’ny talata hifoha omaly alarobia, tokony ho tamin’ny 11 ora alina. Manao saron-tava sy akanjo mainty avokoa izy ireo tamin’ity fanafihana ity.
«Raha vantany vao tafiditra tao an-trano izy ireo dia ny mpiambina roa lahy no nafatony voalohany. Nivadika tany ambadiky ny trano izy ireo avy eo ka novakiany ny varavarankely miditra ao an-dakozia. Raha vao tafiditra tao izy ireo dia niakatra tany amin’izy mivady tany ambony rihana», hoy ny fanazavana azo teo anivon’ny zandary tetsy Ambohibao.

Rehefa tafiditra tao amin’ny efitranon’izy mivady ireo jiolahy dia namatotra ny vadin’ilay Ben’ny tanàna. «Vola, volamena ary finday no lasan’izy ireo tamin’io fanafihana io. Mbola tsy fantatra kosa anefa izay tena tetibidin’ireo entana very ireo satria mbola tsy nanaovana fanadihadiana izy mivady vokatry ny hatairana nahazo azy ireo», hoy ihany ny fanazavan’ ny zandary, avy etsy Ambohibao.

Tamin’ny 2 ora maraina vao nivoaka tao amin’io trano io ireo jiolahy ireo ka taorian’izay vao niantso ny teo anivon’ny zandary tetsy Ambohibao ireo olona voatafika.

«Adiny telo teo ho eo ireo jiolahy no tao amin’io trano io. Raha ny fanamarihana nataon’ ny zandary dia sahala amin’ny olona efa mahay tsianjery ity trano ity mihitsy ireo olona nanafika ireo. Fantany avokoa ny isan’ireo olona tao amin’ilay trano sy ny lalana rehetra ao anatiny», hoy ny fanazavana azo teo anivon’ny zandary, tetsy Ambohibao izay mandray ny famotorana ity raharaha ity sy ny fikarohana ireo olon-dratsy ireo.

Haja Randrianantoandro

Tapatapany

Rijakely — Thu, 16 May 2013 06:23:50 +0000

Tsena may. Nirehitra ny tsena ao amin’ny kaominina Antsahamaina, any Antanifotsy ny alatsinainy alina teo. Tsy fantatra marina izay niantombohan’ny loza. Tranoheva maro no kila forehitra niaraka tamin’ ny talantalana fivarotana sy latabatra ary ny seza. May avokoa ireo entana tao anatin’ireo toeram-pivarotana ireo, raha ny vaovao voaray. Efa tonga nijery ifotony ny fahavoazana, ny lehiben’ny distrika ao Antanifotsy.

Asan-dahalo. Omby dimy tamin’ireo am-polony saika hoentina hamidy no nisy nangalatra tao Ankazobe, ny 13 mey teo tokony ho tamin’ny 10 ora alina. Ireo fokonolona no nanao fanarahan-dia voalohany vao nahazo antso ny zandary ka nanampy azy ireo. Mbola mitohy izany amin’izao fotoana izao. Matetika no isehoana halatr’omby toy izao ny ao amin’ity tanàna ity. Manentana hatrany ny zandary ny amin’ny fanomezan-tanana amin’ny fokonolona.

Famonoana sinoa vavy – Tafakatra 11 ireo voasambotra, vehivavy iray karohina fatratra

Rijakely — Thu, 16 May 2013 06:23:19 +0000

Tafakatra 11 ireo olona voasambotra mikasika ilay raharaha famonoana sinoa vavy, tetsy Andoharanofotsy, ny alin’ny 12 avrily lasa teo. Lehilahy roa no voasambotry ny polisy misahana ny heloka bevava, tany Mandiavato, any amin’ny faritra Itasy sy tany Bongolava ny faramparan’ny volana avrily teo.

« Nanao fanafihana mitam-piadiana tany Mandiavato no nahasamboran’ny polisy ny iray tamin’izy ireo. Rehefa natao ny famotorana azy dia nanondro olona iray hafa izy ka tany Bongolava no nahatrarana ilay olona io », hoy ny tatitra avy amin’ny polisim-pirenena.
Fantatra ihany koa fa mbola misy vehivavy iray, atidoha nikotrika ity famonoana sinoa ity karohin’ny polisy fatratra amin’izao fotoana izao. «Hivoaka tsy ho ela ny filazana fikarohana io vehivavy io. Mbola tsy hita kosa ilay basy marovava nampiasain’izy ireo», hoy ihany ny teo anivon’ny polisim-pirenena.

H.R

Lazaina Avaradrano – Mpiandry omby voatondro ho nanolana zaza efa-taona

Rijakely — Thu, 16 May 2013 06:22:11 +0000

Lehilahy iray no voatondro ho nanolana ankizivavikely iray efa-taona, tany Lazaina Avaradrano. Ny talata 14 mey teo no tonga nitaraina teny amin’ny biraon’ny polisy misahana ny zaza tsy ampy taona, eny Tsaralalàna, ny renin’io zaza io.

Raha ny filazan’ilay renim-pianakaviana dia « notambatambazany vatomamy ilay zaza ary avy eo dia nanamparany ny filan-dratsiny ary nomeny vola 500 Ariary indray avy eo mba tsy hilaza amin’ny olona izay nanjo azy».

Ny fanamarinana nataon’ny mpitsabo no nanaporofo fa simba tanteraka ilay zaza.

« Omaly alarobia no nosamborin’ny polisy teny amin’ny tranony, teny Lazaina, ilay lehilahy. Tsy mbola manam-bady aman-janaka izy io ary mpiandry omby no asany », hoy ny voalazan’ny polisy.

Raha ny tatitry ny mpitandro ny filaminana hatrany dia «nifona tamin’ny ray aman-drenin’io zaza io ity lehilahy sady nilaza fa tsy vita hatramin’ny farany ny fikasan-dratsiny satria nikiakiaka nitomany ilay zaza ka dia navelany».

Rindra Rabearimahazo

Fiaraha-mitantana ny tetezamita – Hampitovy tadin-dokanga Rajoelina, Beriziky, Rakotoarivelo ary Rasolosoa Dolin

Rijakely — Thu, 16 May 2013 06:20:52 +0000

Hifanakalo hevitra amin’ ny Praiminisitra Omer Beriziky, ny filohan’ny Kaongresy, Mamy Rakotoarivelo ary ny filohan’ny Filankevitra ambonin’ny tetezamita, ny jeneraly Dolin Rasolosoa mahakasika ny fiaraha-mitantana ny tetezamita aorian’ny fametraham-pialany, ny Filohan’ny tetezamita, Andry Rajoelina, anio hariva.

Araka ny fanambarana avy amin’ny Fiadidiana ny tetezamita, omaly, dia hiompana amin’ny fampiharàna ny andininy faha-14 ao
anatin’ny sori-dalana, izay mamariparitra ny manodidina ny fiaraha-mitantana telo loha ny diniky ny efa-tonta amin’io fotoana io.

Voafaritra ao anatin’ izany andininy izany fa «raha handray anjara amin’ ny fifi-dianana ny Filohan’ny tetezamita sy ny Praiminisitra ary ireo mpikambana eo anivon’ny governemanta dia tokony hiala amin’ny toerany 60 andro mialohan’ny daty hanatanterahana izany».

Mba hisorohana ny mety ho fahabangana, araka ny lalàna, aterak’izay rehetra izay no voalaza fa antony handinihana amin’ny antsipiriany io andininy io.

Araka ny voafaritry ny sori-dalana dia «tokony hisy ny lalàna holanian’ny parlemantan’ny tetezamita afahana mampihatra ilay fiaraha-mitantana telo loha ». Ny fe-potoana hanaovana izany anefa no fantatra fa mety tsy ho ampy intsony.

Ny aza voany

Rijakely — Thu, 16 May 2013 06:17:46 +0000

Na resaka tiana haely, na tsahobe ampihorohoroana, tsy azo terena hilamin-tsaina fotsiny ny isan-tokantrano manoloana ny tsy fandriampahalemana ankehitriny. Tahaka ny ody varatry mompera ihany io, ny aza voany. Ny tsy manam-basy kalach sy P.A ary langilangy sy ny sisa ve moa dia hanozona fa toa mba nanindrona ny mponina tany amin’ireo tanàna tsy milamina ihany ilay filazan’ny Emmo/Far fa tsaho fotsiny ny resaka fampilazan’ny jiolahy mialoha fa hanafika izy ireo.

Tsara tsindriana eto kosa fa «ny valala misy, saingy ny mpilaza ihany koa mahay». Mirarakompana ny vaky trano, asa fanendahana, fanafihana amin’ny endriny samihafa, fandrobàna tsy tambo isaina… tao anatin’ny taona vitsy izao. Tsy ny sakana ataon’ny polisy na zandary eny amin’ny arabe isak’alina akory no hampandry fahalemana ny tokantrano any anaty elankelan-trano maro any, raha ho an’ny eto an-drenivohitra. Mainka fa ny mponina any ambanivohitra!

Tsy vitan’ny fanerena ny olona hino fa tsaho ihany izany, ireny fampitahoran’ny olon-dratsy ireny, dia hilamina ny tanàna. Ny tsirairay ve moa tsy efa mba miezaka manao izay fomba hahafahana misoroka ny fandrobàna ataon’ny jiolahy, saingy tsy vitany irery izany. Raha efa nanao izay ho afany ny mpitandro ny filaminana, izay «MPIARO NY VAHOAKA SY NY FANANANY», dia adala ny olona mbola ho feno fahatahorana.

Ka ianareo mpitandro filaminana ve tena akaiky ny fokonolona, izay mitaintain-dava amin’ny fanafihana mety hihatra amin’ny tokantranony, na tsaho na tsia? Tsy hisy handreraka na hampijaly tena hatory any an-tsaha ny olona, raha toa ianareo antsoina andro dia andro, antsoina alina dia alina. Fomba fitenenana io, fa ny zava-misy dia tsy matetika no handrenesana hoe nisy tokantrano notafihin’ny jiolahy ka vantany vao niantso ireo fianakaviana lasibatra dia tonga vetivety ireo mpitandro ny filaminana ary nifanehitra dia nahasambotra olon-dratsy. Ny vetivety dia samy manana ny azy, fa angamba kosa tsy ho 30 minitra na adiny iray izany ho anareo mpitandro filaminana…

Rina Rasoava

Vondrona Eoropeana – Mitsipaka ny filatsahan’i Lalao Ravalomanana, Ratsiraka, Rajoelina

Rijakely — Thu, 16 May 2013 06:17:39 +0000

Nanohana ny fanambaran’ny «Troïka», rafitra mpanatanteraky ny Vondrona Sadc, izay nilaza ny tokony hisintahan’ny Filohan’ny tetezamita, Andry Rajoelina sy ny Filoha teo aloha, ny amiraly Didier Ratsiraka ary i Lalao Ravalomanana, amin’ny fifidianana Filoham-pirnena ihany koa ny Vondrona Eoropeana.

«Sahiran-tsaina tanteraka amin’ny fanaraha-maso ny fivoaran’ny toe-draharaha politika eto Madagasikara ny Vondrona Eoropeana. Manova tanteraka ny fizotran’ny fifidianana io firotsahan’ny telo tonta io ary mifanohitra amin’ny fifanarahana nisy teo aloha», araka ny fanambaràna nataon’i Catherine Ashton, tompon’andraikitra ambony eo anivon’ny Vondrona Eoropeana, omaly.

Nomarihin’ity farany ihany koa fa miandry izay fanapahan-kevitra horai-sin’ny Filankevi-pilaminan’ny Vondrona Afrikanina izy ireo ahafantarana ny ho tohin’ity raharaha ity. «Miankina amin’izay tapaka ao anatin’io fivoriana io ny ho tohin’ny fanampian’izy ireo an’i Madagasikara amin’ny fanatontosana ny fifidianana», araka ity fanambarana ity hatrany. Vao tsy ela anefa izay no samy nanizingizina ny tokony tsy hikitikitihana intsony ny lisitra ofisialin’ireo kandida 41 hiatrika ny fifidianana filoham-pirenena navoakan’ny Fitsarana manokana misahana ny raharaham-pifidianana ny Filohan’ny tetezamita, Andry Rajoelina sy ny Filoha teo aloha, Marc Ravalomanana. Tamin’iny herinandro lasa iny rahateo dia mbola nanamafy ny amin’ny tokony hitazonana ireo tetiandrom-pifidianana napetraky ny Cenit sy ny Firenena Mikambana ny Masoivohon’ny Vondrona Eoropeana, Leonidas Tezapsidis.

Nomarihin’ity farany rahateo fa «ilaina ny fanajana ny sori-dalana ary tokony hiara-misalahy hitady izay fomba rehetra ahitana lamina politika hitondra ho any amin’ny fitoniana ka ahafahan’i Madagasikara miroso any amin’ny fifidianana ny mpanao politika malagasy». Voalaza fa mety hanamafy ny sazy hampiharina amin’io olom-panjakan’ny tetezamita ny Filankevi-pilaminan’ny Vondrona Afrikanina raha toa ka mbola misy ny fikirian’ny telo tonta hiatrika io fifidianana io.

J.R

Sombiny

Rijakely — Thu, 16 May 2013 06:17:31 +0000

AHEMOTRA KELY. Nahemotra amin’ny 15 jona izao ny fe-potoana ahafahan’ireo kandidà maniry ny hirotsaka hofidiana amin’ny fifidianana solombavambahoaka manatitra ireo antontan-taratasy ilaina amin’izany. Fanapahan-kevitra noraisin’ny Cenit, izay nomena nodinihin’ny governemantan’ny tetezamita io.

TSY MBOLA TAPAKA. Tsy nahatratra ny salan’isa ilaina, omaly, ny fandaniana ny lahadinika izay tokony haroso hodinihina
mandritra ny fivoriana ara-potoanan’ny Filankevitra ambonin’ny tetezamita. Noho io antony io dia ahemotra amin’ny fotoana tsy mbola voafaritra ny fandaniana izay lahadinika izay.

Kajikajy

Rijakely — Thu, 16 May 2013 06:16:52 +0000

Samy te hifikitra mafy eo amin’ny sezany ireo tompon’ andraikitry ny tetezamita nirotsaka ho kandidà amin’ny fifidianana filoham-pirenena. Tsy misy mihevitra ny hiala mora foana izany fa dia mitady izay fomba rehetra hanemorana ilay fotoana fametraham-pialana foana aloha. Na koa mitady fomba mba hanamoramorana kokoa ny aorian’ilay fametraham-pialana. Tsy manao ilay dingana lehibe ny hafa dia mitankemotra ihany koa ny sasany. Na miara-mirona na miara-mihenahena no toa tarigetran’izy rehetra. Matoa anefa samy mifampiahiahy ohatr’izay dia samy manan-kevitra ny hanararaotra ny fahefana maha mpitondra mba hahazoana tombony amin’ny maha kandidà. Tsy misy afa-tsy kajy ny tontolon’ ny politika saingy misy ireo efa tena nahay io taranja io hatrany am-pianarana, misy ireo efa teo amin’ny toerany vao tena nanabevoho ny fahaizany.

Fifidianana filoha – Mety ho latsaky ny 1 m indray ny halavan’ny biletà tokana

Rijakely — Thu, 16 May 2013 06:15:23 +0000

Mety tsy hanana halava iray metatra mahery toy ny teo aloha intsony fa ahena araka izay tratra ny biletà tokana hampiasaina amin’ny fifidianana filoham-pirenena. Araka ny vaovao mbola tsy ofisialy avy amin’ireo manam-pahaizana manokana momba ny raharaham-pifidianana, omaly, dia «mety hajanona ho taratasy tokana amin’ny endrika A3 ihany io biletà io».

Voalaza fa tokony ho tafiditra ao anatin’io taratasy iray io ihany ny lisitr’ireo kandidà hofidiana amin’io fifidianana io. Mety hizara ao anatina efitra roa samy hafa kosa anefa izy ireo.

Etsy an-danin’izay anefa dia misy soson-kevitra ny hitazomana ny endrikendrik’ilay biletà tokana, araka izay efa nanomboka nampahafantarina, andro maromaro izay.

Mbola tsy fantatra aloha hatreto ny ho fanapahan-kevitry ny Cenit mahakasika io biletà tokana amin’ny endriny vaovao io. Omaly rahateo no tonga teto Madagasikara handinika miaraka amin’ny Cenit momba izany ireo manam-pahaizana manokana avy amin’ny Ceni ao Afrika Atsimo ka ny zoma no hampahafantarana ireo kandidà ny tena ho endrik’ity biletà tokana ity.

J.R

Hopitaly Ambohimiandra – Zaza marary mafy mila famonjena

Rijakely — Thu, 16 May 2013 06:07:51 +0000

Mendrika miatrika ny fitsaboana eny amin'ny hopitaly Ambohimiandra.

Mila vonjy maika. Marary mafy ka mila fanafody mitentina Ar 460 000 isan’ andro ny zazavavi-kely iray vao 13 taona, Razafi- mahefa Mendrika Nirinasoa, avy eny Imerimanjaka, Ambohijanaka, izay tsaboina eny amin’ny hopitaly Ambohimiandra. Tratran’ny aretina sarotra sitranina amin’ny havokavoka izy. Very 10 kilao ity zazavavy ity, hatramin’ny naharariany. Fitiliana tamin’ny scanner no nahitana fa simban’ny otrikaretina ireo “alvéoles” amin’ny ilan-tratrany havanana.

“18 andro no efa notsaboina ety amin’ny hopitaly Ambohimiandra izy ka nambaran’ny dokotera fa tokony hotohizana 30 andro ny fanafody. Efa lany namidy ny fanananay tao an-trano nanavotana azy. Kely fidiram-bola anefa izahay mivady fa samy mpiasa madinika. Raisinay am-pitiavana izay foin’ny tsara sitra-po sao mbola azo avotana ihany ny ainy, izay voalohan-janakay amin’ny zaza roa”, hoy Randriambololona Marie Odette, reniny.

“Tsy fantatra izay nahazoany io aretina io. Tsy mifindra aloha ilay izy saingy mahery vaika. Vao voalohany no nahitako aretina toy izao tao anatin’ny 15 taona niasako”, hoy Dr Rakotonandrasana David Harimbola, mpitsabo ankizy manara-maso ny fahasalamany eny Ambohimiandra.

Barphil Andriantsiferanarivo

Fiatrehana ririnina – Tsy nisy fiovana ny vidin’ ny bodofotsy eny an-tsena

Rijakely — Thu, 16 May 2013 06:05:24 +0000

Efa miparitaka eny an-tsena ireo fitaovana rehetra entina miatrika ny ririnina. Fotoana mampandeha ny lamba firakotra ihany koa ny vanim-potoana toa izao. Azo lazaina fa takatry ny rehetra sady tsy niova tamin’ny vidiny tamin’ny andro mafana teo aloha itony lamba firakotra itony.

« Tsy dia nandeha loatra ny tsena tamin’ny vanim-potoana teo aloha ka mbola tsy niova ny vidiny nakana azy teny amin’ny mpamongady. Mijanona amin’ny vidiny teo aloha ihany ny vidiny na dia fotoana mampandeha ny tsena aza izao », hoy Endrininosy Sabine, mpivarotra, etsy Analakely.

Ar 10 000 ka hatramin’ ny Ar 80 000 ny saran’ny bodofotsy eny an-tsena, arakaraka ny hateviny sy ny kalitaony. Ireo bodofotsy friperia no tena mahaliana ny olona na amin’ny vidiny na amin’ny kalitaony. Ny bodofotsy na lamba firakotra matevina natao ho an’ny olona telo sy efatra kosa no tena be mpanjifa, araka ny fanadihadiana natao teny an-tsena. “Sady azo iadiam-barotra no mateza ny bodofotsy friperia. Misy karazany azo isafidianana ihany koa izy”, hoy ireo mpanjifa.

Lilia Rajaonah

Ady amin’ny herisetra – Mirotsaka ihany koa ny fiangonana

Rijakely — Thu, 16 May 2013 06:03:33 +0000

Nirotsaka an-tsehatra amin’ny ady amin’ny herisetra ihany koa ny fiangonana. Efa manana ivon-toerana natao handraisana sy hihainoana ny olona iharan’izany ity farany, etsy amin’ny foibe Tabita Fjkm, etsy Ampandrana.

“Hatramin’ny nisian’ny tetikasa niaraka tamin’ny Babeo dia fitarainana 390 no voaray. Efa tonga eny anivon’ny Fitsarana ny 68 amin’ireo ary eny anivon’ ny polisy misahana ny zaza tsy ampy taona ny 70. Ny herisetra eo amin’ny mpivady no tena betsaka amin’ny fitarainana”, hoy Rakotomamonjy Brigitte, mpiasa sosialy ao amin’ny Tabita, nandritra ny andro iraisam-pirenena ho an’ ny fianakaviana, omaly.

“Azo sorohana tsara, amin’ny alalan’ny sekolin’ ny ray aman-dreny, ny olana eo amin’ny ankohonana. Ankohonana mirindra sy lavitry ny olana no tanjona”, hoy kosa Rakotovao Noro, Mpitandrina. Tsy manavaka finoana ny fandraisan’ny fitarainana ao amin’io ivon-toerana io.

Fiofanana – Namokatra mpanazatra sivy ny Triathlon

Rijakely — Thu, 16 May 2013 05:57:35 +0000

Ireo mpanazatra vao nahavita fiofanana amin’ny taranja Triathlon

Natao teny amin’ny Kudeta, tetsy amin’ny Hotel Carlton, omaly ny fizaràna ny mari-pahaizana ho an’ ireo sivy mirahalahy niofana ho mpanazatra, dingana voalohany eo amin’ny taranja Triathlon. Mpitia fanatanjahantena toy ny mpanazatra amin’ny lomano na mpamonjy voina na zandary ireo nanaraka ny fiofanana nomen’ny Federasiona frantsay tamin’ity taranja vaovao ity.
“ Efa miomana ny handray anjara amin’ny Lalao Olympika, hatao any Colombie, amin’ny taona 2016 isika. Handefa an’i Zouzou hiady ny amboara afrikanina any Agadir, Maraoka kosa ny 28 mey ho avy izao. Andrasana ihany koa ny lalaon’ny Cjsoi, hatao atsy La Réunion”, hoy Raoelina Andriambololona Tiana, filohan’ny federasionan’ny triathlon.

Ligy vaovao

Omaly ihany koa no nampahafantatra ny fijoroan’ ny ligin’ny triathlon ao Antsirabe ka Rajaonson Patrick no filohany. Manomana fifaninanana Duathlon sahady izy ireo ny 23 jona izao, ao amin’ny araben’ny Fahaleovantena ao Antsirabe, ka hitarafana ireo taninketsa, efa maro tokoa any an-toerana. Ity tanàna ity, izay manana an’i Zouzou Andriafenomanananiaina sy Roger Andrianambinina, samy avy ao amin’ny ECA sy kintan’ny Triathlon eto Madagasikara ary manana traikefa eo amin’ny sehatra iraisam-pirenena.

Barphil Andriantsiferanarivo

Basket ball N1B lehilahy – Mitarika vonjimaika ny TTS Analamanga sy ny JCM Morombe

Rijakely — Thu, 16 May 2013 05:57:21 +0000

Nanomboka ny alatsinainy teo, tany Toliara, ny fiadiana ny amboaran’i Madagasikara ho an’ny basket N1B, sokajy lehilahy. Mitarika vonjimaika ao anatin’ny fifanintsanana ny TTS Analamanga (vondrona C) sy ny JCM Morombe (vondrona A), samy nahazo isa 6. Mitovy koa ny isa azon’ny Fandrefiala sy ny ekipan’ ny Dream Team (vondrona B), samy avy eto Analamanga ary samy nahazo isa 5. Manana isa 4 avy kosa ny SBC Vakinankaratra sy JSM Bongolava ary USF Matsiatra Ambony.

B.A

Ireo voka-dalao taorian’ny andro roa efa tontosa :

Vondrona B: J.B.C (65) # B.C.O (48)
Vondrona A: J.C.M (65) # Sporting (64)
Vondrona A : Cosmos (76) # A.S.C 44 (51)
Vondrona C: AS Analamanga (67) # B.C.A (47)
Vondrona D: 3F.B (66) # J.S.M (69)
Vondrona B : Fandrefiala (72) # Dream Team (61)
Vondrona C : Lazan’i Betsileo (63) # T.T.S (85)
Vondrona D: U.S.F. (83) # A.S.B. (62)
Voka-dalao alarobia 15 mey :
Vondrona D – U.S.F (75) # 3.F.B (63)
Vondrona C- B.C.A (67) # LAZAN BETSILEO (78)
Vondrona C – ASSM (65) # T.T.S C (62)
Vondrona A – GLOBE TROTTERS (83) # J.C.M (71)
Vondrona A- SPORTING (76) # ASC 44 (53)
Vondrona D – A.S.B # S.B.C D tsy mbola azo
Vondrona B – J.B.C (66) # AS VICTOIRE (48 )
Vondrona B – B.C.O (79) #
FANDREFIALA (85)

Pantekôty Toamasina – Hiray sehatra i Nantenaina sy Shyn

Rijakely — Thu, 16 May 2013 05:56:37 +0000

«Pantekôty maresaka ao Tamatave». Io no loha- tenin’ny fampisehoana voalohany hiarahan’i Nantenaina sy Shyn any an-drenivohitr’i Betsimisaraka, ny alahadin’ny Pantekôty 19 mey, hatao ao amin’ny kianja mitafo Soavita. Sambany ny fiarahan’izy roa lahy an-tsehatra ao Toamasina, araka ny fanamby napetrak’i Nantenaina ho an’ny vahoakan’i Toamasina. «Tanjona ny hisian’ny hetsika toy izao isan-taona hanandratana ireo mpanakanto avy any amin’ny faritra Atsinanana», hoy i Nantenaina.

Samy manana ny gadona voiziny izy roa lahy ireo, ka hiara-hitondra ny talentany amin’ny sehatra iray. Hisy ny acapella, Reggae ary indrindra ny fitrandrahana ny basesa, hoentin’i Nantenaina. Ny tontolon’ ny r’n'b kosa no hatolotr’ i Shyn.

Na samy manana ny hanitra ho azy aza, anisan’ ny andrasan’ny mponin’i Toamasina amin’ity fampi- sehoana ity ny fampiaraham- peon’izy mirahalahy.

Faly Ran.

Mananara Avaratra – Misy ambadika ny raharaha andramena

Rijakely — Thu, 16 May 2013 05:55:39 +0000

Mampiahiahy ny zanak’i Mananara Avaratra ny fihetsiky ny manampahefana sasany, izay toa tsy taitra mahita ny fandripahana sy fanondranana ny andramena. Ny hafa aza dia manararaotra ny zava-misy hangoronan-karena. Ny mponina any an-toerana no mahita ifotony ka mitantara ny tena ao ambadiky ny raharaha andramena

«Zaha-poagna sy atô tsy hita ny fandrobagna boaderôzy aty aminay. Ny fanjakagna mizaha foagna», hoy ireo mponina any an-toerana. Toa very fanahy mbola velona ny any Mananara Avaratra mahita maso ny fitrandrahana sy fanondranana tsy amin-tahotra ny andramena, na dia efa namoaka didy fandraràna izany aza ny fitondrana foibe. Efa anaty tambajotra matanjaka ireo mpanao «tantely afa-drakotra» ny harem-pirenena ka sarotra ny mamaky ady aminy, araka ny fanazavan’ireo mponina sasantsasany, izay hany sahy miresaka ity raharaha andramena ity.

«Izahay miteny izao tsy misy »parapluie » fa Andriamanitra an-tampon’ny loha no ianteherana», hoy Rabemazava Soa Jean, raha namaky bantsilana fa fanta-poko, fanta-pirenena ny tompon’ny sambo anondranana ireo andramena any Mananara Avaratra. «Na ny toerana misy ny tahiry, any amin’ny dimy kilaometatra miala eto amin’ny tanànan’i Mananara aza dia fantatry ny rehetra», hoy ihany ity filohan’ny fikambanana Maso (Mananara Solidaire) ity, nanohy ny teniny.

Efa betsaka ihany ny tompon’andraikitra sy manampahefana nidodododoan-dry Rabemazava Soa Jean sy ny namany, nanaovana fanairana saingy toa tsy nisy vokany mivaingana izany hatreto, araka ny fanombanany azy. Toa vao mainka aza manome vahana ny mpanao ratsy. «Misy mpikambana ao amin’ny Parlemantan’ny Tetezamita milaza fa hanampy anay dia mangataka aminay ny anaran’ireo mpanao ‘bois de rose’ tsy ara-dalàna sy ny mpiray tsikombakomba aminy. Rehefa azony anefa ny anarana dia entiny ampitahorana sy hakana vola any amin’ireto farany», hoy ihany Rabemazava Soa Jean naneho ny hakiviany amin’ireo olona mba nitarainana.

Basy atifi-kavana

Ny solontenam-panjakana any an-toerana dia naneho fahavononana handray fepetra manoloana ny gaboraraka. Namory ny OMC (Organe mixte de conception) izay ahitana ny Kaomandàn’ny borigadin’ny zandarimaria sy ny Kaomiseran’ny polisy ary nitarina tamin’ny tompon’andraikitry ny ala, ny Lehiben’ny distrika Raharison Mahatombo, tamin’ny volana avrily. Tapaka tamin’izany fa hatao ny andrimasom-pokonolona any amin’ireo toerana tena anaovan’ireo mpandroba ny harem-pirenena ny asa ratsiny. Hampiasaina koa ny mpitsikilo (agent de renseignement) izay hanaitra ny mpitandro ny filaminana, arakaraka ny zava-mitranga. Atao avy hatrany ny fisamborana dia tanterahina ny fombafomba rehetra voafaritry ny lalàna ahafahana manohy ny fanenjehana.

Tsy nafenin-dRaharison Mahatombo fa mametraka olana ara-piarahamonina ny fandraisana fepetra famaizana ny raharaha maizin’ny andramena. Mitaraina mantsy ny zanak’i Mananara, hoy izy, fa rehefa tonga ny andro iray dia ireo tompon-tany no miditra am-ponja «fa ry zareo tena tompon’andraikitra avy any Sambava na Antalaha na Antananarivo lasa mitsoaka».

Antso, noho izany, no nalefan’ny Lehiben’ny distrika tamin’ny mponina mba hampitsaharan’izy ireo ny fampanofana fiara na lakana na trano na tokontany amin’ny mpanao andramena.

Voaroba i Verezantsoro

Tsy misy afa-tsy 4x4 ny fiara mifamezivezy ao an-tanàna

Toerana telo no tena ivoahan’ny andramena ao Mananara Avaratra, dia ny ao amin’ny fokontany Enara, kaominina Antananivo, fokontany Ivarary, ao amin’ny kaominina Sandrakatsy ary ny manodidina ny fokontany Antevialabe, ao amin’ny kaominina Antanambe. Ireo rehetra ireo dia tafiditra ao amin’ny faritry ny ala arovana Verezantsoro. Misy ihany anefa ny avy any amin’ny kaominina Manambolosy.

Ny ankamaroan’ireo andramenan’i Mananara dia tsy maintsy mandalo eo amin’ny vinany antsoina hoe Agnalila, vao akarina ao anaty sambo lehibe hitondra azy any ivelany. Any Sina matetika ny seranana iantsonan’ireo andramena avy aty Madagasikara. «Tsy misy tetiandro mazava ny fahatongavan’ny sambo fa rehefa voaangona ny entana dia vonona io. Tsikaritra anefa fa mielanelana roa volana eo ho eo ny fiavian’ny sambo. Sambo mahazaka entana any amin’ny 1 500 taonina na 2 000 taonina izy io», hoy Rabemazava Soa Jean, nijoro tsy nihambahamba.

Ny tangalamena Bonsantiry dia nivaky fa «botry sy sambo kely mahazaka entana 50 hatramin’ny 100 taonina miisa am-polony isam-bolana no mivoaka ny reniranon’i Managnara, mitondra andramena aondrana any an-tsambo efa miandry eny afovoan-dranomasina tsy lavitra ny morontsirak’i Mananara».

Kononkononina ny «Dina»

Andrandrain’ny mponina ny fahazoana tamberim-bidy avy amin’ireo andramena nogiazana mba hahafahana mampandroso an’i Mananara Avaratra. Teo anivon’ny Sehatra fifampidinihana Crdm no nitsiry ny hevitra hametrahana Dina ho amin’izany. «Hatreto dia tsy hita taratra amin’ny endrika ivelan’ny tanana ny fananan’i Mananara ireo harena isan-karazany. Takianay ny hanomezana tamberim-bidy anay avy amin’ireo andramena nogiazana», hoy Rabemazava Soa Jean.

Amin’ny alalan’ny Dina no heverin’ny Crdm fa hanatanterahana izany. Saingy hatramin’izao dia mbola tsy nahazo fankatoavana avy amin’ny manampahefana io Dina io. Nomarihin’ny Lehiben’ny distrika, Raharison Mahatombo, fa ankoatra ireo andramena nogiazana dia misy koa ireo hazo nanaovana fanambaràna. Atoby amin’ny toerana vitsivitsy ireo andramena ireo ka tsy azo ahetsika mandra-pisian’ny didy avy amin’ny Fanjakana. Ireo dia hazo tapaka talohan’ny fandraràna ny fanapahana, fitaterana ary ny fivarotana ny andramena navoakan’ny Fanjakana.

Midangana ny vidim-piainana

Lafo fiainana indrindra amin’ireo tanàn-dehibe any amin’ny faritra misy azy i Mananara Avaratra. Misondrotra ny vidim-piainana indrindra amin’ny fotoanan’ny fiotazana jirofo sy lavanila eo anelanelan’ny volana oktobra sy janoary. Mampiakatra ny vidin-javatra koa ny fananan’ny olona vola noho ny raharaham-bato kristaly. Mbola ny Sinoa ihany koa no tonga manangona vato any an-toerana.

Tafakatra hatrany amin’ny 24 000 Ariary ny iray gony amin’ny saribao rehefa miakatra ny jirofo, raha vidiana 8 000 Ariary izany andavanandro. 450 Ariary no ividianana ny kapoakan’ny vary. Iray alina ariary ny kilao amin’ny hena mifangaro ary 12 000 Ariary ny nofony. 4 500 Ariary kosa ny litatra amin’ny lasantsy.

Heritiana Rabesetra

Fikarohana – Nampahafantarina ny karazam-bary vaovao ho an’ny sakafo mahasalama

Rijakely — Thu, 16 May 2013 05:53:45 +0000

Omaly no naseho ireo karazam-bary nanaovana fikarohana

Tontosa omaly, tetsy amin’ny Hotel Colbert Antani- narenina, ny atrikasa tao anatin’ilay tetikasa fitaratra «voly vary, ho an’ny sakafo ara-pahasalamana». Nisy ny andrana karazam-bary vaovao izay natao tany Anjepy – Manjakandriana, ny volana oktobra 2012, vokatry ny fiaraha-miasan’ ny orinasa Nestlé sy ny ivon-toeram-pikarohana ho an’ny fampandrosoana ny eny ambanivohitra, ny foibe fikarohana momba ny fambolena (FOFIFA), ny ivon-toeram-pikarohan’ ny Nestlé, any Abidjan (Côte d’Ivoire) ary ireo sekoly ambony samihafa.

Nisy ny fampitahana ny vokatra avy amin’ny karazam-bary vaovao tamin’ ny vary, efa mahazatra ireo tantsaha, ka anisan’ireo natolotra tamin’izany ny karazam-bary Nerica 1,2,4,6, ary 15, ny X-Jigna ary ny Yunkeng. Amin’ny karazany mahasalama sy feno io vary Nerica io.

Nivoitra nandritra ity atrikasa ity mantsy ny tsy fahampian’ny vy sy ny «zinc» eo amin’ny sakafon’ny Malagasy amin’ny anka- pobeny, indrindra ho an’ ireo reny sy ny zaza. Nana- marina izay ny profesora Roger Randrianasolo, lehiben’ny sampan-
draharaha misahana ny sakafo eo anivon’ny mini- siteran’ny Fahasalamana sady filoha lefitry ny Filan- kevitra siantifika eo anivon’ ny ivon-toeran’ny Nestlé, aty Afrika. «Teo anivon’ ny toeram-pikarohana Africa Rice sy ny FOFIFA no nahazoana ilay karazam- bary Nerica, nofidiana manokana noho ny singa ao anatiny sy ny hery entiny», hoy kosa Philippe Courbet, manam-pahaizana momba ny fambolena avy amin’ny ivon-toeram-pikarohan’ ny Nestlé, any Abidjan.

Mbola andrana ihany aloha no natao hatreto.

Sary sy hosodoko – Hisokatra amin’ny fialan-tsasatra lehibe ny «sekolin’ny sary» an-dRaparivo

Rijakely — Thu, 16 May 2013 05:50:48 +0000

56 taona nanaovana sary hosodoko, hankalazaina amin’ny taona ho avy ny faha-80 taona nahaterahan-dRaparivo Roland Ramaheninarivo, na Raparivo R.R eo amin’ny sehatry ny hosodoko. Ho tsangambaton’ny faha-80 taona io ny fananganana ny «sekolin’ny sary», hiarahan’ny Raparivo sy ireo taranany amin’ny Ivontoerana ho an’ny Kolontsaina Malagasy na ny IKM.

Efa nisy sahady ny «4 andro fampirantiana hosodoko» natomboka omaly ary haharitra hatramin’ny 18 mey, etsy amin’ny Tahala Rarihasina Analakely. «Tsy nandalo fianarana manokana momba ny sary izy nefa nahafehy teknika maro teo amin’ny sary. Ireo no havadika ho fomba fiasa sy ampianarina ny ankizy amin’io sekoly io», hoy Raparivo Tiana, zanany ary tompo-marika amin’ ny fametrahana iry tetik’asa «sekolin’ny sary» iry.

Hiara-dia ao anatin’ ny hetsika ny fampirantiana ahitana ny sanganasan-dRaparivo R.R sy Tiana Raparivo, eo amin’ny hosodoko ary ireo sanganasan’i Zazah R. kosa eo amin’ny sary pika. Efa hisy sahady ihany koa ny fisoratana anarana ao amin’ny «sekolin’ny sary», izay hisokatra amin’ny fialan-tsasatra lehibe.

« Samy ngeza » – Hifandona eny Mahitsy i Fara John’s sy Onja

Rijakely — Thu, 16 May 2013 05:50:11 +0000

«Dueln’ny samy ngeza» no fampisehoana voalohany hiarahan’i Fara John’s sy Onja (Tinondia), eny Mahitsy amin’ny alahadin’ ny Pantekôty izao, ao anatin’ny fikarakaran’ny Mi Art’i Pro. Hifampidera ny talentany avy, amin’ ny alalan’ny mozika mafana ao amin’ny kianjaben’i Mahitsy izy mirahavavy ireto.

Ny gadona salegy no tena ahafantarana an’i Farah John’s ary anisan’ ny mampiavaka azy ny fahaizany manetsika sy mampitsinjaka ireo mpijery. Efa noporofoiny rahateo izany tamin’ireo fampi- sehoana maro efa natolony.

Ireo gadona avy any amin’ny faritra atsimo, ampiarahina amin’ny zava-maneno mavesatra kosa no mampalaza an’i Onja. Tafiditra ao anatin’ izany ny Banaiky, Rodoringa ary ny tsapiky, samy gadona manetsiketsika vatana avokoa. Hanakoako eny mihitsy eny izany ny “samy mandefitra”, “Fanambalia”, “Tsisy quoi”… ampian-dry “Assuré”, “Confiance”, “Jalousie”.

Avaradoha – Lehilahy iray nanafika fivarotana sinoa tamina »Big boss »

Rijakely — Tue, 14 May 2013 06:14:03 +0000

Trano fivarotana sinoa no lasibatr’ireo jiolahy tamin’ny andro antoandro tetsy Avaradoha

Saika ho isan’andro vaky izao ary efa amin’ny andro antoandro mihitsy no manao ny asa ratsiny ireo jiolahy. Trano fivarotana kojakoja fanaovan-trano an’ny Sinoa iray no saika notafihina lehilahy iray tetsy Avaradoha, omaly tokony ho tamin’ny 12 ora sy fahefany antoandro.

« Big boss iray no nentin’io lehilahy io nampihorohoroana ny tao amin’ilay mpivarotra. Namoaka finday tany aminy izy avy eo, sahala amin’ny hiantso ireo namany, ka tamin’ izany no notoherin’ireo mpiasa tao amin’ilay tsena. Rehefa babo ilay voatondro ho jiolahy dia nantsoina ny zandary ka noraisim-potsiny ralehilahy », hoy ny fanazavana avy amin’ny Zandarimariam-pirenena.

« Tamin’ny fahatongavanay teny an-toerana dia nahenoana fofona big boss tao amin’ilay tsena ka azo antoka fa nampiasa io fitaovana io ity lehilahy ity », hoy ihany ny teo anivon’ny zandary.

Tsy nisy nahatsikaritra

Rehefa nanotaniana mikasika ity fanafihana ity ireo olona teo amin’ny manodidina dia nilaza ho samy tsy nahita ny nidiran’io lehilahy io tao amin’ilay tsena. « Izy efa nohorakorahan’ny olona hoe mpangalatra vao gaga aho. Saika taitra sahala amin’izay avokoa izahay rehetra teo amin’ny manodidina satria tsy nisy nahita azy niditra tao », hoy ny nambaran’ny lehilahy iray miasa eo amin’ny manodidina an’ity toerana ity.

« Tsy maintsy hisy fepetra manokana horaisina mikasika ny fitandroana ny filaminana na amin’ny antoandro na amin’ny alina eto Antananarivo Renivohitra. Hiarahan’ny polisy sy ny zandary izany ka efa eo am-pandaminana ny paikady rehetra amin’izany izahay amin’izao fotoana izao», hoy ny nambaran’ny kolonely Rakotomahanina Florens, lehiben’ny fari-piadidiam-paritanin’ny Zandarimaria eto Antananarivo.

H.R